Eksọdusi 9

1WHENẸNU wẹ OKLUNỌ dọ hlan Moṣe, dọ, Biọ hònmẹ yí Falo de, bo dọ né, Le wẹ OKLUNỌ dọ, Jiwheyẹwhe Heblu lẹ tọn, Gbọ omẹ ṣie lẹ ni yi, na yé nido sén mi. 2Na eyín hiẹ gbé nado gbọ yé ni yì, bo na hẹn yé go jànwẹ, 3dayi e go, alọ OKLUNỌ tọn tin to kanlinyìnyìn towe he tin to danji lẹ go, to osó lẹ go, to kẹtẹkẹtẹ lẹ go, to kanklosọpóawenọ lẹ go, to omá lẹ go, to kanlinpa lẹ go: azónylankanylankan de na tin.

4OKLUNỌ na glọnali to kanlinyìnyìn Islaeli tọn po kanlinyìnyọ́ìn Egipti tọn po ṣẹnṣẹn: núde ma to na kú sọn ehe yín ovi Islaeli tọn tọn lẹpo mẹ. 5OKLUNỌ sọ do ojlẹ didè de, dọmọ, Osọ̀ OKLUNỌ na wà onú he to aigba ji.

6OKLUNỌ sọ wà onú nẹ to aihọngbè, kanlinyìnyìn Egipti tọn lẹpo kú: ṣigba sọn kanlinyìnyìn ovi Islaeli tọn lẹ tọn mẹ wẹ ode ma kú te. 7Falo sọ domẹhlan, bo, dayi e go, é ma tin sọ dopo sọn kanlinyìnyìn Islaelinu lọ tọn mẹ he yín osiọ. Ṣigba ayiha Falo tọn yín adingbannọ, é ma sọ dike gbẹtọ ewlẹ ni yì gba.

8OKLUNỌ sọ dọ hlan Moṣe podọ hlan Aalon, dọ, Ba alọgogọ́ afín tọn hẹn sọn zòhọ̀ mẹ, bo gbọ Moṣe ni fú i hlan olọn to Falo nukunmẹ. 9E nasọ lẹzùn kógudu flinflin to aigba Egipti tọn lẹpo ji, é nasọ yín nutitẹ de he na yí lanwiwọ do wusìn to gbẹtọ go, podọ to kanlin go, lẹ́do aigba Egipti tọn lẹpo. 10Yé sọ yí afin zòhọ tọn, bo ṣite to Falo nukọn; Moṣe sọ fú i daga hlan olọn; é sọ lẹzùn nutitẹ de he yí lanwiwọ do wusìn to gbẹtọ go, podọ to kanlin go. 11Nújlẹtọ lẹ ma sọgan site to Moṣe nukọn gba na nutitẹ lẹ wutu; na nutitẹ lẹ tin to nújlẹtọ lẹ go, podọ to Egiptinu le go. 12OKLUNỌ sọ hẹn ayiha Falo tọn sinyẹn, é ma sọ tùntóai hlán yé gba; dile OKLUNỌ ko dọhó hlan Moṣe do.

13OKLUNỌ sọ dọ hlan Moṣe, dọ, Fọ́n to afọnnufù, bo site to Falo nukọn, bo dọ hlan ẹn, dọ, Le wẹ OKLUNỌ dọ, Jiwheyẹwhe Heblu lẹ tọn, Gbo omẹ ṣie lẹ ni yi, na yé nido sẹ́n mi. 14Na yẹn to ojlẹ he mẹ na do azònylankan ṣie lẹpo hlan aigba towe ji, podo hlan devi towe lẹ ji, podọ hlan omẹ towe lẹ ji; na hiẹ nido yónẹn dọ mẹde ma tin di yẹn to aigba lẹpo mẹ. 15Na dinvie wẹ yẹn ko dè alọ ṣie tọ́n bo yí azònylankan do hò hiẹ po omẹ towe lẹ po, hiẹ ko sọ yín mẹsinsan sẹ̀ sọn aigba mẹ: 16ṣigba tò zìnzán lọ me na ehe tọn wutu wẹ yẹn hẹn we nado ṣite, nado do huhlọn ṣie hia we, podọ na oyín ṣie nido yín lìla lẹ́do aigba lẹpo ji 17Jẹ dinviehiẹ gbẹ́ sọ to dewe zé daga do ome ṣie lẹ ji, bọ hie ma na do gbọ yé ni yi? 18Dayi e go, to osò to ojle he me yẹn na hẹn ẹn nado ja okẹnsu susu di jikun, ehe hunkọ ma ko tin to Egipti sọn whenu yè ko do é ai yèdọ kaka jẹ dinvie. 19Enẹwutu dinvie, domẹhlan, yawu bo bé kanlin-yìnyìn towe lẹ wá owhé po onú he a tindo to danji lẹpo po; na gbẹtọ po whékanlin depope po he yè mọ to danji, bọ yè ma na hẹn wá whégbè, okẹnsu na jẹte wá yé ji, yé na sọ kú.

20Ewọ he dibúna ohó OKLUNỌ tọn to devi Falo tọn lẹ mẹ hẹn devi etọn lẹpo kanlinyìnyìn etọn lẹ po hòn biọ ohò lẹ mẹ: 21ewọ he ma ho ohó OKLUNỌ tọn pọ́n jo devi etọn lẹ po kanlinyìnyìn etọn lẹ po do danji.

22OKLUNỌ sọ dọ hlan Moṣe, dọ, Dlẹn alọ towe jẹgbonu hlan olọn, na okensu nido tin to aigba Egipti tọn lẹpo ji, to gbẹtọ go, podọ to whékanlin go, podọ to omá danji tọn lẹ go, lẹ́do aigba Egipti tọn.

23Moṣe sọ dlẹn opò etọn jẹgbonu hlan olọn OKLUNỌ sọ do ósò po kẹnsu po hlan, miyọn sọ hònwezun jete do aigba ji; OKLUNỌ sọ ja okẹnsu di jikun do aigba Egipti tọn ji. 24Mowẹ okensu tin, bọ miyọn flusọ okẹnsu lọ, é sù gbahú, ehe hunkọ ma ko tin to aigba Egipti tọn lẹpo ji sọn whenu é ko lẹzùn akọta de. 25Okẹnsu lọ sọ hò núhe tin to danji lẹpo gbẹtọ po whékanlin po lẹ́do aigba Egipti tọn lẹpo, bo sọ wén atin he to danji lẹpo. 26Aigba Gosẹni tọn ji fie ovi Islaeli tọn lẹ te kẹdẹ, wẹ okẹnsu de ma te.

27Falo sọ domẹhlan, bo ylọ Moṣe po Aalon po, bo dọ hlan yé, dọ, Yẹn ko wàylando to ojlẹ he mẹ: dódónọ wẹ OKLUNỌ, yẹn po omẹ ṣie lẹ po wẹ mẹylankan. 28Vẹ́ OKLUNỌ; na osò po okẹnsu huhlọnnọ helẹ po ko pó; yẹn na sọ gbọ mìwlẹ ni yì, mì ma na sọ nọte dindẹn gba. 29Moṣe sọ dọ hlan ẹn, dọ, Plaun le yẹn tón ja sọn otò mẹ, yẹn na té alọ ṣie lẹ jegbonu hlan OKLUNỌ; osò na doalọte, mo okẹnsu de ma na sọ tin ba; na hie nido yónẹn dọ OKLUNỌ tọn wẹ aigba. 30Ṣigba na hiẹ po devi towe lẹ po, yẹn yónẹn do mì ma to na dibúna OKLUNỌ Jiwheyẹwhe jãnwẹ.

31Yè hò sekantin po gbado bale po: na gbado bale tin to oflo mẹ, sekantin sọ yín sẹ́gba. 32Ṣigba olikún po gbado lie po Wẹ yè mahò: na yé ma ko yín whin whén gba.

33Moṣe sọ tónyì sọn otò mẹ sọn Falo de, bo tó alọ etọn lẹ jẹgbonu hlan OKLUNỌ, osò lẹ po kẹnsu po doalọte, yè ma sọ kòn jikun do aigba ji ba. 34Whenuena Falo mọ dọ yè hẹn jikun po kẹnsu po, po osò lẹ po dote, é sọ vó ylandowà, bo sọ hẹn ayiha etọn sinyẹn, ewọ po devi etọn lẹ po. 35Yè sọ hẹn ayiha Falo tọn sinyẹn, é ma sọ gbọ ovi Islaeli tọn lẹ ni yì gba; dile OKLUNỌ ko dọhó do gbọn Moṣe dali.

Currently Selected:

Eksọdusi 9: BWL23

Highlight

Copy