HÓWHÍNWHÉN LẸ 19
19
1WAMỌNỌ he to zọnlinzin to nu gbo etọn mẹ,
É pónte hú ewọ he to yẹnúwà to nuflo etọn mẹ, bo sọ to nululu basi.
2Humọ, ayiha mado nuyọnẹn, ma yón gbà;
Podọ ewọ he hẹn afọ etọn yawu, na jai.
3Nulu gbẹtọ tọn hẹn aliho etọn gble:
Whenẹnu wẹ ayiha etọn gblehomọ do OKLUNỌ go.
4Adọkun dòn họ́ntọn susu:
Ṣigba wamọnọ zùn kinklan sọn kọmẹnu etọn de.
5Kunnudetọ lalo tọn ma na yì majiya,
Ewọ he sọ to lalodo ma na dù i dòn.
6Mẹsusu na vóvó na nukundagbe ahọvi tọn:
Omẹ popo wẹ sọ nọ yín họ́ntọn ewọ he nọ nanumẹ tọn.
7Mẹmẹsunnu wamọnọ tọn lẹpo wẹ nọ gbẹwan nẹ́:
Nẹmunẹmu wẹ họ́ntọn etọn lẹ na dẹn do e?
E domó na yé gbọn ohó dali, ṣigba yé ma tin.
8Ewọ he yọnnuin, yiwanna ayiha ede tọn:
Ewọ he yí zìnzìn whlá na mọ dagbe.
9Kunnudetọ lalonọ ma na yì majiya,
Podọ ewọ he sọ to lalodo na dòn.
10Onú dagbe ma yọ́n na nulunọ gba;
Kavi nẹmunẹmu na devi nado dugán do ahọvi lẹ ji.
11Zìnzìn gbẹtọ tọn hẹn ẹn whleawu nado gblehomẹ;
Gigo etọn sọ wẹ nado dèkọ̀ sọn ylanwà go.
12Homẹgble ahọlu tọn taidi lìlì kinnikinni de tọn;
Ṣigba nukundagbe etọn taidi ahún to ogbé go.
13Ovi nulunọ wẹ homẹgble otọ̀ etọn tọn:
Avùn asi tọn taidi jikun jija.
14Owhé po adọkun po wẹ ogú sọn otò lẹ de:
Ṣigba asi zìnzìn, sọn OKLUNỌ de wẹ.
15Adidọ hẹn omẹ damlọn yì otọ ji:
Ayiha adidọ tọn wẹ huvé na hù.
16Ewọ he yìn osẹ́n, whlá ayiha ede tọn:
Ṣigba ewọ he vlẹ aliho etọn na kú.
17Ewọ he wàlẹblanuna wamọnọ, OKLUNỌ wẹ é yàn na:
Onú he é wà é na sọ suahọ etọn ẹn.
18Hò ovi towe, whenuena tódido tin,
A dike ayiha towe gbọ̀ sọn e go na awhá etọn wutu blo.
19Homẹgbletọ daho na jiya:
Na eyín hiẹ whlẹn ẹn, hiẹ na sọ gọ̀ ẹ wà.
20Túntóai do linlẹn go,
Na a ni sọ yí oplọ̀n,
Na hiẹ nido yọnnuin to pòdo towe.
21Linlẹn susu wẹ tin to ayiha gbẹtọ tọn mẹ:
Ṣigba linlẹn OKLUNỌ tọn, wẹ ehe na nọte.
22Jijọ gbẹtọ tọn wẹ dagbe etọn:
Gbẹtọ wamọnọ sọ pọnte hú lalonọ.
23Osi OKLUNỌ tọn dẹ́ hlan ogbẹ́ dali:
Ewọ he tindo e na nọnọ̀ nupékò mẹ;
Yè ma na yí oylan do dla ẹ pòn gba.
24Gbẹtọ adidọnọ yí alọ etọn whlá do akòn etọn nu,
É ma sọ sọgan hẹn ẹn wá onù ede tọn mẹ bà.
25Linu mẹvlẹtọ, wunvinọ na sọ dayi ede go,
Sọ wọhẹ ewọ he zìn, é na sọ yòn nuyọnẹn.
26Ewọ he to kawà do otò etọn go, bo sọ yàn onọ etọn jẹgbonu,
Wẹ ovi he to winyan basi, bo sọ hẹn ovlẹ wá.
27Ovi ṣie, gbò sọn tótùnai do oplọn go ehe
Nọ hẹn omẹ buali sọn ohó nuyọnẹn tọn mẹ.
28Kunnudetọ ylanylan nọ kò whẹ̀dida:
Onù mẹylankan tọn sọ zé ylankan mì.
29Yè wleawu whẹ̀dida tọn dai na mẹvlẹtọ lẹ,
Podọ obá na nẹ́gbó nulunọ lẹ tọn.
Currently Selected:
HÓWHÍNWHÉN LẸ 19: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.