Eksọdusi 10

1OKLUNỌ sọ dọ hlan Moṣe, dọ, Yì họ̀nmẹ to Falo de: na yẹn ko hẹn ayiha etọn sinyẹn, po ayiha devi eton lẹ tọn po, na yẹn nido wà ohia ṣie helẹ to ṣẹnṣẹn yetọn: 2podọ na hiẹ nido dọ to otọ́ visunnu towe tọn lẹ mẹ, podọ to visunnu visunnu towe tọn lẹ tọn mẹ, núhe yẹn wà do Egipti go lẹ , po ohia he yẹn basi to ṣẹnṣẹn yetọn lẹ po; na míwlẹ nido yónẹn dọ yẹn wẹ OKLUNỌ.

3Moṣe po Aalon po sọ biọ họ̀nme yì Falo de, bo dọ hlan ẹn, dọ, Le wẹ OKLUNỌ dọ Jiwheyẹwhe Heblu lẹ tọn, Na é na dẹn sọ bọ hiẹ na do kọ́ nado huwhẹ dewe to nukọn ṣie? gbọ omẹ ṣie lẹ ni yì, na yé nido sẹ́n mi. 4E ma yín mọ, eyín hiẹ kọ́ nado gbọ omẹ ṣie lẹ ni yì, dayi e go, osọ̀ wẹ yẹn na hẹn owẹ́n lẹ biọ agbègbè towe mẹ: 5yé na ṣinyọn nukun aigba tọn ji, bọ mẹde ma na sọgan nado mọ aigba: yé na dù pipòtọ ehe yè pòdote tọn, ehe pò hlan we sọn okẹnsu de, bo na sọ dù atin depope he wu na we sọn danji: 6owhé towe lẹ wẹ yè na gọ́, po owhé devi towe lẹpo tọn lẹ po, po owhé Egiptinu lepo tọn lẹ po: di ehe hunkọ otọ́ towe lẹ kavi otọ́ otọ́ towe lẹ tọn ma ko mọ, sọn whenu yé ko tin to aigba mẹ kaka jẹ azán he gbè. Ewọ sọ lẹ bo tónyì sọn Falo de.

7Devi Falo tọn lẹ sọ dọ hlan ẹn, dọ, Na é na dẹn sọ bọ dawe he na do yín omó de hlan mí? gbọ gbẹtọ ewlẹ ni yi, na yé nido sẹ̀n OKLUNỌ Jiwheyẹwhe yetọn: bé hiẹ ma ko yónẹn jẹ dinvie dọ yè và Egipti?

8Yè sọ vọ́ Moṣe po Aalon po hen wá Falo de: ewọ sọ dọ hlan yé, dọ, Yì, són OKLUNỌ Jiwheyẹwhe mìtọn: ṣigba mẹnu wẹ yé he na yì? 9Moṣe sọ dọmọ, Mí po mẹflinflin mítọn lẹ po po mẹho mítọn lẹ po, po visunnu mítọn lẹ po po viyọnnu mítọn lẹ po, po kanlinpa mítọn le po po ogbọpa mítọn lẹ po, wẹ jei; na míwle mananọmawà de hlan OKLUNỌ gba. 10Ewọ sọ dọ hlan yé, dọ, Mowẹ OKLUNỌ ni tin po mì po, dile yẹn na gbọ mì ni yì do, po yọ̀pọ flinflin mìtọn lẹ po; mì payi e go; na oylan tin mì nukọn. 11Mọ ma wẹ gba: mì he yín sunnusi lẹ ni yì lè, bo sẹ́n OKLUNỌ; na enẹ wẹ núhe mì jlo. Yè sọ yàn yé tón sọn Fàlo nukọn. 12OKLUNỌ dọ hlan Moṣe, dọ, Dlẹn alọ towe tón do aigba Egipti tọn ji na owẹ́n lẹ, na yé nido hẹ́ji wá aigba Egipti tọn ji, bo dù omá aigba tọn, yèdọ ehe kẹnsu: o jodai lẹpo.

13Moṣe sọ dlẹn opò etọn tón do aigba Egipti tọnji, OKLUNỌ sọ hẹn jẹhọn whèzẹtẹn tọn wá aigba lẹpo ji to okle nẹ lẹpo, podọ to ozán lọ mẹ; whenuena é yín afọnnu, jẹhọn whèzẹtẹn tọn lọ hẹn owẹ́n lẹ wá. 14Owẹ́n lẹ sọ hóaga yì aigba Egipti tọn lẹpo ji, bo sọ jẹ́ do agbègbè Egipti tọn lẹ mẹ; susu wẹ yé; jẹnukọn na yé owẹ́n lẹ de ma ko tin di yetọn hunkọ, mọ to yetọn godo mọhunkọ tọn ma na tin. 15Na yé ṣinyọn nukun aigba tọn lẹpo ji, sọmọ bọ yè hẹn aigba dozinvlu; yé sọ dù omá aigba tọn lẹpo, po sinsẹ̀n atin le tọn lẹpo po he kẹnsu ko jodai le: onu omú de ma sọ pò, atin kavi omá danji tọn, lédo aigba Egipti tọn lẹpo.

16Whenẹnu wẹ Falo ylọ Moṣe po Aalon po plaun: é sọ dọmọ, Yẹn ko wàylando do OKLUNỌ Jiwheyẹwhe mìtọn, podọ do mìwlẹ. 17Enẹwutu dinvie, yẹn vẹ́ we, jo ylando ṣie na mi whladopo he kẹdẹ, bo vẹ́ OKLUNỌ Jiwheyẹwhe mìtọn, na é nido zé okú he yì sọn dẽ kẹdẹ.

18Ewọ sọ tónyì sọn Falo de, bo vẹ́ OKLUNỌ. 19OKLUNỌ sọ diọ jẹhọn gangan sinsinyẹn whèyihọ tọn, he zé owẹn lẹ yìaga, bo yàn yé biọ Ohù Vẹ mẹ; owẹn dopo ma pò to agbègbè Egipti ton lẹpo mẹ. 20Ṣigba OKLUNỌ hẹn ayiha Falo tọn sinyẹn, é ma sọ gbọ ovi Islaeli tọn lẹ ni yì gba.

21OKLUNỌ sọ dọ hlan Moṣe, dọ, Dlẹn alọ towe tón hlan olọn dali, na zinvlu nido tin to aigba Egipti tọn ji, yèdọ zinvlu he yè sọgan tónpón.

22Moṣe sọ dlẹn alọ etọn tón hlan olọn dali; zinvlu titli de sọ tin to aigba Egipti tọn lẹpo ji azán atọ̀n; 23yé ma mọ yenọzo, mọ mẹde ma tite sọn otẹn etọn mẹ họ̀ azán atón: ṣigba ovi Islaeli tọn lẹpo tindo hinhọ́n to fininò yetọn lẹ mẹ.

24Falo sọ ylọ Moṣe, bo dọmọ, Mì yì, sẹ́n OKLUNỌ; aigba gbọ kanlinpa mìtọn lẹ po gbọpá mìtọn lẹ po ni yín hẹndote: gbọ yọ̀pọ mìtọn lẹ ni yì hẹ mì ga. 25Moṣe sọ dọmọ, Hiẹ ma sọgan gòn ma na do alọ mítọn mẹ avọ́ lẹ po núnina mimẹ̀ lẹ po, na mí nido sánvọ́ hlan OKLUNỌ Jiwheyẹwhe mítọn. 26Kanlinyìnyìn mítọn lẹ ga na yì po mí po; yè ma na jo ofọ́n dopo do godo; na míwlẹ mananọma yí sọn e mẹ nado són OKLUNỌ Jiwheyẹwhe mítọn; mi ma sọ yón núhe mí mananọma yí do són OKLUNỌ, kaka mí na do jẹ dọn.

27Ṣigba OKLUNỌ hẹn ayiha Falo tọn sinyẹn, ewọ ma sọ jlo na gbọ yé ni yì. 28Falo sọ dọ hlan ẹn dọ, Bó dewe sọn dẽ, yí ayipipa na dewe, a sọ mọ nukunmẹ ṣie ba blo; na azán he mẹ hiẹ sọ mọ nukunmẹ ṣie te wẹ hiẹ na kú, 29Moṣe sọ dọmọ, Hiẹ ko dọhó dagbedagbe; Yẹn ma na sọ vó nukunmẹ towe mọ gbède ba gba.

Currently Selected:

Eksọdusi 10: BWL23

Highlight

Copy