MIKA 5

1DINVIE wẹ hiẹ na bẹ́ dewe pli do gọ̀nugọnu, hiẹ viyọnnu gọ̀nugọ̀nu lẹ tọn È; ewọ ko tẹ́ oglọndo do mí ji: yé na yí opò de do hò whèdatọ Islaeli tọn lọ to aglanka go.

2Ṣigba hiẹ, Bẹti-lehẹm Eflata, he yín pẹvi nado tin to whédo Juda tọn lẹ ṣẹnṣẹn, hiẹ mẹ wẹ mẹde na jẹgbonu sọn wá jẹ dè he tin nado yín ogán to Islaeli mẹ; gbonujẹ yì mẹhetọn lẹ tin sọn hóhó tọn mẹ, sọn azán hóhótọ lẹ mẹ. 3Enẹwutu wẹ ewọ na jó yé do, kakajẹ ojlẹ he ewọ he to zinzẹ̀n ko hẹn jẹgbonu wá: whenẹnu wẹ pipòtọ mẹmẹsunnu etọn lẹ tọn na lẹ́gọ́ po ovi Islaeli tọn lẹ po. 4Ewọ bo na sọ ṣite, bo na yìn lẹngbọpa etọn lẹ to huhlọn OKLUNỌ tọn mẹ, to gigodaho oyín OKLUNỌ Jiwheyẹwhe etọn tọn lọ tọn mẹ: yé na sọ nọnọ̀; na dinvie wẹ ewọ na yín kiklo jẹ opòdo aigba tọn lẹ. 5Podọ dawe he na yín jijọho mítọn; whenuena Asilianu lọ na wá biọ aigba mítọn mẹ, podọ whenuena ewọ na tùnafọai to ohọ̀nmẹ mítọn lẹ mẹ, whenẹnu wẹ míwlẹ na fọ́n lẹngbọhọ́tọ ṣinawe do ewọ ji, po ahọvi ṣinatọ̀n po to gbẹtọ lẹ ṣẹnṣẹn. 6Yé bo na sọ yí ohi do yín lẹngbọhọ́tọ lẹ to aigba Asilia tọn ji, po aigba Nimlọdi tọn po to bibiọ etọn lẹ mẹ: ewọ bo na sọ whlẹn mí sọn Asilianu lọ si, whenuena ewọ wá biọ aigba mítọn mẹ, podọ whenuena ewọ tùnafọai to agboji mítọn homẹ. 7Podọ pipòtọ Jakob tọn lẹ na tin to gblagbla gbẹtọ susu tọn mẹ di ahún sọn OKLUNỌ de, di jikunfinfán lẹ to ogbé ji; he ma nọ dọngbàn na gbẹtọ, mọ ma sọ nọ nọtepọn visunnu gbẹtọ lẹ tọn lẹ gba. 8Podọ pipòtọ Jakob tọn lẹ na tin to akọta lẹ ṣẹnṣẹn, to gblagbla gbẹtọ susu tọn mẹ, di kinnikinni de to gbékanlin zùnkanmẹ tọn lẹ ṣẹnṣẹn, di kinnikinni ovú de to apó lẹngbọ lẹ tọn ṣẹnṣẹn: mẹhe, eyín é da yì, nọ zíndai, bo sọ nọ dọ̀ntlẹn, podọ mẹde ma tin nado whlẹn. 9Gbọ alọ towe ni yín zédaga hute mẹglatọ towe lẹ, bo sọ gbọ kẹ̀ntọ towe lẹpo ni yín sinsán sẹ̀.

10E na sọ wá jọ to azán nẹ mẹ, OKLUNỌ dọ, wẹ yẹn na sán osọ́ towe lẹ sẹ́ sọn gblagbla hiẹ tọn mẹ, bo na sọ và kẹkẹ towe lẹ súdo: 11Yẹn bo na sọ sán tòdaho aigba lọ tọn lẹ sẹ́, bo na gọ sisẹ́ figángán towe lẹpo liai: 12Podọ yẹn na sán kẹnunsi lẹ sẹ́ sọn alọ towe mẹ; podọ Hiẹ ma na sọ tindo ohiazántọ lẹ de ba gba: 13Podọ yẹn na sọ sán bosiọ pipa towe lẹ sẹ́ po odòtin towe lẹ po sọn gblagbla hiẹ tọn mẹ: podọ hiẹ ma na sọ litaina azọ̀n alọ towe lẹ tọn ba gba. 14Podọ yẹn na họ̀n vodunzùn towe sọn gblagbla hiẹ tọn mẹ: yẹn bo na sọ và kẹ̀ntọ towe lẹ súdo. 15Podọ yẹn na hẹn ahọsuyi ṣẹ to adi po homẹwlu po mẹ to akọta lẹ ji ehe hunkọ yé ma ko mọsè.

Currently Selected:

MIKA 5: BWL23

Highlight

Copy