ISAIA 22
22
1AGBÀN agbàdo númimọ tọn.
Etẹ wẹ wà we dinvie, bọ hiẹ do hẹji yì họ̀ta patapata. 2Hiẹ mehe gọ́ na zìngidi, otò magbọjẹ nọ, otò homẹvìvi tọn: yè ma yí ohi do hù sunnu towe lẹ, mọ yé ma si to awhàn. 3Ogán towe lẹ ko zọ̀npó họ̀n yì, gayìntọ lẹ ko bla ye do gòkànmẹ: mẹhe yè mọ to ohò towe mẹ lẹpo wẹ yè bla pli, he họ̀n sọn aganu wá. 4Enẹwutu wẹ yẹn domọ, dè nukun sẹ́ sọn ogo e, yẹn na viavi vivẹ́, a jẹtukla nado miọnhomẹna mi blo, na hẹngble viyọnnu omẹ ṣie lẹ tọn tọn wutu. 5Na azán tukla tọn wẹ, zindai tọn, po magbọjẹ po tọn, gbọn OKLUNỌ Jiwheyẹwhe awhànpa lẹ tọn si to agbàdò númimọ tọn mẹ, é to odokọ lẹ họ́ liai, bo sọ to awhádo hlan osó lẹ. 6Elami hẹn ogò po kẹkẹ gbẹtọ tọn po, po osọ́nọ tọn po, Kili sọ hùn sagba dai. 7To enẹ godo, agbadò towe he yónwhanpẹ lẹ na gọ́ na kẹkẹ, osọ́nọ lẹ na sọ tẹ́ awhàn dai to dokọnu họ́ngbó ji, 8Ewọ mọ nùsú Juda tọn, hiẹ sọ pọn to azán lọ gbè ogbaja owhé zùngbo mẹ tọn. 9Mì ko sọ mọ núvọ́ otò Davidi tọn tọn ga, dọ yé sù: mìwlẹ sọ dọ̀n osìn tándo mẹ ton he to odò pli. 10Mì ko hia owhé Jelusalẹm tọn ga, owhé ewẹlẹ wẹ mì họ zindai nado hẹn odòkọ sinyẹn. 11Mì ko sọ kùn odòkodò to odokọ awe ṣẹnṣẹn na osìn tándo hóhó tọn: ṣigba mì ma pọ́n ewọ mẹhe wàzọn etọn, mọ mì ma ho mẹhe basi i to hóhówhenu pọ́n. 12To azán lọ gbè wẹ OKLUNỌ, Jiwheyẹwhe awhànpa lẹ tọn na ylọ nado viavi, nado blawu, podọ nado lùn odà, podọ nado bla odẹ́vọ̀ do ogo: 13bo dayi e go, homẹhùnhùn po ayajijẹ po, hùhù oyìnsú tọn, po hùhù lẹngbọ tọn po, dùdù olàn tọn, po nùnù vẹ̃nhàn tọn po: mì gbọ mi ni to dùdù, bo sọ to nùnù, na, osọ̀ wẹ mí na kú. 14OKLUNỌ awhànpa lẹ tọn dọ do otó ṣie mẹ, dọ, Nugbo, yè ma to na klọ ylando he sẹ́ sọn mì go kaka mì nado kú, wẹ OKLUNỌ awhànpa lẹ tọn dọ.
15Le wẹ OKLUNỌ Jiwheyẹwhe awhànpa lẹ tọn dọ, dọmọ, Yì, tọn yì nugopọntó he de, yèdọ jẹ Sebna de, he yín owhétọ, 16bo dọmọ, etẹ wẹ a tindo to ofi? podọ mẹnu wẹ hiẹ tindo to ofi, bọ hiẹ do kùn yọ̀whé de do ofi, di mẹhe kùn yọ̀whé na ede to aga, bọ a sọ kùn nọtẹn na dewe to awinyan mẹ? 17Dayi e go, OKLUNỌ na yí mẹglọnọ sinsinyẹn do dida we sọ yì, é na sọ Ṣinyọnnúdo we. 18Nugbo é na lẹ́ bo sọ yí we do yinwhán di onú mimlin do otò daho de mẹ; finẹ hiẹ na kú te, podọ finẹ wẹ kẹkẹ gigo towe tọn na yín winyan owhé OKLUNỌ towe gbè tọn. 19Yẹn na yàn we sọn otẹn towe mẹ, é na sọ dọ̀n we liai sọn nọten towe mẹ. 20To enẹgodo to azán lọ gbè wẹ yẹn na ylọ devi ṣie Eliakimi ovi Hilkia tọn: 21yẹn na sọ yí avọ̀ towe ṣinyọnna ẹn, bo na yí gbaja towe bla nẹ, yẹn na yí ahọludu towe do alọ etọn mẹ: é na sọ yín otọ́ na Jelusalẹm-nu lẹ, podọ na owhé Juda tọn 22Yẹn na sọ yí họ̀nhùngàn owhé Davidi tọn tọn do abọ́ etọn ji; é na hùn, mẹde ma na sú; é na sú, mẹde ma na hùn. 23Yẹn na sọ whè e di húngàn do otẹn gángán mẹ; é na sọ tin na ofìn gigo tọn, na owhé otọ́ etọn tọn. 24Yé na yí gigo owhé otọ́ etọn tọn lẹpo pla okọ̀ nẹ̃, ovi po vikún po, núzinzán lẹpo, sọn núzinzán kọfo tọn, kaka jẹ núzinzán tánglan tọn lẹpo ji. 25OKLUNỌ awhànpa lẹ tọn dọmọ, tó azán lọ gbè wẹ yè na họ̀n húngàn he yè whè to otẹn gángán mẹ sẹ̀, yè na sán ẹn liai, é na sọ jai, agbàn he tin to é ji wẹ yè na sọ sán sẹ́: na OKLUNỌ ko dọ ẹ.
Currently Selected:
ISAIA 22: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.