ISAIA 42
42
1PON devi ṣie, mẹhe yẹn gọalọna, mẹvivẹ ṣie, mẹhe go homẹ ṣie hún do; yẹn ko yí gbigbọ ṣie do e ji: ewọ na sọ hẹn whẹ̀dida jẹgbonu wá na Kosi lẹ. 2Ewọ ma na dawhá, mọ é ma na zé ogbè yìaga, mọ é ma na dike yè ni sè ogbè etọn to tòhòmẹ. 3Ofán gbigbà wẹ ewọ ma na wẹ́n, osékan he to azọ̀ti wẹ ewọ ma na ṣi: é na sọ hẹn whẹ̀dida wá to nugbo mẹ. 4Onú ma to na dikọ nẹ̃, mọ ewọ ma to na fiọhomẹ, kaka é na do zé whẹ̀dida dai to aihọn mẹ: olopo lẹ na sọ nọtepọ́n osẹ́n etọn. 5Le wẹ OKLUNỌ dọ, ewọ mẹhe da olọn, bo sọ dlẹn yé jẹgbonu; ewọ mẹhe tẹ́ aigba po onú he sọn é mẹ wá lẹ po; ewọ mẹhe na gbọfufu mẹhe tin to e ji lẹ, podọ gbigbọ hlan mẹhe to zọnlinzin to e mẹ lẹ. 6Yẹn OKLUNỌ wẹ ylọ we to dódó mẹ, yẹn na sọ hẹn alọ towe go, bo na yí we whla, bo yí we do basi alẹnu gbẹtọ lẹ tọn, hinhọ́n kosi lẹ tọn de; 7nado hùn nukunna nukuntọ́nnọ lẹ, nado hẹn ogàntọ lẹ tón sọn gànwhé, po mẹhe sinai to zinvlu mẹ lẹ po sọn gànhọ́ mẹ. 8Yẹn wẹ OKLUNỌ; ehe wẹ oyín ṣie: gigo ṣie wẹ yẹn ma na jó na mẹdẽvo, mọ yẹn ma na jó pipa ṣie na boṣiọ pipa lẹ. 9Dayi go onú hóhó tọn lẹ ṣẹ, onú yọ́yọ́ to didọ; whẹpo yé na jẹgbonu yẹn ko dọhó yetọn na mi.
10Mì jihàn yọ́yọ́ man OKLUNỌ, pipa etọn sọn pòdo aigba tọn, mi mẹhe to tejẹ jei ohù mẹ lẹ, po onú he tin to é mẹ lẹ po: olopo po mẹhe to é mẹ lẹ po. 11Gbọ zúngbo po otòdaho etọn lọ po ni ze ogbè yetọn doaga, ogbéta he mẹ Kedali nọnọ̀: gbọ mẹhe to osó mẹ lẹ ni jihàn, gbọ yé ni jaya sọn osó ji aga. 12Gbọ yé ni na gigo OKLUNỌ, bo do pipa etọn hia to olopo lẹ mẹ. 13OKLUNỌ na tón di gbẹtọ asuka de, é na fọ́n awúwhinwhan doaga di awhànfuntọ de: é na dawhá, yèdọ é na li; é na gbawhàn kẹ̀ntọ etọn lẹ tọn. 14Hóhó wẹ yẹn ko donù abọẹ; yẹn nọte abọẹ, bo wúnkada na dẽ: dinvie yẹn na dawhá di yọnnu he to ajipanu, yẹn na hùsúdo, bo sọ bẹ́ dù whladopo. 15Yẹn na gbà osó po okọta po kija, bo sọ hẹn omú yetọn lẹpo hú; yẹn na hẹn otọ̀ zùn aigba húhú, bo sọ hẹn avúndoe lẹpo hú. 16Yẹn na hẹn nukuntọ́nnọ lẹ gbọn aliho he yé ma yónẹn ji; yẹn na plan yé gbọn omọ́ he yé ma ko yónẹn dai ji; yẹn na hẹn zinvlu zùn hinhọ́n to nukọn yetọn; podọ onú gbingbán zùn jijlọ. Onú helẹ wẹ yẹn na basi na yé, yẹn ma na gbẹ́ yé dai. 17Yè na gọ̀ mẹhe dotudo boṣiọ pipa go lẹ do godo, yè na dowinyan yé talala, yé mẹhe to didọ na boṣio kinkọ́n dọ, Míwlẹ wẹ yẹwhe mítọn.
18Mì sè, mì tókúnọ lẹ, bo sọ pọ́n, mì nukuntọ́nnọ lẹ, na mì nido mọ. 19Mẹnu wẹ nukuntọ́nnọ, adavo devi ṣie, kavi tókúnọ di mẹdagun ṣie he yẹn dohlan? mẹnu wẹ nukuntọ́nnọ di ewọ he yín pipé? bo sọ tónnukun di devi OKLUNỌ tọn. 20To onú susu mimọ mẹ, ṣigba hiẹ ma dayi e go; to otó húnhún mẹ, ṣigba ewọ ma sè. 21Homẹ OKLUNỌ tọn vivi talala na dódó etọn wutu; ewọ na zé osẹ́n daga, bo sọ hẹn ẹn zùn yẹyinọ. 22Ṣigba mẹhe yè jẹajo do, bo sọ bẹ́ agbàn etọn wẹ ehe: yé omẹ pó wẹ yè yí omọ do wle to odò mẹ, yè sọ yí yé whla do ogànhọ̀ mẹ: yè jó yé na nuyanwẹnna, mẹde ma sọ whlẹn yé; yè jó yé na ogbànna, mẹde ma sọ dọmọ, Hẹn ẹn gọ̀ 23Mẹnu wẹ tin mì ṣẹnṣẹn he na na otó hlan ehe? he na tùntóai bo sọ sè na ojlẹ lọ he ja? 24Mẹnu wẹ jó Jakob na ogbànna, bò sọ jó Islaeli na ajotọ lẹ? bé é ma yín OKLUNỌ wẹ, mẹhe go mí wà ylankan do? na yé ma jlo na zinzọnlin to aliho etọn ji, yé ma sọ yín tónusètọ hlan osẹ́n etọn. 25Enẹwutu wẹ é do kọ̀n adi homẹgble etọn tọn do e ji, po huhlọn awhàn tọn po: é ko dozò e lẹ́do, ṣigba ewọ ma yónẹn; é mọ́ ẹ, aigba ewọ ma yí i do ayiha mẹ.
Currently Selected:
ISAIA 42: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.