ZEKALIA 10
10
1MÌ nọ biọ jikun to ojlẹ jikun agọ̀gbọnẹn tọn mẹ sọn OKLUNỌ si, yèdọ sọn OKLUNỌ he basi abi lẹ si; ewọ bo na sọ na fìnfán jikun tọn lẹ yé, hlan ome dopodopo ogbó to danji. 2Na asányìn le ko dọhó ovótọ, podọ odọsẹnọ lẹ ko mọ olalo de; podọ odlọnọ lẹ yí oklọ do dọhó, yé to homẹmìọnnamẹ to ovó mẹ: enẹwutu wẹ yé to yìyì taidi lẹngbọ lẹ, yè nukunbiana yé, na lẹngbọhótọ de ma tin finẹ wutu. 3Yè hẹn adi ṣie jimiọn do lẹngbọhótọ lẹ ji, podọ yẹn na sọ sayana alùnkun lẹ: na OKLUNỌ awhànpa lẹ tọn ko dla lẹngbọpa etọn owhé Juda tọn pọn, bo na sọ basi yé di osé etọn whanpẹnọ to awhànfuntẹn mẹ. 4Ewọ mẹ wẹ zannu lọnglọnẹnmẹ tọn na jẹgbonu sọn wá, húngan lọ sọn ewọ mẹ, ogába awhán tọn lọ sọn ewọ mẹ, gándùtọ lẹpo dopọ sọn ewọ mẹ 5Yé bo na sọ tin di omẹ hlọnhlọnnọ lẹ, he to kẹ̀ntọ yetọn lẹ zíndai to ababá aligboji lẹ tọn mẹ to awhànfuntẹn mẹ; podọ yé na hoavùn, na OKLUNỌ tin to yé de wutu: yè bo na sọ hẹn hihétọ lẹ to osé ji yín oflunọ 6Yẹn bo na sọ nahuhlọn owhé Juda tọn, podọ yẹn na whlẹn owhé Josẹfu tọn, yẹn bo na sọ hen yé nado nọ nó, na yen tindo lẹblanu to yé ji; yé bo na sọ tin di yẹn ma tẹ ko zé yé dlangbé dai: na yẹn wẹ OKLUNỌ Jiwheyẹwhe yetọn, yẹn bo na sọ sè yé. 7Podọ yé Eflaimi tọn lẹ na tin di taidi omẹ hlọnhlọnnọ de, ayiha yetọn na sọ to ayajẹ di gbọn ovẹ̃n mẹ: mọwẹ, ovi yetọn lẹ na mọ ẹn, bo sọ jaya; ayiha yetọn na sọ yín homẹhùnnọ to OKLUNỌ mẹ. 8Yẹn na dèpislọ na yé, bo sọ pli yé dopọ; na yẹn ko fli yé: podọ yé na sudeji dile yé ko nọ sudeji do. 9Podọ le yẹn tlẹ do yé do gbẹtọ lẹ ṣẹnṣẹn sọ, yé na nọ flin mi to otò dindẹndindẹn lẹ mẹ: Yé bo na sọ nọnọ̀ ovi yetọn lẹ de, bo na sọ lẹ́gọ̀. 10Yẹn na sọ vọ́ yé hẹnwá ga sọn aigba Egipti tọn mẹ, bo sọ ṣinyan yé sọn Asilia mẹ pli; yẹn bo na sọ hẹn yé wá biọ aigba Gileadi po Lẹbanọni po tọn mẹ; podọ otẹn ma na sọ yin mimọ na yé gba 11Ewọ bo na sọ gbọn ohù nukunbia tọn mẹ yì, bo na họ̀ ohù agbowhẹn lẹ tọn, podọ odògbo Nile tọn lẹpo wẹ na hú: yè bo na sọ hẹn osakla Asilia tọn jẹte wá, ogánpò Egipti tọn na sọ fọ́nyì sẹ̀. 12Yẹn bo na sọ nahuhlọn yé to OKLUNỌ mẹ; yé bo na sọ to zọnlinzin hẹji podọ jẹte to oyín etọn mẹ, wẹ OKLUNỌ dọ.
Currently Selected:
ZEKALIA 10: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
