MATIU 26

1E sọ wá jọ whenuena Jesu dota na ohó helẹ pó, é dọ hlan nuplọntọ etọn lẹ, dọmọ, 2Mìwlẹ yọnẹn dọ to azán awe godo azán hunwhẹ juwayì tọn ja, yè nasọ dè Ovi gbẹtọ tọn hia omẹ nado whè e do satin go. 3Whenẹnu wẹ ogán yẹwhenọ lẹ tọn, po wekantọ lẹ po, po mẹho gbẹtọ lẹ tọn lẹ po, pli to awànu yẹwhenọ daho tọn mẹ, mẹhe yè nọ ylọ dọ Kaifa, 4Yé sọ lẹnayiha dopọ na yé nido yí oyé do wlé Jesu, bo nado hù i. 5Ṣigba yé dọmọ, Lala, é ma yín tọ azán hunwhẹ tọn gbè gba, na zingidi niká fọ́n to gbẹtọ lẹ ṣẹnṣẹn.

6Dinvie Whenuena Jesu tin to Bẹtani to owhé Simoni pòtọnọ tọn gbè, 7Finẹ wẹ nawe de wá e de te he tindo agbán alabasta núsisa akuẹ gegenu tọn de, bo kòn ẹn do ota etọn ji, le é jagla to núdùdù kón. 8Ṣigba whenuena nuplọntọ lẹ mọ ẹn yé tindo homẹgble dòmọ, Etẹwẹ yè to onu he hẹn gú na? 9Na yè do ko sà núsisa he yín akuẹ susu, bo do nanu wamọnọ lẹ. 10Ṣigba Jesu mimọ ẹn hlan do hlan ye, dọmọ, Etẹwutu wẹ mì to tuklado nawe lo? naazón dagbe dewẹéwàdoogo e. 11Na mìwlẹ tindo wamọnọ lẹ to mì de to whepoponu; ṣigba mìwlẹ ma tindo mi to whepoponu gba. 12Na ehe é kon núsisa do agbasa ṣie ji, é basi i na siọdidi ṣie. 13Nugbo we yẹn dọ hlan mì, Fidepope yè na dọ yẹwheho wẹndagbe he tọn te to aihọn lẹpo mẹ, finẹ ga wẹ yè na dọhó onú he nawe he basi tọn te na òfìin etọn de.

14Whenẹnu wẹ dopọ́ to omẹ wiawe lẹ mẹ, he yè nọ ylọ dọ Juda Iskaliọti, yì ogán yẹwhenọ tọn lẹ de, 15Bo dọ hlan ye, dọmọ, Etẹwẹ mìwlẹ to jijlo na na mi, yẹn nasọ yí i do alọ me na mì? Yé sọ jlẹ fataka-kuẹ ogbàn hlan ẹn. 16Son ojlẹ nẹ mẹ wẹ é ko to tẹnmẹ din nado dè e hia.

17To azán tintan hùnwhe akla madoton tọn gbè, nuplọntọ lẹ wá Jesu de, dọmọ, Fie we hie jlo na mí ni wleawu do na we nado dù juwayì? 18E sọ dọmọ, Mì biọ oto daho mẹ yì dawe dele de, bo dọ hlan ẹn dọmọ, Mẹplọntọ dọmọ, Ojlẹ ṣie sẹpọ́; yẹn naso basi juwayì to owhé towe gbè po nuplontọ ṣie lẹ po. 19Nuplọntọ lẹ sọ basi dile Jesu degbèna yé do; yé sọ wleawu juwayì tọn dai. 20Dinvie whenuena tenu do, é jagla po omẹ wiawe lẹ po. 21Le yé to nudù, é dọmọ, Nugbo wẹ yẹn dọ hlan mì dọ, dopo to mì mẹ na dè mi hia 22Yé sẹ̀ blawú susu, bo sọ só didọ hlan ẹn omẹ dopodopo dọ, Oklunọ, yẹn wẹ la? 23E sọ gblon bo dọmọ, Mẹhe do alọ etọn agbán mẹ hẹ mi, doponẹlọ wẹ na dè mi hia. 24Ovi gbẹtọ tọn jei yèdọ dile yè wlanwe ewọ tọn do; ṣigba dindọn hlan dawe lọ mẹhe mẹ yè dè Ovi gbẹtọ tọn hia gbọn. Dagbe e yín na dawe nẹ eyín yè ma ko ji i. 25Podọ Juda, mẹhe dè e hia, gblọn bo dọmọ, Mẹplọntọ, yẹn wẹ la? E sọ dọ hlan ẹn, dọmọji Hiẹ ko dọ. 26Le yé to núdù, Jesu yí akla bo dona, bo sọ kán ẹn, bo yí na nuplọntọ etọn le, bo dọmo, Yí, dù; ehe wẹ agbasa ṣie. 27E sọ yí kofo de, bo dopé, bo sọ yí na yé, bo dòmọ, Mì omẹ pó ni nù to e mẹ 28Na ehe wẹ ohùn ṣie alènu yọ́yọ́ lọ tọn, he yè kòn dai na omẹ susu hlan odèsè ylando tọn. 29Ṣigba yẹn dọ hlan mí, Sọn dinvie yì, yẹn ma na nù to sinsẹ́n vẹn tọn he mẹ ba, kaka jẹ azán nẹ gbè, whenuena yẹn na nù i hẹ mì to yọ́yọ́ mẹ to ahọludu Otọ́ ṣie tọn mẹ.

30Whenuena yé ko sọ ji ohàn dopo, yé tónjẹgbonu yì osó olivie tọn kòn.

31Whenẹnu wẹ Jesu dọ hlan ye, dọmọ, Mì omẹ pó wẹ Yè na hẹn dahli to yẹn mẹ to ozán he mẹ: na yè wlanwe dọ, 1 Yen na linu lẹngbọhọtọ, lẹngbọ lẹngbọpa tọn lẹ nasọ gbapé 32Ṣigba to ehegodo yen fón, yẹn na jẹnukọn na mì yì Galili. 33Ṣigba pita gblọn, bo dọ hlan ẹn, dọmọ, Ẹyin yè na hẹn mẹpopo dahli to hiẹ me, yè ma tọ na hẹn yẹn dahli gbède. 34Jesu sọ dọ hlan ẹn dọmọ, Nugbo wẹ yẹn dọ hlan we dọ, To ozán he me, whẹpo koklo na dose, hiẹ na món mi whla atọ̀n. 35Pita sọ dọ hlan ẹn, dọmọ, Yèdọ eyín yẹn mananọma kú po hiẹ po, yẹn ma na món we gbède. Mọkẹdẹ wẹ nuplọntọ lẹpo dọ ga.

36Whenẹnu wẹ Jesu po yé po wá ofi de he yè nọ ylọ dọ Gẹtsemani, bo sọ dọ hlan nuplọntọ etọn lẹ, dọmọ, Mi sinai to ofi, whenuena yen yì dèho gbé to odon 37E sọ yí Pita po ovisunnu awe Zebedé tọn lẹ po e po, bo sọ sẹ nado yín awúblanọ, podọ tuklanọ badabada. 38Whenẹnu wẹ é dọ hlan yé, dọmọ, Alindọn ṣie yín awublanọ susu, yèdọ kaka jẹ okú mì nọte to ofi, na mì ni to alihó hẹ mi. 39E sọ yì nukọn pẹvide, bo hó jẹ nukunmẹ etọn ji, bo hodẹ, dọmọ, Otọ́ ṣie E, eyin é sọgan yín wiwà, gbọ kọfo he ni juwayì sọn oji e: é ma yín le yẹn jlo do gba, adavo le hiẹ jlo do. 40E sọ wá nuplọntọ lẹ de, bo mọ yé to amlọndọ, é sọ dọ hlan Pita, dọmọ, Etẹ, mìwlẹ ma sọgan hóali hẹ mi to ojlẹ dopo mẹ gba. 41Mì nọ hóali, bo sọ nọ hodẹ, na mì ma na do biọ whlepón mẹ: nugbo wẹ gbigbọ to jijlo, ṣigba agbasa yín madogánnọ. 42E sọ vó gò yì whla, awetọ, bo sọ to dẹho, dọmọ, Otọ́ ṣie È, eyín ehe ma sọgan juwayì, adavo yẹn nù i, ojlo towe ni yín wiwà. 43E sọ vó wá, bo sọ mọ yé to amlọndọ: na nukun yetọn lẹ yín pinpẹn na amlọn. 44E sọ jo yé dai, bo sọ vó gò yì, é sọ hodè whla atọ̀ntọ, bo to ohó daponẹ lẹ dọ. 45Whenẹnu wẹ é wá nuplọntọ lẹ de, bo dọ hlan ye, dọmọ, Mì to amlọndọ, bo sọ gbọjẹ zọnmi lò: pọ́n, ojlẹ sẹpọ́ yè bo dè Ovi gbẹtọ tọn hia do alọ ylandonọ lẹ tọn lẹ mẹ. 46Mì tite, mì gbọ mí ni to yìyì: pọ́n, ewọ he dè mi hia sẹpọ́.

47Le é to hódọ, pọ́n, Juda, dopo to omẹ wiawe lẹ mẹ, wá, podọ to e de agundaho de, po ohi lẹ po, po aglọpo lẹ po, sọn ogán yẹwhenọ lẹ tọn de, po mẹho gbẹtọ lẹ tọn po de. 48Dinvie ewọ mẹhe dè e hia, ko na ohia de ye, dọmọ, Mẹdepope yẹn na donùnùgona, enẹ wẹ ewọ: mì wlé 49Afodoponẹji é wá Jesu de, bo sọ dọmọ, Oyínjla, Meplọntọ; bo sọ donùnùgo nẹ. 50Jesu sọ dọ hlan ẹn, dọmọ, Hóntọn, wà enẹ he yè hẹn we wá na? Whenẹnu wẹ yé wá, bo zé alọ do Jesu go, bo sọ wlé e. 51Pọ́n, dopo to mẹhe tin to Jesu de le mẹ dlen alọ etọn, bo dòn ohi etọn, bo linu afànumẹ yẹwhenọ daho tọn de, bo sọ sán otọ́ etọn dlangbé. 52Whenẹnu wẹ Jesu dọ hlan ẹn, dọmọ, Yí ohi towe dó otẹn etọn mẹ; na mẹhe zé ohi lẹ pó wẹ na dòn po ohi po. 53Kavi hie lẹn dọ yẹn ma sọgan vè Otọ́ ṣie, bọ é na do hú awhanpa angẹli le tọn wiawe yèdọ hlan mi? 54Whenẹnu nawẹ Owe wiwe lẹ na di do, dọ le wẹ é mananọma yín? 55Tó ojle nẹ mẹ we Jesu dọ hlan agùndaho lẹ lọ lẹ, dọmọ, Mìwlẹ tón ja wiwlé mi gbé di ajotọ, po ohi lẹ po, po aglopo le po? egbesọ wẹ yẹn nọ sinai hẹ mì to tẹmpli, mẹ, do to meplọn, mì ma sọ wlé mi gbède. 56Ṣigba onú helẹ pó jọ, na yè nido hẹn Owé wiwe yewhegán lẹ tọn di. Whenẹnu wẹ nuplọntọ lẹpo jo e dai, bo hòn yì.

57Ye mẹhe wlé Jesu lẹ́, dòn ẹn yì owhé Kaifa yẹwhenọ daho tọn gbè, fie wekantọ lẹ, po mẹho lẹ po pli do. 58Ṣigba Pita hodo e to aganu jẹ awánu yẹwhenọ daho tọn mẹ, bo sọ biọ họmẹ, bo sinai hẹ lizọnyítọ lẹ nado mọ opòdo etọn. 59Dinvie ogán yẹwhenọ le tọn, po mẹho lẹ po, po tòhódọtọ lẹpo po to kunnudetọ lalonọ din do Jesu go na yé nido hù i; 60Yé ma mọ ẹn, le kunnudetọ lalonọ susu wá sọ. Ṣigba togodomẹ awe wá, 61Bo dọmọ, Dawe he dọmọ, Yen tin sọgan nado và fiwiwe Jiwheyẹwhe tọn súdo, podọ nado dó e to azán atọ̀n mẹ. 62Yẹwhenọ daho sọ fọ́n ṣite, bo dọ hlan ẹn, dọmọ, Hiẹ ma gblọn nudepope? Etẹwẹ ehe omẹ helẹ to kunnude do ogo we he? 63Ṣigba Jesu nabọe Yẹwhenọ daho sọ dọ hlan ẹn dọmọ, Yẹn do Jiwheyẹwhe ogbẹ̀nọ we, dọ hiẹ ni dọ na mí, eyín hiẹ wẹ Klisti lọ, Ovi Jiwheyẹwhe tọn. 64Jesu sọ dọ hlan ẹn, dọmọ, Hiẹ ko dọ: ṣógan yẹn sọ dọ hlan mì, Sọndinvie mìwlẹ na mọ Ovi gbẹtọ tọn sinai to adusilọ huhlọn, tọn mẹ, bo sọ ja to aslọ olọn tọn lẹ ji. 65Whenẹnu wẹ yẹwheno daho tlẹn awugbó etọn lẹ, bo dọmọ, E zannù: eté mí sọ to kunnudetọ lẹ din na dinvie? pọ́n, mìwlẹ ko sè nùzinzan etọn 66Be etẹwẹ mì lẹn? Yé gblọn domọ, Ewọ jẹ na okú. 67Whenẹnu wẹ ye túntán do nukunme nẹ, bo tùnakotokún in: ome devo lẹ sọ yí alọhòmẹ yetọn do hotóme nè, 68Dọmọ, Dọdodai hlan mí, hiẹ Klisti, Mẹnu wẹ ewọ he linu we?

69Dinvie Pita sinai to gbonu to awánu: awhli de sọ wá e de, bo domọ, Hiẹ ga tin to Jesu Galili tọn de. 70Ṣigba é món to yé omẹ pó nukọn, dọmọ, Yẹn ma yọ́n onú he hiẹ to didọ gba. 71Podọ whenuena é sọ tón jẹ togunmẹ, awhli devo sọ mọ en, bo dọ hlan yé mẹhe tin to finẹ lẹ, dọmọ, Dave he tin to Jesu Nazaìẹti tọn de ga. 72E sọ yí whiwhle de do vó món, dọmo, Yẹn ma yón dawe lọ gba. 73To whenu vude godo, mehe nọte to fine lẹ sọ wá, bo dọ hlan Pita, dọ, Sọn nugbo de mẹ, dopo to yé mẹ we hie ga; na hogbè towe dè we hia. 74Whenẹnu wẹ é sè dẹhodo bo sọ to whiwhle, Yẹn ma yón dawe lọ gba. To afọdoponeji koklo dose. 75Pita sọ flin ohó he Jesu ko do, Whẹpo koklo na dose, hiẹ na más mi whla atón. E sọ tónjẹgbonu, bo viavi badabada.

Currently Selected:

MATIU 26: BWL23

Highlight

Copy