MATIU 25

1WHENẸNU wẹ ahọludu olọn tọn na yín jijlẹ do awhli ao go, he yi ozòwhán yetọn lẹ, bo tọ́n jei asisunọ pé gbé. 2Atón to yé mẹ yín nulunọ, atọn sọ yín nuyọnẹntọ. 3Na nulunọ lẹ, whenuena yé yí ozòwhán yetọn lẹ ma yí amì po yé po gba: 4Ṣigba nuyọnẹntọ lẹ hẹn amì to ogò yetọn mẹ pọ ozowhán yetọn lẹ po. 5Le asisunọ dẹn, ye omẹ pó samlọngọ́, bo damlọn. 6To zángbodawe mẹ, awhá di, dọmọ, Pọ́n, asisunọ ja; mì tẹ́n yì pó e. 7Whenẹnu wẹ awhli nẹlẹ pó fọ́n, bo jlá ozòwhán yetọn lẹ do. 8Nulunọ lẹ sọ dọ hlan nuyọnẹntọ lẹ, dọmọ, Mì na mí sọn amì mìtọn mẹ; na ozowhán mìtọn lẹ to sisi. 9Ṣigba nuyọnẹntọ lẹ gblọn dọmọ, Eya, na é ma nado whè do mí po mìwlẹ po; ṣigba mì gbọ bo yì mẹhe nọ sà lẹ de, bo họ na mìde. 10Podọ le yé jei hihò gbé, asisunọ wá: yé mẹhe wleawu lẹ biọ họmẹ hẹ ẹ yì alọwle hùnwhẹ kòn; yè sọ sú ohòn. 11To godo wẹ awhli devo he pò lẹ wá, yé dọmo, Oklunọ, Oklunọ, hùnhòn na mí. 12Ṣigba é gblọn bo dọmọ, Nugbo wẹ yẹn dọ hlan mì, Yẹn ma yọ́n mì gba. 13Enẹwutu mì nọ họ́ mìde, na mì ma yón azán lọ kavi ojlẹ lọ gba.

14Na e tin di whenuena omẹ de jei otò dindẹn mẹ, bo ylọ afànume etọn lẹ, bo bé agbàn etọn lẹ jo na yé. 15E yí talẹnti atọ̀n na mẹde, bo yí awe na omẹ awetọ, bo sọ yí dopo na omẹ atọ̀ntọ; é na dopodopo yetọn le huhlọn etọn te: é sọ tọ́n yì gbéjizọnlin etọn ji. 16Afọdoponẹji mẹhe mọ talẹnti atón yi, yì bo yí etọn do wàjọ, é sọ duale talẹnti atọ́n devo dogọ́. 17Mọkẹdẹ wẹ mẹhe mọ awe yí, ewọ ga sọ duale awe devo tọn. 18Ṣigba mẹhe mọ dopo lọ yí, yì bo kùndo, bo yí akuẹ klunọ etọn tọn whlá. 19To ojlẹ dindẹn de godo, klunọ afànumẹ nẹlẹ tọn gò, bo basi linlẹn po yé po. 20Mẹhe mọ talẹnti atọ̀n yí wá, bo sọ hẹn talẹnti atón devo wá, bo dọmọ, Oklunọ, hiẹ yí talẹnti atọ́n na mi: pọ́n, yẹn duale talẹnti atón devo dogọ́ yé. 21Okluno etọn sọ dọ hlan ẹn, dọmọ, Enẹ yì dagbe, hiẹ afànumẹ dagbe nugbonọ: hiẹ yín nugbonọ to onú vude mẹ, yẹn na yí we do dogan onú susu ton: hiẹ biọ ayaje klunọ towe tọn mẹ. 22Ewọ ga he sọ mo talẹnti awe yí sọ wá bo dọmọ, Oklunọ, hiẹ yí talẹnti awe na mi: pọ́n, yẹn sọ duale talẹnti awe devo. 23Oklunọ etọn sọ dọ hlan ẹn, dọmọ, Enẹ yì dagbe, hiẹ afànume dagbe nugbonọ; hiẹ yín nugbonọ to onú vude mẹ, yẹn na yí we do dogán onú susu tọn: hiẹ biọ ayajẹ klunọ towe tọn mẹ. 24Ewọ ga he mọ talẹnti dopo yí sọ wá, bo dọmọ, Oklunọ, yẹn yọn hiẹ dọ gbẹtọ fifiẹtọ wẹ hiẹ, hiẹ nọ gbèn to fie hiẹ ma dó do, bo sọ nọ bé pli to fie hiẹ ma vúnvún dó; 25Yẹn sọ yín avosatọ bo yì, bo yí talẹnti towe whlá do okó mẹ: pọ́n, hiẹ tindo towe titi lọ. 26Ṣigba Oklunọ etọn gblọn, bo dọ hlan ẹn, dọmọ, Hiẹ afànumẹ ylankan adidọnọ, hiẹ yọnẹn dọ yẹn nọ gbẹn to fie yẹn ma dó do, bo sọ nọ bé pli to fie yẹn ma vúnvún do. 27Enẹwutu hiẹ jẹ nado ko yí akuẹ ṣie hlan akuẹdiọtọ lẹ, whenuena yẹn gò na yẹn nido mọ onú ṣie yí po linlan po. 28Enẹwutu mi yí talẹnti lọ sọn e si, na mì ni yí na mẹhe tindo talẹnti ao. 29Na mẹdepope he tindo wẹ yè na na, bọ é nasọ tindo sugege: ṣigba sọn mẹhe ma tindo si wẹ yè na yí yèdọ ehe é tindo te. 30Mì sọ zé afànume madoalenọ lọ dlọn zinvlu mẹ to gbonu, finẹ wẹ avi po adukúnkún po na te.

31Ṣigba whenuena Ovi gbẹtọ tọn na wá to gigo etọn mẹ, po angẹli lẹpo po e po, whenẹnu we é na sinai to ofìn gigo etọn tọn ji. 32Nukọn etọn wẹ yè na bé akọta lẹpo pli do: é nasọ klán yé dovo sọn yénọzo go, dile lẹngbọhọtọ nọ klán lẹngbọ etọn lẹ sọn gbọgbọẹ lẹ go do. 33E nasọ yí lẹngbọ lẹ do adusilọ etọn mẹ, ṣigba gbọgbọẹ lẹ do amiyọn mẹ. 34Whenẹnu wẹ Ahọlu na dọ hlan yé mẹhe to adusilọ etọn mẹ lẹ, dọmọ, Mì wá, mì donanọ Otọ́ ṣie tọn, mì dugú aholudu he yè ko wleawu etọn dai na mì sọn dòdó aihọn tọn wá. 35Na huvẹ to hùhù mì, mì na núdùdù mi: nugbla to hùhù mi, mì na núnùnù mi: yẹn yín jonọ, mì yí mi do whégbè: 36Yẹn to omé, mì ṣinyọ̀navọ̀na mi: yẹn jẹazòn, mì sọ pọ́n ogo e: yẹn tin to gànwhé, mì sọ wá dẽ. 37Whenẹnu wẹ dódónọ lẹ na gblọnna ẹn, dọmọ, Okluno, whetẹnu wẹ mìwlẹ mọ bọ huvẹ to hùhù we, bo na núdùdù we? Kavi bọ nugbla to hùhù we, bo na núnùnù we? 38Whetẹnu wẹ mìwlẹ mọ hiẹ yín jonọ, bo yí we do whégbè? kavi bọ hiẹ to ome, bo ṣinyọ̀navọ̀na we. 39Kavi whetẹnu wẹ mìwlẹ mọ hiẹ to azónjẹ kavi to gánwhé, bo wá de we? 40Ahọlu na sọ gblọn, bo dọ hlan yé, dọmọ, Nugbo wẹ yẹn dọ hlan mì, Le mìwlẹ basi i hlan dopo to mẹmẹsunnu ṣie helẹ mẹ, yèdọ pẹvipete helẹ yẹn wẹ mì basi i hlan. 41Whenẹnu wẹ é na dọ ga hlan mẹhe to amiyọnlọ mẹ lẹ dọmọ, Mì fọ́nyì sọn dẽ to dẹhodo de glọ, biọ ozò madopodo mẹ, he yè ko wleawu etọn dai na aovi po angẹli etọn lẹ po. 42Na huve to hùhù mi, mì ma na núdùdù mi: nugbla to hùhù mi, mì ma na núnùnù mi. 43Yẹn yín jonọ, mì mẹ yí mi do whégbè: yẹn jẹ omé, mì ma ṣinyọ̀navọ̀na mi; yẹn jẹazón, podọ to ganwhe, mì ma sọ pọn ogo e. 44Whenenu wẹ yewlẹ ga nasọ gblọn, dọmọ, Oklunọ, whetẹnu wẹ mìwlẹ mọ bọ huvẹ to hùhù we, kavi bọ nugbla to hùhù we, kavi bọ hiẹ yín jonọ, kavi bọ hiẹ to omé, kavi jẹazòn, kavi to gànwhé, bo ma yílizọn hlan we? 45Whenẹnu wẹ é na gblọnna yé, dọmọ, Nugbo wẹ yẹn dọ hlan mì, Le mìwlẹ ma ko basi i hlan omẹ pẹvi pete helẹ, yẹn wẹ mì ma wà ẹ hlan. 46Podọ ehelẹ wẹ na juyì oya madopodo mẹ; ṣigba dódónọ lẹ biọ ogbẹ madopodo mẹ.

Currently Selected:

MATIU 25: BWL23

Highlight

Copy