ISAIA 9

1NA ojẹhẹ de ma na tin hlan ewọ he tin to awufìẹsa mẹ gba. To whẹwhẹwhenu é hẹn ovlẹ wá aigba Zabulọni tọn po aigba Nẹftali tọn po ji, ṣigba to godomẹ wẹ é ko hẹn ẹ̀n zùn gigonọ, gbọnaliho ohùtọn lọ dali, Jọdani gododọnt Galili akọta lẹ tọn. 2Yé he to zọnlinzin to zinvlu mẹ mọ hinhọ́n daho: yé he nọnọ̀ aigba oyẹ̀ okú tọn mẹ lẹ ji wẹ hinhọ́n họnwùn do. 3Hiẹ ko hẹn akọta nẹ jideji, bo sọ hẹn ayajijẹ etọn zùn susu nẹ: yé to ayajẹ to nukọn towe di ayajijẹ ojijẹ tọn, dile gbẹtọ nọ to ayajẹ whenuena yé to ogbànna má. 4Na hiẹ wẹ́n zẹ̀gẹ̀ agbàn etọn tọn, po opò abọ́ etọn ji tọn po, ogànpò awusinyẹnnamẹtọ etọn tọn di azán Midiani whenu tọn. 5Na gbaja awhànfuntọ lẹ tọn to zingidi mẹ, po avọ́ he yè ylón do ohùn mẹ po, ṣigba ehe na tin na mimẹ̀ po akán mìyọn tọn po. 6Na yè ji ovi de hlan mí, yè na ovisunnu de hlan mí; ahọludu na sọ tin to abọ́ etọn ji: yè na nọ ylọ oyín etọn dọ Jawu, Hónamẹtọ, Jiwheyẹwhe huhlọnnọ, Otọ madopodo, Ahọvi Jijọho tọn. 7Ahọludu etọn po jijọho po ma na ponù, to ofìn Davidi tọn ji, podọ to ahọludu etọn ji, nado nọ pọ́n e go, podọ nado sọ yonu etọn hẹnai, gbọn whẹ̀dida dali; podọ gbọn dódó dali, sọn dinvie, yèdọ kakadoi. Vivẹnu OKLUNỌ awhànpa lẹ tọn tọn na basi ehe.

8OKLUNỌ ko do ohó de hlan Jakob, é sọ jẹ do Islaeli ji. 9Gbẹtọ lẹpo na sọ yọnẹn, yèdọ Eflaimi po gbẹtọ Samalia tọn lẹ po, he to didọ to sakla po ayiha sinsinyẹn po mẹ, dọmọ. 10Bliki nẹlẹ ko họ́, aigba míwlẹ na yí zánnu pipà do do e: yè sán atin Sikamọli tọn liai, aigba míwlẹ na yí atin kedle tọn do diọ yé. 11Enẹwutu wẹ OKLUNỌ na zé kẹ̀ntọ Letsin tọn dote do e ji, bo na sọ dọ̀n kẹ̀ntọ lẹ dopọ́; 12Syliatọ lẹ to nukọn, Filistìnnu lẹ to godo: yé na sọ yí onù lẹpo do dù Islaeli súdo. To ehe lẹpo mẹ homẹgble etọn ma lẹ́kó, ṣigba alọ etọn dlẹn do gbonu jãnwẹ.

13Gbẹtọ lẹ lọ ma lọ́gọ̀ do ewọ he linú yé de, mọ yé ma din OKLUNỌ awhànpa lẹ tọn. 14Enẹwutu OKLUNỌ na sán ota po osí po, alà po ofán po sọn Islaeli, to azán dopo mẹ. 15Mẹhóhó yẹyinọ, ewọ wẹ ota; yẹwhegán he to lalo plọnmẹ, ewọ wẹ osí lọ. 16Na nukọntọ omẹ helẹ tọn hẹn yé buali; yé he yè sọ plọn gbọn alọ yetọn mẹ lẹ wẹ yè hù súdo. 17Enẹwutu wẹ OKLUNỌ ma to na tindo homẹhùnhùn to dẹpẹ yetọn lẹ mẹ, mọ é ma to na wà lẹblanuna tóṣiọvi po asuṣiọsi yetọn lẹ po: na mẹfuflu wẹ yé omẹ pó, ylanwatọ, onù lẹpo sọ to nululu dọ. To ehe lẹpo mẹ homẹgble etọn ma lẹ́kọ̀, ṣigba alọ etọn dlẹn do gbonu jànwẹ.

18Na jijọ ylankan to jiji di mìyọn: é na fiọ otẹun po vẹun po, bo na sọ ji to zunkàn zungbo tọn mẹ, yé na sọ yì aga dile azọ̀ nọ yì aga do 19Gbọn homẹgble OKLUNỌ awhanpa lẹ tọn dali wẹ aigba lọ do dozinvlu, gbẹtọ lẹ na sọ taidi akán mìyọn tọn: mẹdepope ma na whlẹn mẹmẹsunnu etọn do ogbẹ̀. 20E na wúndù to adusi, hùvẹ́ na sọ hù i; é na sọ dù to amìyọn mẹ; é ma to na pékọ̀na yé: omẹ dopodopo na dù olàn awà ede tọn. 21Manasse na dù Eflaimi; Eflaimi na sọ dù Manasse: yé omẹ awe lẹ na sọta Juda. To ehe lẹpo mẹ homẹgble etọn ma lẹ́kọ̀, ṣigba alọ etọn dlẹn do gbonu jànwẹ.

Currently Selected:

ISAIA 9: BWL23

Highlight

Copy