ISAIA 41
41
1MÌ nabọẹ to nukọn ṣie, mì olòpo emi; bo sọ gbọ gbẹtọ lẹ ni vọ́ huhlọn yetọn jlado: gbọ yé ni sẹ́wá, whenẹnu wẹ ye ni dọhó: gbọ mí ni nọpó sẹwá na whẹ̀dida. 2Mẹnu wẹ zé gbẹtọ dódónọ fọ́n sọn owhezizẹ dali wá, bo ylọ ẹ do afọ etọn go, bo yí akọta lẹ na ẹn to nukọn etọn, bo sọ yí do dugán do ahọlu lẹ ji? é jó yé na ohí etọn di kọ́gudu podọ di nuyọ he yè fú hlan ogá etọn. 3E jẹmọna yé, bo juyì jijọho; yèdọ gbọn aliho he ewọ ma ko yí afọ etọn tùnai te gbède. 4Mẹnu wẹ da ẹ bo sọ basi i, bo to whẹndo lẹ ylọ sọn whẹwhẹwhenu gbọn? Yẹn OKLUNỌ wẹ; omẹ tintan, podọ gọ́na godotọ, yẹn lọ wẹ. 5Olòpo lẹ mọ ẹn, bo dibu; adozinnúdo opòdo aigba tọn lẹ; yé sẹ̀pọ́, bo sọ wá. 6Mẹdopodopo gọalọna kọmẹnu etọn: mẹdopodopo dido hlan nọvisunnu etọn, dọmọ, Mì wlekli. 7Mowẹ atinpatọ to tùdohomẹna sika yawàtọ, mẹhe yí ogọ̀mẹ do to jijla ẹ do, to tùdohomẹna mẹhe to núli dòzún ji; dọmọ, E wleawu na titlẹ, é sọ yí húngàn do whè e, na é ma na do sẹ́tẹn.
8Ṣigba hiẹ Islaeli, devi ṣie; Jakob mẹhe yẹn ko dè, okún Ablaham, họntọn ṣie tọn 9Mẹhe yẹn hẹn sọn opòdo aigba tọn, bọ yẹn sọ ylọ we sọn omẹ gángán finẹ lẹ tọn de, bo sọ dọ hlan we, dọmọ, Hiẹ wẹ devi ṣie; yẹn ko dè we, yẹn ma zé we dlangbé gba. 10A dibu blo; na yẹn tin po hi po: adòyanú wẹ blo: na yẹn wẹ Jiwheyẹwhe towe: yẹn na na huhlọn we; yẹn na gọalọna we; nugbo, yẹn na yí adusilọ ṣie dódó tọn do zé we daga. 11Dayi e go, mẹhe gblehomẹ do ogo wẹ lẹpo na mọwinyan: yé na sọ flu; yé na taidi onú he ma tin; mẹhe to avùnho hẹ we lẹ na dọ̀n. 12A na din yé, a ma yé na mọ, yedọ yé he wọhẹ we lẹ: mẹhe to awhànfun hẹ we lẹ na taidi onú he ma tin, podọ di nuvọtọ. 13Na yẹn OKLUNỌ Jiwheyẹwhe towe, na hẹn adusilọ towe go, bo na dọ hlan we dọ, A dibu blo; yẹn na gọalọna we. 14A dibu blo, hiẹ Jakob owán, podọ mì gbẹtọ Islaeli tọn lẹ; yẹn na gọalọna we, mọwẹ OKLUNỌ, Omẹflitọ towe dọ, Omẹ Wiwe Islaeli tọn lọ. 15Dayi e go, yẹn ko yí we do basi núzinzán dida yọ́yọ́ ozĩnhọ̀ tọn he do adú, hiẹ na zín osó lẹ, bo lì yé, bo sọ lẹ́ okota lẹ zùn ofló. 16Hiẹ na fú yé, jẹhọn na sọ zé yé yì, ahizi na vúnvún yé pé: hiẹ na sọ jaya to OKLUNỌ mẹ, bo sọ do gigo to Omẹ Wiwe Islaeli tọn lọ mẹ. 17Whenuena wamọnọ po agbatọnọ lẹ po to osìn din, bọ é ma tin, bọ odẹ́ yetọn hú na nugbla, yẹn OKLUNỌ na sè yetọn, yẹn Jiwheyẹwhe Islaeli tọn ma na gbẹ́ yé dai. 18Yẹn na hùn otọ̀ to ofi yìaga, podọ asisa to ṣẹnṣẹn agbàdo lẹ tọn; yẹn na diọ zùngbo zùn tándo osìn tọn, podọ aigba húhú zùn odò tòsisa tọn. 19Yẹn na do atin kedle tọn do zùngbo mẹ, atin akakia tọn, atin mylte tọn, po atin oliviẹli tọn po; yẹn na do atin kiple tọn, po atin olme tọn po, po atin buisi tọn po dopọ́ to ozùn mẹ. 20Na yé nido mọ, bo yónẹn, bo lẹnnu, bo tunwun dopọ́, dọ alọ OKLUNỌ tọn wẹ basi ehe, podọ Omẹ Wiwe Islaeli tọn lọ wẹ da ẹ.
21Mì hẹn owhẹ́ mitọn jẹgbonu, wẹ OKLUNỌ dọ, mì hẹn linlẹn sinsinyẹn mitọn jẹgbonu wá, wẹ Ahọlu Jakob tọn dọ. 22Gbọ yé ni hẹn yé jẹgbonu, bo yi onú he na jọ hia: gbọ yé ni yí onú hóhó tọn lẹ hia, onú he yé yín, na mí ni lẹn yé pọ́n, bo yọ́n pòdo yetọn; kavi na yé ni dọ onú hẹ ja lẹ hlan mí, 23Do onú he ja to ehelẹ godo hia, na mí nido yónẹn dọ yẹwhe wẹ mì nugbo; mì wàdagbe, kavi mì wà ylanylan, na obú nido di mí, na mí ni mọ ẹn dopọ́. 24Dayi e go, nuvọ́ mẹ tọn wẹ mi azọ́n mitọn sọ yín nuvọ́ mẹ tọn: osùnú de wẹ mẹhe dè mì.
25Yẹn ko zé omẹ dopo doaga sọn agéwaji, ewọ na sọ wá: sọn whezizẹ wẹ ewọ na dawhá ylọ oyín ṣie: é na sọ wá Ahọvi lẹ Ji di do kóyìnyan ji, podọ dile zẹnmẹtọ nọ yàn okò do. 26Mẹnu wẹ ko dohia sọn whẹwhẹwhenu, na mí nido yọ́nẹn? podọ sọn hóhó whenu, na mí nido dọ dọmọ, Dódónọ wẹ ewọ? nugbo, mẹhe sọhia de ma tin, nugbo, mẹhe dọ ẹ de ma tin, nugbo, mẹhe sè ohó mitọn lẹ de ma tim 27Tintan yẹn na dọ hlan Ziọni dọmọ, Pọ́n, pọ́n yé; podọ yẹn na na Jelusalẹm omẹ dopo de he hẹn wẹndagbe wá. 28Na yẹn pọ́n, mẹde ma tin; yèdọ to ṣẹnṣẹn yetọn, hónamẹtọ de ma tin, whenuena yẹn kanbiọ, mẹhe sọgan yigbè ohó de tọn ma tin. 29Dayi e go, onú yaya tata wẹ yé omẹ po; nuvọ́ wẹ azọ́n yetọn: jẹhọn po onú wluwlu po wẹ boṣiọ yetọn lọ.
Currently Selected:
ISAIA 41: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.