JOB 30
30
1ṢIGBA dinvie yé he yín yọ̀pọ hú yẹn lẹ tindo mi to avlẹda mẹ,
Otọ́ mẹhetọn awuhiọ mi nado dè gọ́na avún lẹngbọpa ṣie tọn lẹ.
2Mowẹ, huhlọn alọ yetọn lẹ tọn fie wẹ é nale mi jẹ?
Gbẹtọ mẹhe mẹ yè hẹn huhlọn súdo te.
3Yè yí ohẹn po hùvé po do hẹn yé whídi;
Yé họ̀nyì zùngbo mẹ, do zíndido ogbògbé po ovọ́jẹ po tọn mẹ.
4Yé nọ kọ́n ojó madidò to zùnkan dali:
Podọ adọ́ atinkẹtẹ tọn lẹ wẹ nado hẹn yé gblọ.
5Yè yàn yé jẹgbonu sọn ṣẹnṣẹn gbẹtọ lẹ tọn;
Yé to awhádo to yé godo di to ajotọ de godo.
6To agbàdo zindonọ daho pete mẹ wẹ yé na nọnó,
To odò aigba tọn lẹ po osé lọ po tọn mẹ.
7To zùnkan lẹ mẹ wẹ yé to awhádo te;
To owàn lẹ ṣẹnṣẹn wẹ yé dlan yéde do.
8Ovi núlunọ lẹ tọn wẹ yé, mọwẹ, ovi omẹ vọnu lẹ tọn;
Yè hò yé tọ́n sọn aigba lọ ji.
9Ṣigba dinvie yè hẹn mi lẹzùn ohàn yetọn,
Mọwẹ, yẹn yín hódọnu de hlan yé.
10Yé gbẹwanna mi, yé site to ola sọn dẽ,
Bo ma pòdai nado to tántún dọ nukunmẹ ṣie mimọ mẹ.
11Na ewọ ko tún ogákàn ṣie, bo sọ bianukunna mi,
Yé ko sọ dlan osógàn lọ yìngbé to nukọn ṣie.
12Do alọ adusi ṣie ji wẹ agùnzíngidinọ lọ fọ́n do,
Yé tùn afọ ṣie lẹ dapadopo,
Yé sọ zé aliho yetọn dindọn tọn lẹ dlan aga do oji e.
13Yé jlòdòna omọ́ ṣie,
Yé zé oya ṣie do nukọn,
Yèdọ gbẹtọ he ma tindo alọgọtọ.
14Di ogbàgbò daho osìn lẹ tọn yé wá:
To gblagbla adóto mẹ tọn yé bli yéde do oji e.
15Yè hẹn obudaho lẹ́ do oji e,
Hiẹ dafọna yẹyidaho ṣie di ojẹhọn;
Dagbeninọ ṣie wẹ yè sọ hẹn juyì di aslọ de.
16Dinvie yè kọ̀n alindọn ṣie jẹgbonu do oji e;
Azán nukunbia tọn lẹ ko tẹ́ do ogo e.
17To ozán jlẹmẹ yè hẹn ohú ṣie lẹ klidù bo sọ flẹ sẹ́ sọn ogo e,
Okàn ṣie lẹ he hẹn mi whídi ma sọ yí ogbọjẹ de.
18Yè hẹn awugbo ṣie diọun gbọn
huhlọn daho awutuzọ̀n ṣie tọn dali:
E bla mi lẹ́dopé di okòbla agawu ṣie tọn.
19Ewọ ko zé mi dlan ogbòn mẹ,
Yen sọ tin lẹzùn taidi kógudu po afin po.
20Yẹn dawhá hlan we, hiẹ ma sọ siọ mi;
Yẹn tite, hiẹ sọ to pinpọ́n mi.
21Yè diọ we nado yín okanọ hlan mi:
Hiẹ yí hlọnhlọn alọ towe tọn do dohomẹkẹn mi.
22Hiẹ zé mi daga hlan ojẹhọn,
Hiẹ hẹn mi nado hé e ji;
Hiẹ sọ hẹn mi yi to yújẹhọn mẹ.
23Na yẹn yọnẹn dọ hiẹ na hẹn mi wá je okú mẹ,
Jẹ ohò opli na gbẹ̀nọ lẹpo tọn mẹ.
24Ṣogãn mẹde ma dlẹn alọ jẹgbonu to aijẹ etọn mẹ?
Kavi to oya etọn mẹ dawhá na alọgọ na enẹwutu!
25Bé yẹn ma nọ viavi na ewọ he tin to tukla mẹ?
Bé yè ma hẹn alindọn ṣie sadi na agbátọnọ lọ?
26Whenuena yẹn donukun dagbe, whenẹnu wẹ oylan wá;
Podọ whenuena yẹn nọtepọ́n hinhọ́n, zinvlu wẹ wá.
27Sẹ́li ṣie to wuwlu, bo ma gbọjẹ;
Azán nukunbia tọn lẹ yè hẹn wá oji e.
28Yè hẹn mi họ̀yù sigba gbọn owhè dali ma gba:
Yẹn ṣite to mẹsusu mẹ, bo dawhá na alọgọ.
29Nọvisunnu de hlan ogbévún lẹ wẹ yẹn,
Podọ ogbẹ́ gongo lẹ tọn de.
30Ayú ṣie yín oyú, bo flẹ sọn ogo e,
Yè sọ yí yózo do fiọ ohú ṣie lẹ.
31Enẹwutu wẹ yè do lẹ́ ajalẹn ṣie hlan awubibla,
Podọ okète ṣie do ogbè yé he to avivi lẹ tọn mẹ.
Currently Selected:
JOB 30: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.