1 SAMUẸLI 30
30
1E sọ wá jọ, whenuena yè hẹn Davidi po omẹ etọn lọ po wá Ziklagi to azán atọ̀ntọ gbè, bo Amalekinu lọ ko basi aligbò de to hùwaji ji, podọ to Ziklagi ji, bo ko hò Ziklagi, bo ko yí miyọn do mẹ́ ẹn; 2bo ko yí yọnnu lẹ do yí mẹmẹglọ po onú he tin to e mẹ lẹpo po, pẹvi po daho po: yé ma hù depope gba, ṣigba bẹ́ yé yì, bo yí aliho yetọn yì. 3Whenuena Davidi po omẹ etọn lẹ po wá tòdaho lọ mẹ, dayi e go, yè ko yí miyọn do mẹ́ ẹn; asi yetọn lẹ, po visunnu yetọn lẹ pò, po viyọnnu yetọn lẹ po, yè ko do yí mẹmẹglọ lẹ. 4Whenẹnu wẹ Davidi po gbẹtọ he tin to e de lẹ po zé ogbè yetọn daga, bo viavi, kaka yé ma sọ do tindo huhlọn de nado viavi ba. 5Asi Davidi tọn awe lẹ yè do yí mẹmẹglọ, Ahinoami Jẹzleẹlinuyọnnu, po Abigaili asi Nabali Kalmẹlinu tọn po. 6Yè sọ hẹnnukunbia Davidi talala; na gbẹtọ lẹ dọhó zannudindlan ẹntọn, na alindọn gbẹtọ lẹpo tọn wẹ yè hẹn adido wutu, omẹ dopodopo na visunnu etọn lẹ podọ na viyọnnu etọn lẹ: ṣigba Davidi nahuhlọn ede to OKLUNỌ Jiwheyẹwhe etọn mẹ.
7Davidi sọ dọ hlan Abiatali yẹwhenọ visunnu Ahimelẹki tọn dọ, Yẹn vẹ́ we, hẹn ẹfọdi lọ wá dẽ file. Abiatali sọ hẹn ẹfọdi lọ wá Davidi de to finẹ. 8Davidi sọ kanbiọ sọn OKLUNỌ de, dọmọ, Eyín yẹn domọna to awhàn he godo, yẹn na pla yé? Ewọ sọ gblọn nẹ̃ dọ, Domọna; na hiẹ na pla yé nugbonugbo, bo na sọ hẹn popo gò matin mawà. 9Mowẹ Davidi yì, po omẹ nuọntọ̀n he tin to e de lẹ po, bo wá jẹ tòpẹsẹ Besoli kòn, fie omẹ he yè jódai to godo lẹ nọte te. 10Ṣigba Davidi to mọdona, ewọ po omẹ fowe po: na fọde nọte to godo, he to pakú sọmọ bọ yé ma sọgan yì tọ̀pẹsẹ Besoli gododọ̃n gba: 11Yé sọ mọ Egiptinu de to danji, bo hẹn en wá Davidi de, bo na akla ẹ, ewọ sọ dù; yé sọ na osìn in nado nù: 12Yé sọ na ẹn akla hihi kanpò votin lẹ tọn de, po ohín awe vẹ̃nsínsén húhú tọn lẹ po: whenuena ewọ dù, gbigbọ etọn vọ́ gò do e de: na ewọ ma ko dù akla de, kavi nù osìn depope, họ́ okle atọ̀n po ozán atònpo. 13Davidi sọ dọ hlan ẹn dọ, Mẹnu tọn wẹ hiẹ? podọ fie hiẹ tin sọn? Ewọ sọ dọmọ, Yọpọ sunnu Egipti tọn wẹ yẹn, devi hlan Amalẹkinu de; mẹmẹnu ṣie sọ jó mi dai, na azán atón dogodo yẹn jẹazón mlọnai wutu. 14Míwlẹ basi aligbò de to hùwaji, Kẹlẹtinu lẹ tọn ji, podọ to enẹ he yín Juda tọn ji, podọ to hùwaji Kalẹbi tọn ji; mí sọ yí miyọn do mẹ́ Ziklagi. 15Davidi sọ dọ hlan ẹn dọ. Hiẹ na hẹn mi jẹte yì awhàn he de? Ewọ sọ dọmọ, Whle hlan mi gbọn Jiwheyẹwhe dali, dọ hiẹ ma to na hù mi, kavi jó mi do alọ mẹmẹnu ṣie lẹ tọn lẹ mẹ gba, yẹn na sọ hẹn we jẹte yì awhàn he de. 16Whenuena é ko hẹn ẹn jẹte wá, dayi e go, yè tẹ́ yé pé vó pó aigba lẹpo ji, bo to dùdù bo nùnu, bo hùnwhẹwà, na ogblannu susu lẹpo he yé ko yí sọn aigba Filistini lẹ tọn ji wutu, podọ sọn aigba Juda tọn ji. 17Davidi sọ hò yé sọn fliflimẹ yèdọ jẹ whèjai azán awetọ tọn gbè: omẹ dopo sọn yé mẹ ma hòngán, adavo yọ̀pọ sunnu fowe lẹ, he hó kanklosọpóawenọ ji bo họ̀nyì lẹ. 18Davidi sọ hẹn popo gò he Amalẹkinu lẹ yí: Davidi sọ whlen asi etọn awe lẹ. 19Núde ma sọ whèdo yé, pẹvi kavi daho, visunnu lẹ kavi viyọnnu lẹ, ogblannu lẹ, kavi onú he yé ko yí hlan yé lẹ; Davidi hẹn popo gò. 20Davidi sọ yí lẹngbọ lẹpo po oyín lẹ po, he yé dèdo kanlinpa devo lẹ nukọn, bo dọmọ, Ehe wẹ ogblannu Davidi tọn. 21Davidi sọ wá omẹ fọde lẹ de, he kúpẹ sọmọ bọ yé ma do sọgan hodo Davidi, mẹhe ga yé ko basi nado nọ̀ tọ̀pẹsẹ Besoli dali: yé sọ tón jẹgbonu nado pé Davidi, podọ nado pé gbẹtọ he tin to e de lẹ: whenuena Davidi sẹpọ́ wá gbẹtọ lẹ de, é dọnudo yé. 22Whenẹnu wẹ omẹ ylankan lẹpo po omẹ Beliali tọn lẹ po, sọn enẹlẹ mẹ he yì hẹ Davidi, gblọn, bo dọmọ, Na yé ma yì hẹ mí wutu, mí ma to na na núde yé sọn ogblannu he mí hẹngọ̀ mẹ gba, adavo hlan sunnu dopodopo asi etọn po ovi etọn lẹ po, na yé nido dè yé do nukọn, bo fọ́nyì. 23Whenẹnu wẹ Davidi dọmọ, Mẹmẹsunnu ṣie emi, míwlẹ ma na yí enẹ he OKLUNỌ na hlan mì do wà mọ gba, mẹhe whla mí, bo sọ jó awhàn he wá mí ji do alọ mìtọn mẹ. 24Mẹnu wẹ na tuntóai hlan mì to whẹ́hó he mẹ? na le mimá etọn te he jẹte yì awhànfuntẹn, mọwẹ mimá etọn na yín he nọte to agbàn kòn: zẹ̃nzẹ̃n yé na má do. 25E sọ yín mọ sọn azán nẹ gbè jeijei, wẹ é yí i do basi aṣẹdai de po ogbèdai de po na Islaeli jẹ egbé.
26Whenuena Davidi wá Ziklagi, é dohlan sọn ogblannu lọ mẹ hlan mẹho Juda tọn lẹ, yèdọ hlan họ́ntọn etọn lẹ, dọmọ, Dayi nunina de go na mì sọn ogblannu kẹ̀ntọ OKLUNỌ tọn lẹ tọn mẹ; 27Hlan yé he tin to Bẹteli mẹ lẹ, podọ hlan yé he tin to Lamọti hùwaji tọn mẹ lẹ, podọ hlan yé he tin to Jatili mẹ lẹ; 28Podọ hlan yé he tin to Aloeli mẹ lẹ, podọ hlan yé he tin to Sifìmoti mẹ lẹ, podọ hlan yé he tin to Esitemoa mẹ lẹ; 29Podọ hlan yé he tin to Lakali mẹ lẹ, podọ hlan yé he tin to tòdaho Jelamẹelinu lẹ tọn lẹ mẹ lẹ, podọ hlan yé he tin to tòdaho Keninu lẹ tọn lẹ mẹ lẹ; 30podọ hlan yé he tin to Họlma mẹ lẹ, podọ hlan yé he tin to Kọli-asani mẹ lẹ, podọ hlan yé he tin to Ataki mẹ lẹ; 31Podọ hlan yé he tin to Heblọni mẹ lẹ, podọ hlan ofi lẹpo fie Davidi lọsu po omẹ etọn lẹ po kúkàn nado nọ hòsasa te.
Currently Selected:
1 SAMUẸLI 30: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.