ZEKALIA 11

1LẸBANONI È, hùn ohòn towe lẹ, na miyọn nido và kedali towe lẹ súdo. 2Atin fili È, dohùkúhlu, na yè hẹn kedali hó, na yè hẹn yé gigonọ lẹ gble wutu: mì dohukùhlu, mì oaki Baṣani tọn emi, na yè hẹn zùnkan dòkọnọ lọ jẹte wá. 3Ogbè hukuhludido lẹngbọhótọ lẹ tọn tọn de na yè hẹn gigo yetọn gble: ogbè lìli kinnikinni ovú lẹ tọn tọn de na yè hẹn osakla Jọdani tọn gble. 4Le wẹ OKLUNỌ Jiwheyẹwhe ṣie dọ: Yìn lẹngbọpa hùhù tọn lọ; 5Hihọ́tọ mẹhetọn hù yé, bo ma sọ hia yéde na whẹ̀ylantọ gba; podọ yé he sà yé dọmọ, Donanọ OKLUNỌ ni yín, na adọkunnọ wẹ yẹn: podọ lẹngbọhótọ lọ ma sọ blawuna yé gba. 6Na yẹn ma to na sọ blawuna tòmẹnu aigba lọ lẹ tọn ba gba, wẹ OKLUNỌ dọ: ṣigba, pọ́n, yẹn na jó gbẹtọ lẹ omẹ dopodopo do alọ kọmẹnu etọn tọn mẹ, podọ do alọ ahọlu etọn tọn mẹ: yé bo na sọ hò aigba lọ, podọ yẹn ma to na sọ whlẹn yé sọn alọ yetọn mẹ gba. 7Mọ wẹ yẹn yìn lẹngbọpa hùhù tọn lọ, nugbo otapònọ sọn lẹngbọ lẹ mẹ petepete. Yẹn bo sọ yí opò awe hlan dẽ; yẹn ylọ ode dọ Whànpẹ, bo sọ ylọ awetọ dọ Homẹbla lẹ; yẹn bo sọ to lẹngbọpa lẹ yìn. 8Yẹn sọ sán lẹngbọhótọ atọ̀n lẹ sẹ́ to osùn dopo mẹ; na alindọn ṣie yín gbẹ́donọ na yé, podọ alindọn yetọn ga sọ gbẹ́na mi. 9Whenẹnu wẹ yẹn dọmọ, Yẹn ma na yìn mì gba: dọ ehe to kúkú, gbọ é ni kú; podọ enẹ he yè hẹnbu, gbọ é ni yín hinhẹnbu; bo sọ gbọ yé he yè jódai ni dù omẹ dopodopo agbasalan mẹawetọ tọn. 10Yẹn bo sọ zé opò sie Whánpẹ, bo sán ẹn doawe, na yẹn nido gbà alẹ̀nù ṣie he yẹn ko basi po gbẹtọ ewlẹ lẹpo po. 11E bo sọ yín wìnwẹ́n to azán nẹ gbè: bọ otapònọ lẹngbọ lẹ tọn petepete he yí ayìhapa jẹ dè lẹ yọnẹn dọ ohọ́ OKLUNỌ tọn wẹ. 12Yẹn sọ dọ hlan yé dọ, Eyín mì lẹn dagbe, mì na opàkakuẹ ṣie mi; podọ eyín lala, mì bo gbọ̀. Mọ wẹ yé jlẹ owọwó fataka tọn ogbàn na opàkakuẹ ṣie. 13OKLUNỌ sọ dọ hlan mi dọ, Zé e dlan hlan zẹ́ndotọ lọ, osọha dagbedagbe he ji yè dèahina mi do sọn yé de. Yẹn sọ yí owọwọ́ fataka tọn ogbàn lọ, bo zé e dlan hlan zéndotọ lọ to ohọ̀ OKLUNỌ tọn mẹ. 14Whenẹnu wẹ yẹn sọ sán opò ṣie awetọ doawe, yèdọ Homẹbla lẹ, na yẹn nido sán nọvinú lọ to Juda po Islaeli po ṣẹnṣẹn.

15OKLUNỌ sọ dọ hlàn mi dọ, Sọ gbẹ́ vọ́ yí hlan we núzinzán lẹngbọhótọ oklenọ de tọn lẹ. 16Na, pọ́n, yẹn na fọ́n lẹngbọhótọ de daga to aigba lọ mẹ, he ma na bú enẹlẹ he yín hinhẹnbu, mọ ma na sọ din ovú he yè vúnvún lẹ, mọ ma na so hẹnazọ̀ngbọna enẹ he yè gbà; mọ é ma sọ to na yìn enẹ he ṣite, ṣigba ewọ na dù agbasalan ehe dojó tọn, bo na sọ tlẹn ofèn yetọn lẹ hanyanhanyan. 17Dindọn hlan lẹngbọhótọ mẹvọnu lọ he jó lẹngbọpa lọ dai ohi lọ na tin to awà etọn ji, podọ to nukun adusi etọn ji: awà etọn yè na hẹn hú háyóháyó, podọ nukun adusi etọn wẹ yè na sọ hẹn dozinvlu gbidigbidi.

Currently Selected:

ZEKALIA 11: BWL23

Highlight

Copy