HAGAI 1

1TO owhè awetọ Daliusi ahọlu lọ tọn mẹ, to osùn ṣidopotọ mẹ, to azán tintan osùn lọ tọn mẹ, ohó OKLUNỌ tọn wá gbọn Hagai yẹwhegán lọ dali hlan Zelubabẹli visunnu Sealtiẹli tọn, otògán Juda tọn, podọ hlan jọsua visunnu Jehohadaki tọn, yẹwhenọ daho lọ, dọmọ, 2Le wẹ OKLUNỌ awhànpa lẹ tọn dọ, dọmọ, Omẹ he lẹ dọmọ, Yè ma hẹn ojlẹ wá na ohò OKLUNỌ tọn gba, ojlẹ na ohò OKLUNỌ tọn nado yín didó. 3Whenẹnu wẹ ohó OKLUNỌ tọn wá gbọn Hagai yẹwhegán lọ dali, dọmọ, 4Be é yín ojlẹ de na mìlọsu nado nọnọ̀ ohọ̀ ozànọ mìtọn lẹ mẹ, whenuena ohọ̀ he mlanai gbọ̀gbé? 5Enẹwutu dinvie le wẹ OKLUNỌ awhànpa lẹ tọn dọ: Mì zé ayiha mìtọn do aliho mìtọn lẹ go. 6Mìwlẹ ko do susu, bo sọ hẹn ovude wá hòmẹ; mì to dùdù, ṣigba mì ma tindo pékọ; mì to nùnù, ṣigba yè ma yí minùnu do gọhona mì gba; mì to avọ̀ ṣinyọn, ṣigba ma yín gbigblọ gba; podọ ewọ he to azónkuẹ yí to azónkuẹ yí nado yí i do apò po nùvo lẹ po dẹ mẹ. 7Le wẹ OKLUNỌ awhànpa lẹ tọn dọ: Mì zé ayiha mìtọn do aliho mìtọn lẹ go. 8Mì hẹji yì jẹ otò okọta mẹ, bo hẹn atin wá, bọ dó ohọ̀ lọ; yẹn bo na sọ yí homẹhùn to e mẹ, yè bo na sọ pagigona mi, wẹ OKLUNỌ dọ. 9Mìwlẹ donukun susu, bo, pọn, é sọ wá jẹ ovú; podọ whenuena mì hẹn ẹn wá whégbè, Yẹn fú i sẹ́. Etẹwutu? wẹ OKLUNỌ awhànpa lẹ tọn dọ. Na ohọ̀ ṣie he mlanai ogbògbé tọn wutu, whenuena mìwlẹ to wezunhọn omẹ dopodopo jẹ ohò etọn titi mẹ. 10Enẹwutu wẹ yè hẹn olọn dote sọn ahún mẹ to mì ta, bọ yè sọ hẹn aigba dote sọn osinsẹ́n etọn mẹ. 11Yẹn bo sọ ylọ na sinnugbla de to aigba lọ ji, podọ to osé lẹ ji, podọ to ogbadó ji, podọ to ovẹ̃n ji, podọ to amì ji, podọ to enẹ he aigba hẹn jẹgbonu wá ji, podọ to gbẹtọ ji, podọ to whékanlin lẹ ji, podọ to tuklajẹ alọ lẹ tọn lẹpo ji.

12Whenẹnu wẹ Zelubabẹli visunnu Sealtiẹli tọn lọ, po Jọsua visunnu Jehozadaki tọn lọ po, yẹwhenọ daho lọ, po pipòtọ gbẹtọ lẹ tọn lẹpo po, sètónuna ogbè OKLUNỌ Jiwheyẹwhe yetọn tọn, po ohó Hagai yẹwhegán lọ tọn lẹ po, dile OKLUNỌ Jiwheyẹwhe yetọn ko do ewọ hlan do; gbẹtọ lẹ bo sọ sinú to OKLUNỌ nukọn. 13Whenẹnu wẹ Hagai mẹdagun OKLUNỌ tọn dọhó to wẹndido OKLUNỌ tọn mẹ hlan gbẹtọ lẹ, dọmọ, Yẹn tin po mì po, wẹ OKLUNỌ dọ. 14OKLUNỌ bo sọ fọ́nadan gbigbọ Zelubabẹli visunnu Sealtiẹli tọn otògán Juda tọn lọ, po gbigbọ Jọṣua visunnu Jehozadaki yẹwhenọ daho lọ tọn tọn po, po gbigbọ pipòtọ gbẹtọ lẹ tọn lẹpo po; yé bo sọ wa bo wà azọn to ohọ OKLUNỌ awhànpa lẹ tọn tọn mẹ, Jiwheyẹwhe yetọn, 15To azán kònukunẹnẹtọ osùn lọ tọn mẹ, to osùn ṣidopotọ mẹ, tọ owhè awetọ Daliusi ahọlu lọ tọn mẹ.

Currently Selected:

HAGAI 1: BWL23

Highlight

Copy