ISAIA 8

1HUMỌ Oklun sọ dọ hlan mi dọmo yí owe daho dopó, bo yí wekantin gbẹtọ tọn do kanwé do e mẹ, Na Mahẹl-Salal-Has-Baz tọn; 2Yẹn sọ yí kunnudetọ nugbonọ lẹ do dẽ de, nado dekunnu, Ulie yẹwhenọ, po zakalia ovi Belekia tọn po. 3Yẹn sọ biọ ohò mẹ hodo yẹwhegán yọnnu nẹ; ewọ sọ mọho, bo ji visunnu dopo. Whenẹnu wẹ OKLUNỌ dọ hlan mi dọmọ, ylọ oyìn etọn dọ Mahẹl-Salal-Has-Baz. 4Na whẹpo ovi lọ ná tindo nuyónẹn nado dawhá dọ, Otọ́ ṣie, onọ ṣie, yè na ko bẹ́ adokun Damasku tọn po ogbànna Samalia tọn po sẹ̀ sọn nukọn ahọlu Assylia tọn.

5OKLUNỌ sọ vọ dọ hlan mi ga dọmọ, 6Sọle omẹ helẹ gbẹ̀ osìn Ṣiloe tọn he to sisa dẹdẹ dai, bo sọ jaya to Letsin mẹ podọ to ovi Lemalia tọn mẹ. 7Enẹwutu dinvie, dayi e go, OKLUNỌ to osìn otò he Binyẹn bo sọ sù tọn dọ̀n wá ota yetọn, yèdọ ahọlu Assylia tọn po gigo etọn lẹ po: 8E na sọ jugbọn ṣẹnṣẹn Juda tọn; é na sà ṣinyọn e ji, é na hẹn ẹn jẹ okọ̀, dindlẹn awà etọn tọn na gọ́ dògbo aigba towe tọn, hiẹ, Emmanuẹl.

9Mì bẹ́ míde pli, mì gbẹtọ lẹ, yè na sọ gbà mi gbidigbidi; mì dotóai, mì he sọn otò dindẹn mẹ lẹpo; mì bla gbajana míde, yè na sọ gbà mì gbidigbidi. 10Mì nọpọ́ blanú; é na sọ lẹzùn nuvọ; mì dọhó lọ, é ma na nọte: na Jiwheyẹwhe tin po mí po. 11Na OKLUNỌ dọ le hlan mi, gbọn alọ sìnsinyẹn mẹ; bo sọ plọ́n mi na yẹn ma na do zinzọnlin to aliho omẹ helẹ tọn ji, dọ, 12Mì ylọ ehe Àlẹnu he omẹ helẹ ylọ Alẹnu blo; mọ mì dibuna obu yetọn blo, mì sọ savo de blo. 13Klan OKLUNỌ awhànpa lẹ tọn lọsu do wiwe, na ewọ ni yín osí mítọn, bo sọ yín avosisa mítọn. 14Ewọ na sọ tin na ofi wiwe, ṣigba na ozánnu agbali tọn, podọ na owàn ylando tọn, hlan owhé Islaeli tọn awe lẹ, na ogẹ́ po omọ̀ po hlan gbẹtọ Jelusalẹm tọn lẹ. 15Susu to yé mẹ na klẹnafọ bo jai, yè na gbà yé, yè na domọ̀na yé, bo sọ wle yé.

16Mì bla alènuhó lọ, yí hiadonu do tlẹ osẹ̀n lọ to ṣẹnṣẹn nuplọntọ ṣie lẹ tọn. 17Yẹn na sọ nọte pọ́n OKLUNỌ he yí nukun etọn whla sọn owhé Jakob tọn gbè go, yẹn na sọ to nukundo ali nẹ̃. 18Dayi e go, yẹn po ovi he OKLUNỌ na mi lẹ po tin na ohia, podọ na azọ́n jawu to Islaeli, sọn OKLUNỌ awhànpa lẹ tọn si, he nọnó osó Ziọni tọn ji.

19Whenuena yé na dọ hlan mì dọmọ, mì din yé he tindo gbigbọ odọ̀di tọn lẹ, po owọ́ntọ he to awhádo, bo sọ to hùnhlun lẹ po: bé é ma jẹ na gbẹtọ ni din Jiwheyẹwhe yetọn hú dọ yé he to ogbẹ̀ lẹ ni to oṣiọ din? 20Na osẹ́n po alènuhó po: eyín yé ma dọ kẹdẹdi ohó he, na hinhọ́n ma tin to yé mẹ wutu wẹ. 21Yé na sọ jugbọn ṣẹnṣẹn etọn, to awusinsinyẹn po hùvẹ́ po mẹ: enẹ godo, whenuena hùvè na hù yé, yé na nọ fìẹ, yé na sọ nọ hodẹ̀do ahọlu yetọn po Jiwheyẹwhe yetọn po, bo na sọ to aga pọ́n. 22Yé na nọ pọ́n aigba: dayi e go, tukla po zinvlu po, wunvì núhiha tọn: yè na sọ yàn yé do zinvlu mẹ.

Currently Selected:

ISAIA 8: BWL23

Highlight

Copy