JOB 21
21
1WHENẸNU wẹ Job gblọn bo sọ dọmọ,
2Mì yí sọwhiwhe do sè ohógbè ṣie;
Bo sọ gbọ ehe ni yín homẹmiọn mítọn lọ.
3Mi ni dikẽna mì, yẹn ga na sọ dọhó;
Podọ ehe godo yẹn ko dọhó, hiẹ na to ṣinṣanko.
4Na yẹn tọn, be whẹ̀gble yín gbẹtọ tọn wẹ?
Etẹwutu ka wẹ yẹn ma na do yín awumajainọ?
5Dohia mi, bo yín awújinọ,
Bo yí alọ towe do onù towe ji.
6Yèdọ whenuena yẹn flin yẹn yín tuklanọ,
Ahlinhọn sọ tó do agbasalan ṣie go.
7Etẹwútu wẹ mẹylankan lọ do to ogbẹ́,
Lẹzùn mẹho, mọwẹ, whẹ́n zun hlọnhlọnnọ to huhlọn mẹ?
8Yè hẹn okún yetọn lódo po yé po to nukun yetọn mẹ,
Podọ ovivi yetọn lẹ to nukun yetọn lẹ mẹ.
9Owhé yetọn lẹ tin jijọho mẹ matin obu,
Mọ opò Jiwheyẹwhe tọn lọ ma sọ tin to yé ji.
10Oyìnsú yetọn lẹ nọ yla bo ma nọ gbò;
Oyìnsi yetọn nọ jivi, bo ma nọ kónhò.
11Yé nọ do ovi flinflin yetọn lẹ hlan gbonu di lẹngbọpa de,
Ovi yetọn lẹ sọ nọ to wèdu.
12Yé nọ zé ogbè daga hlan akọhun po ajalẹn po,
Bo sọ nọ jaya na nudidọkète tọn.
13Yé nọ zán azán yetọn lẹ to gbèdùdù
Podọ to dànudopo de mẹ yé jẹte yi oyòdo mẹ.
14Gãnṣo yé dọ hlan Jiwheyẹwhe dọ,
Fónyì sọn mí de;
Na mìwlẹ ma jlo oyọnẹn aliho towe lẹ tọn gba.
15Etẹ́ Ganhunupo yín, bọ mìwlẹ na do nọ sẹ́n ẹn?
Podọ ale tẹwẹ mìwlẹ do tindo, eyín míwlẹ hodó hlan ẹn?
16Mìwlẹ dọmọ, pọ́n, gbẹ́dùdù yetọn ma tin to alọ yetọn mẹ gba:
Hónamẹ mẹylankan tọn tin dẹn sọn dẽ.
17Whlanẹmunẹmu wẹ yè ṣi miyọngbán mẹylankan tọn?
Podọ whlanẹmunẹmu wẹ oya yetọn nọ wá yé ji! Jiwheyẹwhe to awubla vùnpé to adi etọn mẹ.
18Yé tin di gbésánpò tò ojẹhọn nukọn,
Podọ di ofló he oyujẹhọn bẹ́ jei.
19Jiwheyẹwhe tò oylanwà etọn pli na ovi etọn lẹ;
Ewọ nale e, ewọ na sọ yón ẹn.
20Nukun etọn lẹ na dindọn etọn,
Ewọ na sọ nù sọn homẹgble Ganhunupo tọn mẹ.
21Na homẹhùn tẹwẹ ewọ tindo to owhé etọn gbè to godo etọn,
Whenuena yè sán osọha osùn etọn lẹ tọn se to ṣẹnṣẹn mẹ?
22Bé omẹ de na plọn oyọnẹn Jiwheyẹwhe wẹ?
Mimọ ewọ nọ dawhẹ̀na enẹlẹ̃ he tin to aga.
23Ode kú to huhlọn gigọ etọn mẹ,
Tintin pete blẹo po abọẹ po mẹ:
24Yìnnọ́ pánko etọn lẹ yín gigọ́ na yìnnó,
Podọ yè hẹn apọ̀n ohú etọn lẹ tọn dosìn.
25Podọ mẹdẽvo lẹ kú to ovivẹ́ alindọn tọn mẹ,
Bo ma sọ dọpọ́n sọn dagbe mẹ.
26Yé mlọnai zẹnzẹn do kógudu mẹ, Owán sọ ṣinyọn yé ji.
27Dayi e: go, yẹn yọ́n linlẹn mítọn lẹ,
Po wédido lẹ po he mìwlẹ yí mayọn do lẹn do ogo e.
28Na mìwlẹ dọmọ, Fie wẹ owhé ahọvi lọ tọn te?
Podọ fie wẹ gohó he mẹ mẹylankan lọ nọ nò te?
29Bé mìwlẹ ma ko kansè yé he gbọn aliho lọ yì lẹ?
Bé mìwlẹ ma yọ́n hiadonú yetọn lẹ?
30Dọ yè pò omẹ ylankan lọ dote hlan azán oya tọn?
Dọ yè to yé plan tọ́njẹgbonu hlan azán homẹgble tọn lọ?
31Mẹnu wẹ na dè aliho etọn dọ do nukunmẹ nẹ̃?
Podọ mẹnu wẹ na sọ gọ̀ahọsu yi na; ehe é ko wà?
32Gãnṣo yè zé e hẹn jẹ oyọ́do kọ̀n,
Bo sọ to oyọhọ́ etọn go pọ́n.
33Okọ́gó agbàdòmẹ tọn lẹ na yín vivi hlan ẹn,
Gbẹtọ lẹpo wẹ na nọ dọ̀n hodo e,
Le madosọha ko yín to nukọn etọn do.
34Etẹwutu wẹ mìwlẹ yí ovọ́ do to homẹmiọnna mi,
Mimọ to ogbègblọn mítọn lẹ mẹ, matinyise kẹdẹ wẹ pò finẹ.
Currently Selected:
JOB 21: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.