JOB 33
33
1ṢOGÃN, yẹn vẹ́ we, Job, sè ohógbè ṣie,
Bo sọ tuntóai hlan ohó ṣie lẹpo.
2Dayi e go, dinvie, yẹn ko kẹ́ onù ṣie,
Odẹ́ ṣie ko dọhó to ohèke ṣie mẹ.
3Ohó ṣie lẹ na dọ tenọgligli ayiha ṣie tọn;
Podọ enẹ he nùflo ṣie lẹ yọnẹn yé na dọ vivévivẹ́.
4Gbigbọ Jiwheyẹwhe tọn wẹ ko basi mi,
Podọ gbọfufu Ganhunupo tọn na ogbẹ́ mi.
5Eyín hiẹ sọgan, hiẹ ni gblọnna mi;
Tò ohó towe lẹ do haji to nukọn ṣie, fọ́n site.
6Dayi e go, Yẹn tin kẹdẹdi ojlo towe to otẹn Jiwheyẹwhe tọn mẹ:
Yè do yẹn ga sọn okò mẹ.
7Dayi e go, obudaho ṣie ma na hẹn we sàvo gba,
Mọ azínansọmẹ ṣie ma na yín pinpọ̀n to oji we gba.
8Hiẹ ko dọhó do sisè ṣie mẹ nugbonugbo,
Yẹn ko sọ sè ogbè ohó towe lẹ tọn, dọmọ,
9Wiwe wẹ yẹn, matin núdakandakan;
Homẹvọnọ wẹ yẹn, oylanwà de ma sọ tin to yẹn mẹ gba:
10Dayi e go, ewọ dín oklènjọ́ owhẹ̀hó lẹ tọn mọ,
E len mi na okẹntọ eton;
11E yí afọ ṣie do osópo lẹ mẹ,
E sọ dohia ogo na omọ̀ji ṣie lẹpo.
12Dayi e go, hiẹ ma yín dódónọ to
ehe mẹ gba; Yẹn na gblọnna we:
Na Jiwheyẹwhe yín kiklo hú gbẹtọ.
13Etẹwutu wẹ hiẹ to avùnhò hẹ ẹ,
Na enẹ ewọ ma na linlẹn owhẹ̀hó etọn lẹ depope tọn.
14Na Jiwheyẹwhe dọhó to aliho dopo
mẹ, Mowẹ, to awe mẹ, yín gbẹtọ ma tlẹ hò e pọ́n gba.
15To odlọ de mẹ, to numimọ zánmẹ tọn de mẹ,
Whenuena amlọn daho flẹjẹ gbẹtọ lẹ ji.
To amlọngọ̀ lẹ mẹ to adọzàn ji;
16Whenẹnu wẹ ewọ hùn otó gbẹtọ lẹ tọn lẹ,
Bo tlénúdo núpinplọn yetọn go,
17Na gbẹtọ nido jó linlẹn etọn do yì,
Podọ ewọ nido whla sakla sọn gbẹtọ de;
18Na ewọ nido jagọ̀ sọn odò mẹ,
Podọ ogbẹ̀ etọn sọn súsúdo mẹ gbọn awhàniunnú lẹ dali.
19Yè yí awufiẹsa do doafọna ẹn to adọzàn etọn ji,
Po avùn whepoponu tọn po to ohú etọn lẹ mẹ:
20Sọmọ bọ ogbẹ̀ etọn gbẹwanna akla,
Podọ alindọn etọn núdùdù vivivivi.
21Yè hẹn agbasalan etọn dùsúdo yì,
bọ yè ma do sọgan mọ ẹn;
Podọ ohú etọn lẹ he yè mọ tlọ́n jẹgbonu.
22Mowẹ, alindọn etọn dọ̀n sẹpò jẹ odò
lọ kòn,
Podọ ogbè etọn jẹ mẹvàtọ lẹ de.
23Eyín mẹdagun de tin to e de,
Gbèsètọ de, mẹdopo sọn fọtọ́n lọ mẹ,
Nado dohia hlan gbẹtọ temanọgli etọn.
24Bọ ewọ yín dagbenọ hlan ẹn, bo dọmọ,
Whlẹn ẹn sọn tejẹ yì jẹ odò lọ kọ̀n mẹ,
Yẹn ko mọ ofligọ̀ de.
25Agbasalan etọn na yín jẹemẹ hú ovi de tọn;
E lẹ́gọ̀ do azán ovú etọn tọn lẹ kọ̀n;
26Ewọ hodẹ̀ hlan Jiwheyẹwhe, ewọ sọ yín homẹdagbenọ hlan ẹn;
Sọmọ bọ ewọ yí ayajẹ do mọ nukunmẹ etọn:
E sọ gọ̀ dódó etọn jó hlan gbẹtọ.
27E pọ́n gbẹtọ, bo dọmọ,
Yẹn ko waylando, bo hẹn enẹ he yín jlọjlọ sọtadona,
Yè ma sọ lẹn ẹn hlan mi:
28E ko fli alindọn ṣie sọn yìyì odò lọ mẹ,
Ogbẹ̀ ṣie na sọ mọ hinhọ́n lọ
29Pọn, ónú he lẹpo wẹ Jiwheyẹwhe wà,
Whlawe, mọwẹ, whlatọ̀n, hẹ gbẹtọ de,
30Nado hẹn alindọn etọn gọ̀ sọn odò lọ mẹ,
Na yè nido yí hinhọ́n ogbẹ̀ tọn do họ́nunna ẹn.
31Job E, dohia dagbe, tuntóai hlan mi:
Hẹn abọẹ towe go, Yẹn na sọ dọhó.
32Eyín hiẹ tindo onú depope nado dọ, gblọnna mi:
Dọhó, na yẹn jlo nado sùwhèna we.
33Eyín lala, hiẹ ni tuntóai hlan mi:
Hẹn abọẹ towe go, yẹn na sọ plọn nuyọnẹn we.
Currently Selected:
JOB 33: BWL23
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.