JOB 22
22
1WHENẸNU wẹ Elifazi Temanu lọ sọ gblọn, bọ dọmọ,
2Bé gbẹtọ de sọgan yín alenọ hlan Jiwheyẹwhe?
Nugbo ewọ he yín nuyọnẹntọ yín alẹnọ hlan ede.
3Bé homẹhùn de tin hlan Ganhunupo, dọ hiẹ yín dódónọ?
Kavi é yín ale hlan ẹn, dọ hiẹ hẹn aliho towe lẹ zùn pipé?
4Bé budisi we tọn wẹ ewọ do dindòna we la,
Wẹ é do yì whẹ̀dida mẹ po hiẹ po?
5Bé é ma yín dọ okanylan towe klo wẹ?
Mọ opòdo depope ma tin na oylanwà towe lẹ.
6Na hiẹ ko yí ogòdenú sọn nọvisunnu towe si yaya,
Bo sọ klọ́n oménọ do omẹ́ sọn avọ́ yetọn mẹ.
7Hiẹ ma ko na osìn hlan otapònọ nado nù,
Hiẹ ko sọ glọn akla sọn hùvẹ́tọnọ lọ de.
8Ṣigba na omẹ awhàngbaja tọn lọ, ewọ wẹ tindo aigba lọ;
Podọ ewọ agbasa mẹhetọn yín alọkẹyi, ewọ wẹ nó é mẹ.
9Hiẹ ko do asusiọsi hlan alọvọ́,
Podọ yè ko wón awà tóṣiọvi lẹ tọn.
10Enẹwutu wẹ omọ̀ do tin lẹ́do we,
Bọ obu ajiji do to tuklado we,
11Kavi hiẹ ma mọ zinvlu lọ,
Po gigọ́ osìn lẹ lọ tọn po he to ṣinṣinyọn we?
12Bé Jiwheyẹwhe ma tin to agayì olọn tọn?
Bo to ota sunwhlẹvu lẹ tọn pọ́n, le yé tin yìaga sọ!
13Hiẹ sọ dọmọ, Etẹ́ wẹ Jiwheyẹwhe yọnẹn?
Ewọ sọgan dawhè gbọn zinulu titli mẹ?
14Aslọ titli lẹ wẹ oṣinyọn de hlan ẹn, bọ ewọ ma do mọnú gba;
Ewọ sọ to zọnlinzin to adadanu aga olọn tọn.
15Hiẹ na hẹn aliho hóhó lọ go,
He omẹ ylankan ko zìngbọn?
16Mẹhe yè mì dlangbó jẹnukọnna ojlẹ yetọn,
Odòdonu mẹhetọn yè kón jẹgbonu di osìnsisa de:
17Mẹhe dọ hlan Jiwheyẹwhe dọ, Fọ́nyì sọn mi de;
Podọ etẹ́ Ganhunupo sọgan wà hlan yé?
18Gãnṣo é yí onú dagbe lọ do gọ́ owhé gbè:
Ṣigba hónamẹ mẹylankan lọ tọn tin dẹn sọn dẽ
19Dódónọ lọ mọ ẹn, bo sọ yín homẹhùnnọ;
Homẹvọnọ lọ sọ yí i do davlẹ:
20Dọmọ, Nugbo yè sán yé he fọ́n do mí ji lẹ sè,
Podọ gégé yetọn wẹ miyọn ko fiọ.
21Hẹn dewe vó hẹ ẹ dinvie, bo nọ jijọho:
Enẹdali wẹ jideji towe na yín
22Yẹn vẹ́ we, Yí nupinplọn lọ sọn onù etọn,
Bo yí ohó etọn lẹ do ayiha towe mẹ.
23Eyín hiẹ gọ̀ do Ganhunupo de, yè na dó we daga;
Hiẹ na dè mawàdódó lọ́ dẹn do gohọ́ towe lẹ.
24Bo na tò sikamú pli do aigba lọ ji,
Po sika Ofili tọn po to zannu tòpẹsẹ lẹ tọn lẹ ṣẹnṣẹn;
25Ganhunupo na sọ yín sikamú towe,
Podọ fataka akuẹgégénu na sọ yín towe.
26Na whenẹnu wẹ hiẹ na hẹnhomẹhùn dewe to Ganhunupo mẹ,
Bo na sọ zé nukunmẹ towe daga hlan Jiwheyẹwhe.
27Hiẹ na basi odẹ́ towe hlan ẹn, ewọ na sọ sè we;
Hiẹ na sọ sú opà towe lẹ.
28Hiẹ na sọ do onú de ai ga, yè na sọ hẹn ẹn lódo hlan we;
Hinhọ́n na sọ họ́n do aliho towe lẹ ji.
29Whenuena yè hẹn yé jẹdò, hiẹ na dọmọ, Zizé daga tin;
Podọ ewọ he yín whiwhẹ́nọ nukun lẹ tọn wẹ ewọ na whlẹn.
30E na whlẹn ewọ he yín homẹvọnọ:
Mọwẹ, ewọ na yín whinwhlẹn gbọn wiwe alọ etọn lẹ tọn mẹ.
Currently Selected:
JOB 22: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.