2 SAMUẸLI 17
17
1HUMỌ Ahitofẹli dọ hlan Absalọmi dọmọ, Gbọ yẹn ni dè sunnusi fọtọ́n wiawe dinvie, yẹn bo na sọ tite bo domọna Davidi to godo to ozán he mẹ: 2Yẹn na sọ wá e ji whenuena ewọ yín alọ núdikọnanọ podọ madogannọ, bo na hẹn ẹn savọ̀: omẹ he tin to e de lẹpo na họ̀nyì; yẹn bo na sọ hò ahọlu lọ dopokẹdẹ: 3Yẹn bo na sọ hẹn gbẹtọ lẹpo gọ̀ wá de we: omẹ he hiẹ to dindin lọ tin di eyín popo ko lẹ́gọ̀: mọwẹ gbẹtọ lẹpo na sọ tin to jijọho. 4Didọ lọ sọ hẹnhomẹhùn Absalọmi dagbedagbe, po mẹho Islaeli tọn lẹpo po.
5Whenẹnu wẹ Absalọmi dọmọ, Ylọ dinvie Huṣai Alkinu lọ ga, bo gbọ mí ni sè mọga núhe é dọ. 6Whenuena yè sọ hẹn Huṣai wá Absalọmi de, Absalọmi dọhó hlan ẹn, dọmọ, Ahitofẹli ko dọhó di ehe nkọ: mí na wà di didọ etọn? eyín lala, hiẹ bo dọhó. 7Huṣai sọ dọ hlan Absalọmi dọmọ, Hónamẹ he Ahitofẹli na to ojlẹ he mẹ ma yín dagbe gba. 8Huṣai sọ dọ humọ, dọmọ, Hiẹ yón otọ́ towe po omẹ etọn lẹ po, dọ yé yín sunnu hlọnhlọnnọ, podọ yè ko dadihomẹna yé to ayiha yetọn mẹ, di ogbépọẹ de he yè fọ̀ ovi lẹ sọn e si to danji: podọ otọ́ towe sunnu awhàn tọn de wẹ, bo ma na dọpó po gbẹtọ lẹ po gba 9Dayi e go, yè whla ẹ dinvie do dògbògbé de mẹ, kavi do ofi devo de: é na sọ wá jọ, whenuena yè hẹn adade sọn yé mẹ jai, to tintan, wẹ mẹdepope he sè e na dọmọ, Hùhù de tin to omẹ he hodo Absalọmi lẹ ṣẹnṣẹn. 10Podọ yèdọ ewọ he yín adántọ, ayiha mẹhetọn tin di ayiha kinnikinni de tọn, na yé patapata: na Islaeli lẹpo yọnẹn dọ sunnu hlọnhlọnnọ de wẹ otọ́ towe, podọ mẹhe tin to e de lẹ omẹ adántọ wẹ yé. 11Ṣigba yẹn nahó dọ yè ni bé Islaeli lẹpo plidopọ do de we, sọn Dani yèdọ jẹ Beẹli-seba, di otọ̀kẹ́n he tin to ohù tó na gégé: podọ hiẹ ni yì awhànfuntẹn na dewe. 12Mọwẹ mí na wá e ji to ofi de fie yè na din in mọ te, míwlẹ na sọ jẹ́ e ji dile ahún nọ jà do aigba do: sọn e de podọ sọn omẹ etọn he tin to e de lẹpo de mí ma na pòdai susọ mọ di dopo gba. 13Humọ, eyín yè mọ ẹn biọ tòdaho de mẹ, whenẹnu wẹ Islaeli lẹpo na hẹn okàn lẹ wá tọ̀daho nẹ kọ̀n, míwlẹ na sọ dón ẹn biọ otọ̀ mẹ, kaka yè ma na din zannu pẹvi dopo mọ to finẹ gba; 14Absalọmi po omẹ Islaeli tọn lẹpo po sọ dọmọ, Hónamẹ Huṣai Alkinu lọ tọn yín pónte hú hónamẹ Ahitofẹli tọn. Na OKLUNỌ ko doai nado gbleawhàn hónamẹ dagbe Ahitofẹli tọn, hlan linlẹn lọ dọ OKLUNỌ nido hẹn oylan wá Absalọmi ji.
15Whenẹnu wẹ Huṣai dọ hlan Zedọki podọ hlan Abiatali yẹwhenọ lẹ lọ dọmọ, Le po le po wẹ Ahitofẹli nahó Absalọmi po mẹho Islaeli tọn lẹ po do; podọ le po le po wẹ yẹn ko nahómẹ do. 16Enẹwutu dinvie domẹhlan plaun bo dọ na Davidi, dọmọ, A dó tọ́pẹṣẹ zùngbomẹ tọn lẹ tọn tó to ozán he mẹ blo, ṣigba é bo to depope juyì gododọ̃n; ahọlu nikã yín zémì, po omẹ he tin to e de lẹpo po. 17Dinvie Jonatani po Ahimaazi po ṣite to En-lo gẹli dali; devisunnu de wẹ nọ yì bo dọ na yé; bọ yéwlẹ nọ yì bo dọ na Davidi ahọlu: na yè ni ma do mọ yé nado wá biọ tòdaho lọ mẹ. 18Ṣigba visunnu de mọ yé, bo dọ na Absalọmi: yé omẹ awe lẹ sọ yì plaun, bo wá owhé dawe de tọn gbè to Bahulimi mẹ, mẹhe tindo dòtọ̀ de to awlo etọn mẹ; yé sọ jẹte yì finẹ. 19Nawe lọ sọ yí bo tẹ́ núsúnú do onù dotọ lọ tọn ji, bo kàn gbadó ginglin do e ji; núde ma sọ yín yinyọnẹn. 20Mẹmẹsi Absalọmi tọn lẹ sọ wá nawe lọ de to owhé gbè; yé sọ dọmọ, Fie wẹ Ahimaazi po Jonatani po te? Nawe lọ sọ dọ hlan yé dọmọ, Yè hẹn yé tónyì aga asisa osìn tọn gododọ̃n. Whenuena yé ko din bo ma sọgan mọ yé, yé lẹ́gọ̀ do Jelusalẹm. 21E sọ wá jọ, whenuena yè hẹn yé fọ́nyì godo, wẹ yé tọ́n sọn dòtọ́ lọ mẹ wá aga, bo yì bo dọ na Davidi ahọlu; yé sọ dọ hlan Davidi dọmọ, Mì tite, bo juyì osìn gododọ̃n plaun: na le wẹ Ahitofẹli ko nahó do mì ji do. 22Whenẹnu wẹ Davidi tite, po gbẹtọ he tin to e de lẹpo po, yé sọ juyì Jọdani gododọ̃n: to afọnnu hinhọn damẹ, omẹ de ma pò sọn yé mẹ he yè ma họn yì Jọdani gododón. 23Whenuena Ahitofẹli mọ dọ yè ma hodo hónamẹ etọn gba, é blapàna kẹtẹkẹtẹ etọn, bo tite, bo yì owhé, hlan tòdaho etọn mẹ, bo do owhé etọn do gànji, bo sìn ede pla; ewọ sọ kú, yè sọ di i do olidò otọ́ etọn tọn mẹ.
24Whenẹnu we Davidi wá Mahanaimi. Absalọmi sọ juyì Jọdani gododọ̃n, ewọ po omẹ Islaeli tọn lẹpo po po e po 25Absalọmi sọ dè Amasa do awhànpa lọ ji to otẹn Joabi tọn mẹ. Dinvie visunnu dawe de tọn wẹ Amasa, oyín mẹhetọn yín Itla Islaelinu lọ, he biọ whégbè yì Abigali viyọnnu Nahasi tọn de, nọviyọnnu hlan Zelina onọ Joabi tọn. 26Islaeli po Absalọmi po dosla do aigba Gileadi tọn ji.
27E sọ wá jọ, whenuenayè ko hẹn Davidi wá Mahanaimi, wẹ Ẹobi visunnu Nahasi Labba tọn tọn sọn ovi Ammọni tọn lẹ mẹ, podọ Makili visunnu Ammiẹli Lodebali tọn tọn, po Balizilai Gileadinu po, 28Hẹn adọzan lẹ, po ẹlfelẹ lẹ po, po ozẹ́n lẹ po, po oli po, po bale po, po olinfìn po, po gbadó si-ọ po, po ayivi po, po apada po, po azíngbé sisọ́ po, 29Po owín po, po anọsìnhiho po, po lẹngbọ lẹ po, po yínnóadlọ po, wá, na Davidi, podọ na omẹ he tin to e de lẹ nado dù: na yé dọmọ, Gbẹtọ lẹ yín huvẹ́nọ, nudikọnọ, nùgblanọ, to Zùngbo mẹ.
Currently Selected:
2 SAMUẸLI 17: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.