MATIU 27

1DINVIE whenuena é zùn afọnnu, ogán yẹwhenọ tọn le, po mẹhe gbẹtọ lẹ tọn lẹ po le kanayiha do Jesu go nado hù i. 2Yé sọ bla ẹ, bo plan ẹn yì, bo sọ jo e na Pọntiu Pilati ọtògán lo.

3Whenẹnu wẹ Júda, mehe dè e hia, whenuena é mọ dọ yè gblewhẹdo e, diọlinlen na ede, bo sọ henfataka-kuẹ ogbàn lẹ gò wá ogán yẹwhenọ lẹ ton, po mẹho lẹ po de, 4Domọ, Yẹn ko wàylan to ehe mẹ yẹn dè ohùn dódónọ hia te. Sigbá yéwlẹ dọmo, Etẹwẹ enẹ hlan mìwlẹ? hiẹ ni payiha enẹ: gó. 5E sọ bé fatakakuẹ lẹ lọ kòn do aigba to fiwiwe lọ me, bo sọ tón yì, bo dokankò na ede. 6Ogán yẹwheno tọn lẹ sọ yí fàtaka kuẹ lẹ lọ, bo dọmọ, E ma jẹ yè ni bé yé do adọkun potin me gba, le e yín akue ohùn tọn lẹ. 7Yé sọ kanayiha, bo yí do hò aigba zẹnmẹtọ tọn, nado nọ di osiọ onọ lẹ tọn do e mẹ. 8Enẹwutu wẹ yè do nọ ylọ aigba lọ dọ, Aigba ohùn tọn kaka jẹ egbé. 9Whenẹnu we ehe yè dọ gbọn Jẹlemia yẹwhegán mẹ do di, dọmọ, 1 Yé yí fataka-kuẹ ogbàn, akuẹ mẹhe yè doahina tọn, mẹhe ovi Islaeli tọn dẽlẹ doahina; 10Yé sọ jo yé na oglegbo zẹnmẹtọ tọn, dile Oklunọ dè na mi do.

11Dinvie Jesu sọ nọte to tògán nukọn: togán sọ kanbiọ ẹ dọmọ, Be hiẹ wẹ Ahọlu Ju lẹ tọn? Jesu sọ dọ hlan ẹn, dọmọ, Hiẹ dọ. 12Whenuena yè sọ to stslẹ ẹ gbọn ogàn yẹwhenọ lẹ tọn, po mẹho lẹ po de, é ma gblọn núde hlan ẹn. 13Whenẹnu wẹ Pilati dọ hlan ẹn, dọmọ, Be hiẹ ma sè onú susu he yé do to kunnude do okò na we? 14E ma sọ na ogblọndo de e yèdọ jẹ ohó dopo: sọmọ bọ awuji tògán talala. 15Dinvie to hunwhẹ de me tògán do walọ nado dè gantọ dopo dai hlan yé, mẹhe yé jlo. 16Whenẹnu yé tindo gántọ he diyín de, he yè nọ ylọ dọ Balabas. 17Enẹwutu, whenuena yé pli dopọ, Pìlati dọ hlan yé, dọmọ, Mẹnu wẹ mìwlẹ jlo dọ yẹn ni dè dai hlan mì? Balabas, kavi Jesu he yè nọ ylọ dọ Klisti? 18Na é yọnẹn dọ núvẹun wẹ yé yí i do alọ mẹ nó na. 19Whenuena é sinai to ofìn whẹ̀da tọn ji, asi etọn dowẹn hlan ẹn dọmọ, A yí gbẹtẹ dódónọ nẹ do wà núde blo: na yẹn ko duya na onú susu to egbé to odlọ mẹ na ewọ tọn wutu. 20Dinvie ogán yẹwhenọ lẹ tọn, po mẹho lẹ po do agùndaho lẹ lọ na yé nido biọ Balabas, bo và Jesu súdo. 21Ṣigba otògán gblọn, bo dọ hlan yé, dọmọ, To yé omẹ awe lẹ mẹ, mẹnu wẹ mìwlẹ jlo na yẹn ni dè dai hlan mì? Yé sọ dọmọ, Balabas. 22Pilati sọ dọ hlan yé dọmọ, Etẹwẹ yẹn na wà do Jesu mẹhe yè nọ ylọ dọ Klisti? Yé omẹ pó sọ dọmọ, Gbọ ewọ ni yín whiwhe do satin go. 23Ewọ sọ dọmọ, Etẹwutu, oylan tẹwẹ é wà? Ṣigba yé sọ dawhá húmọ dọmọ, Gbọ ewọ ni yín whiwhe do satin go. 24Mọwẹ whenuena Pilati mọ dọ é ma sọgan yíta to nudepope mẹ, ṣigba dọ finfọn jànwẹ zingidi de te, é yí osìn, bo kló alọ etọn to agùndaho lọ nukọn, bo dọmọ, Yẹn yín homẹvọnọ to ohùn dawe dódónọ he tọn mẹ; mì payi e go. 25Gbẹtọ lẹpo gblọn, bo dọmọ, Ohùn etọn ni tin to mí ji, podọ to ovi mìtọn lẹ ji. 26Whenẹnu wẹ é dè Balabas dai hlan yé: ṣigba é hò Jesu, bo jo e nado yín whiwhe do satin go.

27Whenẹnu wẹ awhanvipẹ otògàn tọn lẹ hẹn Jesu biọ gbàngan whẹ̀da tọn mẹ, bo bé awhanpa lẹpo pli do e de. 28Yé sọ dè avọ̀ sọn e go, bo do awù vẹ̀ nẹ̃. 29Yé sọ lòn ojẹgbakun owùn tọn de, bo yí i ṣinyọn ota nẹ̃, po ofánpo de po do adusilọ etọn mẹ; yé sọ jẹklo to nukọn etọn, bo to vivlẹ ẹ ko, dọmọ, Oyínjla, Ahọlu Ju lẹ tọn! 30Yé sọ túntán do e go, bo yí ofánpo lọ, bo sọ li ota nẹ̃. 31Whenuena yé ko vlẹ ẹ vó, yé dè awù lọ sọn é go, bo sọ yí avọ́ etọn do nẹ, bo sọ hẹn ẹn jẹgbonu nado whè e do satin go.

32Le yé tón wá, yé mọ dawe Silene tọn de, he yè nọ ylọ dọ Simoni: ewọ wẹ yé yí huhlọn do hẹn nado yì po yé po, na ewọ nido hẹn satin etọn. 33Whenuena yé jẹ ofi he yè nọ ylọ dọ Gọlgọta, enẹ wẹ taka tẹnmẹ, 34yé na ovẹ̃n ewọ nado nù, he yè kọndopọ po vivẹ po: whenuena é dó ẹ pọ́n, é ma jlo na nù. 35Yé sọ whè e do satin go, bo má avọ̀ etọn, vòdidè lẹ mẹ: na ehe yè dọ gbọn yẹwhegán mẹ nido di, dọ, Yé má avọ̀ ṣie to yé ṣẹnṣẹn to vòdidè lẹ mẹ. 36Ye sọ sinai, bo to hihó ẹ to finẹ: 37Yé sọ yí do ota etọn ji meslehó eton winwlan, EHE WẸ JESU AHỌLU JÚ LẸ TỌN. 38Whenẹnu wẹ yé whè ajotọ awe do satin go po e po, dopo to adusilọ mẹ, awetọ to amiyọnlọ mẹ. 39Mẹhe sọ to jujuwayì lẹ sọ to vivlẹ ẹ ko, bo to ota yetọn mimí, 40dọmọ, Hiẹ mẹhe hó fiwiwe lọ bo sọ dó e to azán atọ̀n mẹ, whlẹn dewe. Eyín hiẹ yín Ovi Jiwheyẹwhe tọn, jẹte sọn satin go. 41Mọkẹdẹ wẹ ogán yẹwhenọ lẹ tọn ga to vivlẹ ẹ ko, po wekantọ lẹ po, po mẹho lẹ po, dọmọ, 42E nọ whlẹn omẹ devo lẹ; é ma sọgan whlẹn ede. Eyín ewọ yín Ahọlu Islaeli tọn, ni jẹte sọn satin go dinvie, mìwlẹ nasọ yí i se. 43E dotu to Jiwheyẹwhe mẹ: gbọ e ni whlẹn ẹn gán dinvie eyín é yiwan nẹ̃: na é dọmọ, Ovi Jiwheyẹwhe tọn wẹ yẹn. 44Podọ ajotọ lẹ ga, he yè whè do satin go po e po, to vivlẹ ẹ ko to ohó dopolọ mẹ.

45Dinvie sọn ogàn sidopotọ mẹ, wẹ zinvlu de do ṣinyọn aigba lẹpo ji, kaka jẹ ogàn sinẹnẹtọ mẹ. 46To ogàn sinẹnẹtọ mẹ Jesu yí ogbè léló de do dawhá dọmọ, ELI, ELI, LAMA SABAKTANI? enẹ wẹ, Jiwheyẹwhe ṣie, Jiwheyẹwhe ṣie, etẹwutu wẹ hiẹ gbé mi dai? 47Mẹdẽlẹ to mẹhe site to finẹ lẹ mẹ, whenuena yé sè ehe j e dọmọ, Dawe he to Eli ylọ. 48To afọdoponẹji dopo to yé mẹ họnwezun, bo yí hùmẹtekan de, bo yi ovẹ̃n he vẹsìn do gó ẹ, bo sọ yí i do ofánpo ji, bo yí na ẹn nù. 49Omẹ pipòtọ lẹ sọ dọmọ, Mì jo e do, na mí ni pọ́n, eyín Eli na wá whlẹn en. 50Jesu sọ vọ́ yí ogbè lélé de do dawha, bo jo gbigbọ etọn do 51Bo pọ́n, avọ̀ yè do gbòabò fiwiwe lọ tọn sọ tlẹn do awe sọn aga jẹ odò; aigba whan gigi, osé lẹ sọ zẹ̀; 52oyòwhé lẹ sọ hùn do nuvo: osiọ susu omẹ wiwe he ko damlọn le tọn fọ́n, 53bo tón sọn olido lẹ mẹ jegbonu to fọ́nsọnku etọn godo, bo so biọ otò daho wiwe lọ mẹ, bo sọ awuhia omẹ susu. 54Dinvie whenuena mekanwekowhangán, po yé he tin to e de bo to Jesu hó lẹ po, mọ aigba whinwhàn lọ, po onú he jọ nẹlẹ po, obu diye talala, ye dọmọ, Nugbo, Ovi Jiwheyẹwhe tọn wẹ ehe. 55Yọnnúsi susu wẹ tin to finẹ, bo to nupón to aganu yé mehe hodo Jesu sọn Galili, bo to lizọnvi nẹ lẹ: 56Yé mehe mẹ Malia Magdaleni tin te, podọ Malia onọ Jakobu po Josesi po tọn, po onọ ovi Zẹbede tọn lẹ po.

57Whenuena tenu sọ do, dawe adọkunno de sọn Alimaté wá, he yè no ylọ dọ Josẹfu, mẹhe, ewlọsu ga ko yin nuplọntọ Jesu tọn: 58Dawe he yì Pilati de, bo biọ osiọ Jesu tọn. Whenenu wẹ Pilati nasẹ e nado yín jijo. 59Josefu so zé osiọ lọ, bo bla ẹ do alavọ wiwe de mẹ. 60Bo sọ té e do oyọ̀whé yọ́yọ́ ewlọsú tọn mẹ, ehe yè kùn to osó mẹ; é sọ bli osé daho do ohòn oyọ̀whé lọ tọn ji, bo sọ tọ́n yì. 61Malia Magdaleni tin to finẹ, po Malia awetọ po, yé sinai sẹpọ olidò lọ.

62To azán awetọ gbè, ehe hodo azán awuwle tọn, ogán yẹwhenọ lẹ tọn, pó Falesi lẹ po wá plidopọ do Pilati de, 63Dọmọ, Baba, mìwlẹ flin dọ mẹklọtọ nẹ dọ whenuena é tin to ogbè, dọmọ, To azán atọ̀n godo yẹn na fọ́n. 64Enẹwutu degbèna yè ni payi olidò lọ go dagbedagbe kaka jẹ azán atọ̀ntọ gbè, nuplọntọ etọn lẹ tika wá to ozán mẹ bo fìn in sọ yì, bo na dọ hlan gbẹtọ lẹ, dọmọ, E fọ́n sọn osiọ lẹ mẹ: bubu godometọn bo na ylan hú nukọntọn. 65Pilati sọ dọ hlan yé, dọmọ, Mì tindo hihọtọ: mì yì, na mì ni basi dagbedagbe dile mì sọgan do. 66Mọwẹ yé yì, bo sọ hẹn olidò lọ diun, bo dohia osé lọ go, bo sọ dè hihọtọ do e kọ̀n.

Currently Selected:

MATIU 27: BWL23

Highlight

Copy