JOB 28
28
1AIGBASLO de tin nugbo na fataka,
Podọ otẹn de na sika he yé jlado.
2Aigba mẹ wẹ yè dè gànyù sọn,
Zannu mẹ wẹ yè sọ kọ̀n gànvẹ̃ sọn.
3Gbẹtọ wẹ do opòdo na zinvlu,
Bo sọ to dòdinna odògbo nukọnnukọn tọn.
Zannu sọn zinvlu titli lẹ mẹ, podọ sọn oyẹ́ okú tọn mẹ.
4E hùn afọ́nu de dẹndo fie gbẹtọ lẹ wáwási te;
Yè wọnji yé go sọn afọ he juwáyi dali;
Yé pla to aganu sọn gbẹtọ lẹ de, yé to mìmì yìgodo yìnukọn.
5Na aigba tọn, é mẹ wẹ akla nọ sọn:
Yè sọ diọ odò e tọn hlan aga taidi gbọn miyọn dali.
6Zannu etọn lẹ wẹ otẹn safile lẹ tọn,
E sọ tindo kógudu sika tọn.
7Omọ́ nẹ ohẹ̀ núsá tọn de ma Yọnẹn, mọ nukun ohọ́napeli tọn ma ko mọ ẹn gba:
8Gbẹ́kanlin awàgunnọ lẹ ma ko tunafọ e ji gba,
Mọ kinnikinni fiflẹtọ ma ko gbọn finẹ dali gba.
9E dè alọ etọn jẹgbonu do osé okẹ́nnọ ji;
E hùngona osé lẹ sọn adọ̀ mẹ.
10E dè owhín lẹ to osé lẹ ṣẹnṣẹn;
Nukun etọn sọ mọ onú hóakuẹ lẹpo.
11E bla tósisa lẹ bọ yé ma sọ kùn gba;
Onú he yè whla lẹ wẹ é sọ hẹn jẹgbonu wá hinhọ́n kọ̀n.
12Ṣigba fie yè na mọ nuyọnẹn te?
Podọ fie wẹ otẹn wuntùntùn tọn te?
13Gbẹtọ ma yọn akuẹ etọn;
Mọ yè ma mọ ẹn to aigba gbẹ́nọ lẹ tọn ji.
14Dògbo dọmọ, E ma tin to ohò ṣie mẹ gba:
Ohù sọ dọmọ, E ma tin to dẽ gba.
15Yè ma sọgan tindo e na sika gba,
Mọ yè ma sọ sọgan jlẹ fataka na ahidona etọn gba.
16Yè ma sọgan yí sika Ofili tọn,
Kavi yí onikai họakuẹ, kavi safile do doahina ẹn.
17Sika po glasi po ma sọgan sóhẹ ẹ gba:
Mọ didiọ etọn ma na yín nuzinzán sika dagbedagbe tọn gba.
18Yè ma na dọhó ayọ́n tọn kavi klistali tọn gba.
Nugbo, ahidona nuyọnẹn tọn tin húgan lubi lẹ.
19Topazi Etiopia tọn ma na sọzẹn hẹ ẹ gba,
Mọ yè ma na yí sika dagbedagbe do doahina ẹn gba.
20Fie wẹ nuyọnẹn ka sọn wá?
Podọ fie wẹ otẹn wuntùntùn tọn te?
21Mimọ é yín whiwhla sọn nukun gbẹ̀nọ lẹpo tọn mẹ,
Bo sọ jẹlá sọn ohẹ́ aga lẹ de.
22Dindọn po okú po dọmọ,
Míwlẹ ko yí otó mítọn lẹ do sè linlin etọn de.
23Jiwheyẹwhe wẹ tùnwun aliho etọn,
Ewọ wẹ sọ yón otẹn etọn.
24Na ewọ to opòdo aigba tọn lẹ mọ,
Bò sọ mọ olọn glọ pete.
25Nado basi ojlẹnú de na ojẹhọn;
Nugbo, é yí ojlẹnú do jlẹ osìn lẹ.
26Whenuena é basi asẹ de na ojikun,
Podọ aliho de na abi osò tọn:
27Whenẹnu wẹ é mọ ẹn, bo lá ẹ;
E hẹn ẹn lódo, nugbo, bo din in mọ.
28Podọ hlan gbẹtọ wẹ é dọmọ,
Dayi e go, budisi OKLUNỌ tọn, enẹ wẹ nuyọnẹn;
Podọ nado fọ́nyì sọn oylan mẹ wẹ wuntùntùn.
Currently Selected:
JOB 28: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.