2 SAMUẸLI 18
18
1DAVIDI sọ hia omẹ he tin to e de lẹ, bo dè awhàngán fọtọ́n lẹ tọn lẹ podọ awhàngán kanweko lẹ tọn lẹ do yé ji. 2Davidi sọ do gbẹtọ lẹ hlan gbonu, odá atọ̀ntọ de to alọ Joabi tọn glọ, odá atọ̀ntọ de to alọ Abisai tọn glọ, visunnu Zeluia tọn, nọvisunnu Joabi tọn, po odá atọ̀ntọ po to alọ Itai Gitinu tọn glọ. Ahọlu sọ dọ hlan gbẹtọ lẹ dọmọ, Yẹnlọsu na tọ́n yì ga po mì po nugbonugbo. 3Ṣigba gbẹtọ lẹ dọmọ, Hiẹ ma na tọn yì gba: na eyín míwlẹ họ̀nyì, yé ma to na jẹtukla na mí gba; kavi eyín dadawe mí tọn kú, yé ma na jẹtukla na mí gba: ṣigba hiẹ tin peakuẹsọ fọtọ́n ao mí tọn: enẹwutu dinvie é yín pọ̀nte dọ hiẹ ni tin gànji nado gọalọna mi sọn tòdaho lọ mẹ. 4Ahọlu sọ dọ hlan yé dọmọ, Núhe sọawuhiana mì yọnhú wẹ yẹn na wà. Ahọlu sọ ṣite to họ̀ngbo wàji, gbẹtọ lẹpo sọ to tintọ́n kanweko-kanweko po fọtọ́n-fọtọ́n po. 5Ahọlu sọ naṣẹ Joabi po Abisai po po Itai po, dọmọ, Yí dẹ̃dẹ̃ do zán hẹ yọ̀pọ sunnu lọ na ṣie tọn wutu, yèdọ hẹ Absalọmi. Gbẹtọ lẹpo sọ sè whenuena ahọlu nasẹ awhàngán lẹpo gbọn Absalọmi tọn dali. 6Mowẹ gbẹtọ lẹpo tọ́n yì biọ danji do Islaeli ji: awhàn lọ sọ tin to zùnkan Eflaimi tọn mẹ. 7Yè sọ hò omẹ Islaeli tọn lẹ to finẹ to mẹmẹsi Davidi tọn lẹ nukọn, hùhù daho omẹ fọtọ́n okò tọn de wẹ tin to gbènẹgbe to finẹ. 8Na yè tẹ́ awhàn lọ to finẹ do nukunmẹ otò tọn lẹpo ji: zùnkan lọ sọ và gbẹtọ susu to gbènẹgbe hú ehe ohi và. 9Absalọmi sọ dùkosọ nado pé mẹmẹsi Davidi tọn lẹ. Absalọmi hẹ̀ otlòsọ etọn ji, otlòsọ lọ sọ gbọn alà atin pánhan daho de tọn glọ yì, yè sọ zé e daga to olọn po aigba po ṣẹnṣẹn; otlòsọ he tin to glọ etọn lọ sọ jù yì. 10Dawe de sọ mọ ẹn, bo dọ na Joabi, bo dọmọ, Dayi e go, yẹn mọ Absalọmi to pipla to atin-pánkan de mẹ. 11Joabi sọ dọ hlan dawe he dọ nẹ lọ dọmọ, Bo, dayi e go, bé hiẹ mọ ẹn, etẹwutu wẹ hiẹ ma hò e liai to finẹ? yẹn do ko na wòwò fataka tọn ao hiẹ po homẹbla de po. 12Dawe lọ sọ dọ hlan Joabi dọmọ, Eyín yẹn na do mọ wòwò fọtọ́n fataka tọn yí do alọ ṣie mẹ, gãnṣo yẹn ma na dé alọ ṣie jẹgbonu do visunnu ahọlu tọn go gba: na to sisè mìtọn mẹ ahọlu naṣẹ hiẹ po Abisai po po Itai po, dọmọ, Payi dọ mẹde doalọ yọ̀pọ sunnu lọ Absalọmi go blo. 13Emayínmọ eyín yẹn ko yí okà do zán hẹ ogbè etọn, (whẹhó de ma tin whiwhla sọn ahọlu de) whenẹnu hiẹ lọsu do ko ṣite to aganu. 14Whenẹnu wẹ Joabi dọmọ, Yẹn ma sọgan dọ̀ngbàn le to de we gba. E sọ bẹ̀ owhán atọ̀n do alọ etọn mẹ, bo tlọ yé do otù Absalọmi tọn mẹ luntọ́n, whenuena ewọ gbé sọ tin to ogbè to ogbla atinpánhan lọ tọn mẹ. 15Yọpọ sunnu ao he hẹn awhàngbaja Joabi tọn lẹ sọ tò lẹ̀do bo hò Absalọmi bo hù i 16Joabi sọ kún opèn lọ, gbẹtọ lẹ sọ lé sọn mọdona mẹ to Islaeli godo: na Joabi dọ̀n gbẹtọ lẹ do godo. 17Yé sọ zé Absalọmi, bo dlan ẹn do dògbọ̀gbé daho lọ mẹ to zùnkan mẹ, bo bẹ́ okiti zannu daho lẹ tọn de do e ji: Islaeli lẹpo sọ họ̀nyì omẹ dopodopo do gohọ̀ etọn mẹ. 18Dinvie Absalọmi to ogbẹ̀ whenu etọn mẹ ko yí bo do dòtin na ede, he tin to agbàdo ahọlu tọn mẹ: na é dọmọ, Yẹn ma tindo visunnu de nado hẹn oyín ṣie do otè to oflin mẹ gba: ewọ sọ yí oyín etọn titi do nọ ylọ dòtin lọ: yè sọ nọ ylọ ẹ Oflinnu Absalọmi tọn kakajẹ egbé.
19Whenẹnu wẹ Ahimaazi visunnu Zadọki tọn dọmọ, Gbọ yẹn ni dowezun dinvie bo hẹn owẹ̀n yì ahọlu de, le na OKLUNỌ ko yíahọsuna ẹn sọn kẹ̀ntọ etọn lẹ si do. 20Joabi sọ dọ hlan ẹn dọmọ, Hiẹ ma na yín hinhẹntọ owẹ́n tọn to egbé gba, ṣigba na hẹn owẹ́n to azán devo gbè: ṣigba to egbé hiẹ ma na hẹn owẹ́n de gba, na visunnu ahọlu tọn yín oṣiọ wutu. 21Whenẹnu wẹ Joabi dọ hlan Kuṣinu lọ dọmọ, Yì dọ na ahọlu núhe hiẹ mọ Kuṣinu lọ sọ dè ede hlan Joabi, bo bẹ́wezun. 22Whenẹnu wẹ Ahimaazi visunnu Zadọki tọn sọ vọ̀ dọ hlan Joabi dọmọ, Ṣigba wá núhe sọgan, yẹn vẹ̀ we, gbọ yẹn ga ni dowezun to Kuṣinu lọ godo. Joabi sọ dọmọ, Etẹwutu wẹ hiẹ na dowezun, visunnu ṣie, mimọ dọ hiẹ ma na tindo opó de na owẹ̀n lọ? 23Ṣigba wá núhe sọgan, wẹ é dọ, Yẹn na dowezun. Ewọ sọ dọ hlan ẹn dọmọ, Dowezun. Whenẹnu wẹ Ahimaazi họ̀nwezun gbọn aliho Danfafa lọ tọn ji, bo dowezunzẹ Kuṣinu lọ go.
24Dinvie Davidi sinai to họ̀ngbo awe lẹ ṣẹnṣẹn: hihọtọ sọ yì aga yì ohọta họ̀ngbo lọ tọn hlan dòkọ go, bo zé nukun etọn lẹ daga, bo pọ̀n, bo, dayi e go, dawe de to wezun do ja ewu dopo. 25Hihọtọ lọ sọ dawhá, bo dọ na ahọlu. Ahọlu sọ dọmọ, Eyín é yín ewu dopo, be owẹ̀n tin to onù etọn mẹ. E sọ yawu wá, bo dọ̀n sẹ̀pọ́. 26Hihọtọ sọ mọ dawe devo to wezundo ja, hihọtọ lọ sọ ylọ hlan họ̀njinọtọ lọ, bo dọmọ, Dayi e go, omẹ devo sọ to wezundo ja ewu dopo. Ahọlu sọ domọ, Ewọ ga hẹn owèn ja. 27Hihọtọ lọ sọ dọmọ, Yen lẹn wezundido omẹ nukọn tọn tọn tin di wezundido Ahimaazi visunnu Zadoki tọn tọn. Ahọlu sọ domọ, Omẹ dagbe de wẹ ewọ, bo sọ ja po owẹ́n dagbe po. 28Ahimaazi sọ ylọ, bo dọ hlan ahọlu dọmọ, Popolẹpo, yín dagbe. E sọ dẹ́ ede to ahọlu nukọn po nukunmẹ etọn po hlan aigba, bo dọmọ, Donanọ OKLUNỌ Jiwheyẹwhe towe ni yín, he ko jó omẹ he zé alọ yetọn daga do ahọlu klunọ ṣie ji 29Ahọlu sọ dọmọ, Dagbe é yín to yọ̀pọ sunnu lọ Absalọmi de? Ahimaazi sọ gblọn dọmọ, Whenuena Joabi to mẹmẹsi ahọlu tọn dohlan, yèdọ yen mẹmẹsi towe, yẹn mọ zínhiho daho de, ṣigba yẹn ma yọ́n núhe é yín gba. 30Ahọlu sọ dọmọ, Lẹ́ dapadopo, bo site to ofi Ewọ sọ lẹ́ dapadopo, bo site abọẹ. 31Bo dayi e go, Kuṣinu lọ wá; Kuṣinu lọ sọ dọmọ, Owẹ̀n na ahọlu klunọ ṣie: na OKLUNỌ ko yíahosuna we to egbé sọn omẹ he tite do oji we lepo si. 32Ahọlu sọ dọ hlan Kuṣinu lọ dọmọ, Dagbe é yín to yọ̀pọ sunnu lọ Absalọmi de? Kuṣinu lọ sọ gblọn dọmọ, Kentọ aholu klunọ ṣie tọn lẹ po yé he tite do oji we nado gbleawuna we lẹpo po ni tin dile yọ̀pọ sunnu nẹ te. 33Yè sọ hẹn ahọlu blawu susu, bo sọ hẹaga yì abo mẹ to hòngbo ji aga, bo to, avivi: le é to yìyì, le wẹ é to didọ dọmọ, E Absalọmi visunnu ṣie, visunnu ṣie, Absalọmi visunnu ṣiee jlo Jiwheyẹwhe yẹn wẹ ko kú na hiẹ, È visunnu ṣie, visunnu ṣie, Absalọmi.
Currently Selected:
2 SAMUẸLI 18: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.