ISAIA 40
40
1MÌ miọnhomẹna omẹ ṣie lẹ, mì miọnhomẹna yé, wẹ Jiwheyẹwhe mitọn dọ. 2Mì dọ ohó homẹmiọn tọn hlan Jelusalẹm, bo dawhá hlan ẹn, dọ awhànfunfun etọn vọ̀, yè sọ jó ylando etọn nẹ̃ na é ko mọyí do ogbẹ́awejì sọn alọ OKLUNỌ tọn mẹ na ylando etọn lẹpo.
3Ogbè mẹde tọn he to awhádo to zùngbo mẹ, dọ, Mì jla aliho OKLUNỌ tọn do, mì basi aligbó jijlọ to ozùnmẹ na Jiwheyẹwhe mítọn. 4Tándò lẹpo wẹ yè na zé doaga, osó po okọta lẹ po wẹ yè na zín do odò: gbingbán wẹ yè na hẹn jlọ, ofi he jẹ pódedòde wẹ yè na hẹn zùn tité. 5Yè na do gigo OKLUNỌ tọn hia, agbasa lẹpo wẹ na mọ ẹn dopọ: na onù OKLUNỌ tọn wẹ dọ ẹ. 6Ogbè lọ dọmọ, Dawhá. Ewọ sọ dọmọ, Awhá tẹwẹ yẹn na do? Agbasa lẹpo wẹ ogbé gigo etọn lẹpo sọ taidi vòvó danji tọn. 7Ogbé nọ yọ, vòvó nọ kupẹ́: na gbigbọ OKLUNỌ tọn ko yìn do e go wutu, nugbonugbo ogbé wẹ gbẹtọ 8Ogbé nọ yọ́, vòvó sọ nọ kupé: ṣigba ohó Jiwheyẹwhe mítọn tọn na to ote kakadoi.
9Hiẹ wẹ̀ndagbenọ Ziọni tọn, hẹ́ osó daho ji aga yì; hiẹ wèndagbenọ Jelusalẹm tọn, zé ogbè towe doaga po huhlọn po: zé e doaga, a dibu blo; dọ hlan otò Juda tọn dọ, Mì pọ́n Jiwheyẹwhe mitọn. 10Dayi e go, OKLUNỌ Jiwheyẹwhe na wá po alọ sinsinyẹn po, awà etọn na dugán nẹ̃: dayi e go, ale etọn tin to e si, ahọsuyí etọn tin to nukọn etọn. 11Ewọ na yìn kanlinpa etọn di lẹngbọhọtọ de: é na sọ yi awà etọn do bẹ́ lẹngbọvu lẹ pli, bo zé yé do akọ́n etọn nu, bo sọ wà dẹ̃dẹ do plan ehe mọhò lẹ jegbonu.
12Mẹnu wẹ ko jlẹ osìn to alọpàhòmẹ etọn mẹ, bo yí alọ do jlẹ olọn, bo bẹ́ kọ́gudu aigba tọn pli do jlẹnu mẹ, bo jlẹ osó lẹ to nujlẹgàn ji; podọ okọta lẹ to nujlẹnu mẹ? 13Mẹnu wẹ ko hìali gbigbọ OKLUNỌ tọn, kavi bo yín hónamẹtọ etọn, bo plọn ẹn? 14Mẹnu wẹ é nọ lẹnnu hẹ, mẹnu wẹ plọnnu in, bo plọ́n ẹn to aliho whẹ̀dida tọn mẹ, bo plọ́n ẹn nuyọnẹn, bo sọ yí ali zìnzìn tọn hia ẹ? 15Dayi e go, akọta lẹpo taidi kùnkùn osìn tọn dopọ to osìn tòzẹ́n mẹ tọn mẹ, yè sọ hia yé di kọ́gudu vude to nujlẹnu mẹ; dayi e go, ewọ sọ to olopo lẹ zé di onú pẹvide. 16Libani ma sù mimẹ̀, mọ kanlin etọn lẹ ma sọ sù nado yí do sánvọ́ mimẹ̀. 17Akọta lẹpo wẹ di nuvọ́ to nukọn etọn; yè sọ hia hlan ẹn whèhu onú he ma tin, nuvọtọ. 18Mẹnu go wẹ mì na jlẹ Jiwheyẹwhe do? Kavi apajlẹ tẹwẹ mì na do jlẹte hẹ ẹ? 19Anawàtọ pà boṣiọ, ayáwàtọ sika tọn kọ̀n sika ṣinyọn e ji, bo sọ slo fataka gẹdẹ. 20Mẹhe yín wamọnọ sọmọ bọ é ma tindo núnina, dè atin he ma na yọ̀n; é to anawàtọ nuyọnẹntọ din na ede nado pà boṣiọ pipa he yè ma na diọtẹn na. 21Míwlẹ ma ko yọnẹn? míwlẹ ma ko sè? yè ma ko dọ na mì sọn whẹwhẹwhenu? bé mì ma ko tunwun sọn dòdo aihọn tọn gbọ̃n? 22Ewọ wẹ mẹhe sinai to lòboto aigba tọn ji, yé omẹ he tin to é me lẹ taidi agànma; mẹhe tá olọn di onú tita, bo sọ dlẹn yé di ogòhọ na nọnọ̀ a mẹ; 23Mẹhe hẹn ahọvi lẹ zùn nuvọ́, é basi whẹ̀datọ aihọn mẹ tọn lẹ di nutata. 24Nugbo, yè ma na do yé; nugbo, yè ma na húnhún yé: nugbo, atin yetọn ma na hẹn adóai: é na yìn do yé go, ye na fìọ, aliizi na sọ bẹ́ yé yì di nuyọ. 25Bé mẹnu go wẹ mì na jlẹ mi do, kavi mẹnu wẹ yẹn na sọzẹn hẹ́? wẹ Omẹ Wiwe lọ dọ. 26Zé nukun mitọn doaga, bo pọn, mẹnu wẹ da onú helẹ, bo so hẹn awhàn sọhasọha yetọn jẹgbonu: e nọ ylọ oyín yetọn dopodopo gbọn kiklo huhlọn etọn tọn dali, na ewọ sinyẹn to huhlọn mẹ; depope ma pò.
27Etẹwutu wẹ hiẹ to didọ, Hiẹ Jakob, bọ hiẹ sọ to didọ, Hiẹ Islaeli, dọ, Aliho ṣie whla sọn OKLUNỌ de, whẹ̀dida ṣie sọ jù sọn Jiwheyẹwhe ṣie de? 28Hie ma ko yónẹn? Hiẹ ma ko sè, dọ Jiwheyẹwhe madopodo, OKLUNỌ, Nudatọ aigba pòdo lẹpo tọn mọ nọ yọ́n nudikọ mọ onú ma nọ dikọ nẹ̃? dòmọna zìnzìn etọn tọn ma tin. 29E to huhlọn na mẹhe núsikọna lẹ; bo sọ do huhlọn é ji na ewọ he ma do huhlọn lẹ. 30Yèdọ onú na sikọna depẹ lẹ, yọ̀pọ sunnu lẹ na jai gbidigbidi. 31Ṣigba mẹhe nọtepọ́n OKLUNỌ lẹ na vọ́ huhlọn yetọn jlado; yé na yí awà do hẹ́ aga di akùn; yé na dowezun, onú ma na dikọna yé; yé na zinzọnlin, bo ma na yón nudikọ.
Currently Selected:
ISAIA 40: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.