MATIU 11

1E sọ wá jọ, whenuena Jesu dotana gbèdidena nuplọntọ etọn wiawe lẹ, é tón sọn finẹ nado plónmẹ podọ nado dọyẹwheho to otò yetọn lẹ mẹ.

2Whenuena Johanu, sè to ogànhò mẹ, azón Klisti lọ tọn lẹ é dowẹnhlan gbọn alọ nuplọntọ etọn lẹ tọn me, 3bo dọ hlan ẹn, dọmọ, Be hiẹ wẹ ewọ he ja, kavi mí jẹ na nọtepọ́n medevo?

4Jesu sọ gọn bo dọ hlan yé, dọmọ, Mì gọyì, bo dọ onu he mi sè, po ehe mi mọ po hlan Johanu: 5nukuntọ́nnọ lẹ to númọ, podọ opotẹn lẹ to zọnlinzìn, yè to potọnọ lẹ lẹ̀we, podọ tokunọ lẹ to núsè, pọdọ yè tọ oṣiọ lẹ fọ́n do ogbẹ̀, podọ hlan wamọnọ le ye tọ yẹwheho wẹndagbe tọn dọ 6Podo donano wẹ ewo, mẹdepope he ma na mọ onú ahlidida ton de to yen me.

7Le yé yi, Jesu sẹ Kinkanbio gbẹtọ lẹ gbọn Johanu dali dọmọ, Be eté mì tọ́njẹgbonu bio zùngbo mẹ nado pọn? Ofán he towhinwhànna jẹhọn? 8Be etẹ́ mì tọ́njẹgbonu nado mọ? Dawe he yè sìnyọn avọ̀ wọdọwọdọ na? Pon, yé he yè sìnyọn avọ̀ wọdọwọdọ na lẹ tin to owhé ahọlu tọn lẹ gbè. 9Ṣigba etẹ́wutu mí tọ́nyì? Nado pọn yẹwhegan de? Mọwẹ, yẹn dọ hlan mì, susu mọ húgán yẹwhegán de. 10Ehe wẹ ewọ mẹhe tọn yè wlanwe dọ,

Pọ́n, yẹn do wẹndagun ṣie hlan nukunmẹ towe nukọn,

mehe na jla aliho towe do to nukọn towe.

11Nugbo yẹn dọ hlan mì, To yé he yè ji sọn yọnnu mẹ lẹ mẹ, mẹde ma fọ́n heklohú Johanu Baptisi: ṣigba mehe whègbahú to ahọludu olọn tọn mẹ klo hú i. 12Sọn Johanu Baptisti whenu kaka jẹ dinvie, lẹgẹdido wẹ yè do to ahọludu olọn tọn zan, lẹgẹ dẹ dotọ lẹ sọ yi huhlọn do yí i. 13Yẹwhegán lẹpo, po osẹ́n po wẹ yè ko dọdai kaka je Johanu. 14Eyín mi jlo na yi i, ehe wẹ Eli he ja. 15Mẹhe tindo otó, ni sè. 16Ṣigba etẹ́ go wẹ yẹn na yí whẹndo he jlẹ́ do? E taidi yọpọvú he sinai to ahihò mẹ lẹ, bo to gbèjlẹ hlan hatọ yetọn lẹ, 17bo dọmo, Mìwlẹ kúnvan hlan mì, mì ma duwè: mìwlẹ sọ blawú, mì ma viavi. 18Na Johanu wá, é ma dù, mọ é ma nù, yé dọmọ, E do aovi. 19Ovi gbẹtọ tọn wá, e to dùdù bo to nùnu, yé sọ dọmọ, Pọ́n, dawe adonọ, ahannumunọ, họ́ntọn tokuesinyantọ po ylandonọ lẹ po tọn. Podọ yè ko sùwhẹna núyónẹn gbọn azọ́n etọn lẹ dali.

20Whenẹnu wẹ é ṣẹ̀ whègbledo otò nẹle, fie yè wà gégé azón hlonhlọnnọ etọn nẹlẹ lọ te, na ye ma lẹnvọjọ wutu: 21Dindọn hlan hiẹ, Kọlazin! dindọn hlan hiẹ, Betsaida! na eyín azón gángán, he yè wà to mí mẹ, yè ko wa to Tile po Sidoni po mẹ, yé na ko lẹnvọjọ to hóhó to odévò po afín po mẹ. 22Ṣigba yẹn dọ hlan mì, dọ, E na ponte na Tile po Sidoni po to whẹdazángbè hú na mì lẹ. 23Podọ hiẹ, Kapẹlnaumi yè na zé hiẹ daga jẹ olọn wẹ? hiẹ na jẹte yì okutòmẹ: na eyín yè do wà azón hlonhlọnnọ lẹ lọ to Sọdọmi mẹ, ehe yè ko wa to hie me, édo ko tinai kaka jẹ azán he gbé 24Ṣigba yẹn dọ hlan mì, do, E na pónte na àigba Sọdomi tọn to whẹda zángbè hu na hiẹ.

25To ojle nẹ mẹ wẹ: Jesu gblọn bo dọmo, Yẹn dopẹ́na we, Otọ́ È, Oklunọ olọn po aigba po tọn, na hiẹ sọ onu helẹ whlá do nuyọ́nẹntọ lẹ, pódọ do zínzínyẹnto le, bo do yé hia na vivú lẹ́. 26Mọwẹ, Oto: na mọkẹdẹ wẹ é yón do to nukun towe mẹ, 27Onú lepo wẹ yè yí na mi sọn Otọ́ ṣie de: mẹde ma sọ tunwun Ovi, adavo Oto mọ mẹde ma sọ tunwun Otọ́, adavo Ovi, podọ medepope he Ovi jlo nado so e hia na. 28Mì wá dẽ, mì he to tuklajẹ, bo yè doagban pinpẹ̀n na le, yen nasọ na gbọjẹ mì. 29Mì yì zògè ṣie do oko mìtọn, na mì ni sọ plon núpinplon ṣie na homẹmimiọnnọ podọ ayiha whiwhẹnọ we yẹn: mì nasọ mọ gbọjẹ hlan alindọn mìtọn lẹ. 30Na zégé ṣie bọawú, agbàn ṣie sọ fua.

Currently Selected:

MATIU 11: BWL23

Highlight

Copy