JOB 32
32
1MOWẸ omẹ atọ̀n helẹ dodòna nado to hógblọnna Job, na é yín dódónọ to nukun ede lọsu tọn lẹ mẹ wutu. 2Whenẹnu wẹ yè hẹn homẹgble Elihu visunnu Balakẹli Buzinu lọ tọn tọn, sọn whẹ́do Lami tọn mẹ tọn jimiyọn: Job go wẹ yè hẹn homẹgble etọn jimiyọn do, na é towhẹsuna ede hú na Jiwheyẹwhe wutu. 3Do họntọn etọn atọ́n helẹ go ga wẹ yè hẹn homẹgble etọn jimiyọn do, na yé ma din ogblọndo de mọ wutu, podọ gãnṣo yé ko gblewhẹ́do Job. 4Dinvie Elihu ko yí ohó lẹ do nọtepọ́n Job, na yé yín mẹwhinwhẹ́n hú ewọ wutu. 5Podọ whenuena Elihu mọ dọ ogblọndo de ma tin to onù omẹ atọ̀n helẹ tọn mẹ, yè hẹn homẹgble etọn jimiyọn.
6Elihu visunnu Balakẹli Buzinu tọn lọ bo gblọn bo dọmọ,
Yọpọ wẹ yẹn, omẹho talala wẹ mìwlẹ;
Enẹwutu wẹ yẹn jagọ́ bo ma hà do núyílẹn ṣie hia mì gba.
7Yẹn dọmọ, Azán lẹ do dọhó,
Podọ susu owhè lẹ tọn do plón nuyọnẹn omẹ.
8Ṣigba gbigbọ de tin to gbẹtọ mẹ,
Podọ gbọfufu Ganhunupo tọn to wuntùntùn na yé.
9E ma yín mẹkiklo lẹ wẹ yín nuyọnẹntọ,
Mọ é ma yín mẹwhinwhẹ́n wẹ nọ tùnwun whẹ̀dida gba.
10Enẹwutu yẹn dọ, Tuntóai hlan mi;
Yẹn ga na do núyílẹn ṣie hia.
11Dayi e go, yẹn nọtepọ́n ohó mítọn lẹ,
Yẹn nató na wédido mítọn lẹ,
Whenuena mi to dindin etẹwẹ nado dọ.
12Mọwẹ, Yẹn jóawu hlan mì,
Bo, dayi e go, mẹde ma tin he dènúdonukunmẹna Job,
Kavi gblọn ohó etọn lẹ, to mi ṣẹnṣẹn gba.
13Mìwlẹ nìkà dọ dọmọ,
Mìwlẹ ko din nuyọnẹn mọ;
Jiwheyẹwhe wẹ tùn in liai gbẹtọ ma gba;
14Dinvie ewọ ma ko dèalina ohó etọn lẹ do oji e gba;
Mọ yẹn ma sọ to na yí ohógbè mítọn lẹ do gblọnhóna ẹn gba.
15Yè hẹn yé jiawu, yé ma gblọnhó de ba;
Yé ma tindo ohó de nado dọ.
16Bé yẹn na nọte, na yé ma dọhó wutu,
Na yé nọte abọẹ, bo ma sọ gblọnhó de ba wutu?
17Yẹn ga na gblọn ṣie tọndali,
Yẹn ga na do núyílẹn ṣie hia.
18Na yẹn tin gọ́ na ohó lẹ;
Gbigbọ ohòto ṣie mẹ tọn to wẹvẹ̀ mì.
19Dayi e go, ohòto ṣie tin di ovẹ̃n he ma tindo nùvonu;
Taidi ayúgo yọ́yọ́ ovẹ̃n tọn lẹ, he tin alọji.
20Yẹn na dọhó, na yẹn nido mọ awubọ;
Yẹn na kẹ̀ onùflo ṣie lẹ bo gblọnhó.
21Yẹn vẹ́ mì, mì dike yẹn hò nukunta
gbẹtọ depope tọn pọ́n blo;
Mọ yẹn ma sọ to na na kikó ovivlẹ tọn lẹ hlan mẹdepope gba.
22Na yẹn ma yọ́n nado namẹ kikó ovivlẹ tọn lẹ gba;
Mọwìwà mẹ Mẹdatọ ṣie do zé mi yì plaun.
Currently Selected:
JOB 32: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.