1 SAMUẸLI 25

1SAMUẸLI sọ kú; Islaeli lẹpo sọ bẹ́ yéde pli dopọ, bo ví i, bo di i do owhé etọn gbè to Lama. Davidi sọ tite, bo jẹte yì zùngbo Palani tọn mẹ.

2Dawe de sọ tin to Maoni, nutindo mẹhetọn tin to Kalmẹli; dawe lọ yín omẹ kiklo talala, é sọ tindo lẹngbọ fọtọ́n atọ̀n, po gbọgbọẹ fọtọ́n po: é sọ to fúnpana lẹngbọ etọn lẹ to Kalmẹli. 3Dinvie oyín dawe lọ tọn nọ yín Nabali; podọ oyín asi etọn tọn Abigaili: nawe lọ sọ tin sọn wuntùntùn dagbe mẹ, podọ sọn owhànpẹ nukunmẹ tọn de mẹ: ṣigba dawe lọ yín gbéjinu bo sọ ylan to wàlọ etọn lẹ mẹ; ewọ sọ tin sọn owhé Kalẹbi tọn mẹ 4Davidi sọ sè to zùngbo mẹ dọ Nabali to fúnpana lẹngbọ etọn lẹ. 5Davidi sọ do yọ̀pọ sunnu ao hlan, Davidi sọ dọ hlan yọ̀pọ sunnu lẹ lọ dọ, Mì hẹji yì Kalmẹli, bo yì Nabali de, bo dọnúdo e to oyín ṣie mẹ: 6Le wẹ mì na dọ hlan ewọ he tin to nuyọnnamẹ mẹ dọ, Jijọho ni tin hlan we, jijọho ni tin hlan owhé towe, jijọho ni sọ tin hlan ehe hiẹ tindo lẹpo. 7Dinvie yẹn sè dọ hiẹ tindo fúnpatọ lẹ: lẹngbọyìntọ towe lẹ tin to mí de dinvie, mí ma sọ wà awugble de do yé gba, mọ núde ma sọ whè do yé to ojlẹ he mẹ yé ko tin to Kalmẹli gba. 8Kanbiọ yọ̀pọ sunnu towe lẹ, yé na dọ na we: enẹwutu gbọ yọ̀pọ sunnu lẹ ni mọ nukundagbe to nukun towe lẹ mẹ; na míwlẹ wá to azán dagbe he mẹ; yẹn vẹ́ we, na onú he wá alọ towe mẹ depope, hlan devi towe lẹ, podọ hlan visunnu towe Davidi. 9Whenuena yọ̀pọ sunnu Davidi tọn lẹ wá, yé dọhó hlan Nabali kẹdẹdi ohó nẹlẹ lẹpo to oyín Davidi tọn mẹ, bo sọ nabọẹ. 10Nabali sọ gblọnna devi Davidi tọn lẹ, bo dọmọ, Mẹnu Davidi yín? podọ mẹnu visunnu Jẹsse tọn yín? devi susu wẹ tin dinvie to azán he lẹ mẹ he nọ gbà omẹ dopodopo do sọn mẹmẹnu etọn de. 11Bé yẹn na yí whenẹnu akla ṣie, po osìn ṣie po, podọ olàn ṣie he yẹn na na fúnpatọ ṣie lẹ, bo na ẹn hlan omẹ mẹhe tọn yẹn ma yọ́n fie yé tin sọn? 12Mowẹ yọ̀pọ sunnu Davidi tọn lẹ lẹ́gọ́ do aliho yetọn ji, bo gọ̀ yì, bo wá bo dọ nẹ̃ kẹdẹdi ohó helẹ lẹpo. 13Davidi sọ dọ hlan omẹ etọn lẹ dọ, Mì bla do ogo omẹ dopodopo ohi etọn; Davidi ga sọ bla ohi etọn do ogo: gbẹtọ fowe nkọ sọ hẹji yì to Davidi godo; omẹ fọde sọ nọ̀ agbàn kọ̀n. 14Ṣigba dopo sọn yọ̀pọ sunnu lẹ mẹ dọ na Abigaili, asi Nabali tọn, dọmọ, Dayi e go, Davidi do mẹdagun lẹ hlan sọn zùngbomẹ nado dọnúdo mẹmẹnu mìtọn; ewọ sọ zlọn jẹ yé ji. 15Ṣigba omẹ ewlẹ yín mẹdagbe hlan mí susu, yè ma gbleawuna mí gba, mọ mí ma sọ bà onú depope pò gba, dẹ́n sọ le mí yín zọ̀nhẹtọ po yé po do, whenuena mí tin to danji lẹ: 16yé yín adó de hlan mí to ozánmẹ podọ to okle, to ojlẹ lẹpo mẹ he mí tin to yé de do to lẹngbọ mìtọn lẹ yìn. 17Enẹwutu dinvie yọnẹn bo sọ lẹn núhe hiẹ na wà; na yè yígòna oylan to mẹmẹnu mìtọn ji, podọ to owhé etọn lẹpo ji: na ewọ yín visunnu Beliali tọn mọnkọ de, bọ mẹde ma sọgan dọhó hlan. 18Whenẹnu wẹ Abigaili yawu, bo yí akla mlinmlin fọde, po ogò ovẹ́n tọn awe po, po lẹngbọ dida atọ́n po, po ojlẹ gbadó sisọ tọn atón po, po ohín kanweko ovẹ̃nsínsén húhú tọn po, po aklahihi fọde votin lẹ tọn po, bo bé yé do kẹtẹkẹtẹ lẹ ji. 19E sọ dọ hlan yọ̀pọ sunnu etọn lẹ dọ, Mì to yìyì to nukọn ṣie; dayi e go, yẹn ja to mì godo. Ṣigba é ma dọ na asú etọn Nabali gba. 20E sọ yín mọ, le ewọ hẹ́ kẹtẹkẹtẹ etọn ji, bo jẹte wá to oglọ osé tọn dali, wẹ, dayi e go, Davidi po omẹ etọn lọ po jẹte ja e ji; ewọ sọ pé yé. 21Dinvie Davidi ko dọmọ, Nugbonugbo ovọ́ wẹ yẹnhọ onú hatọ he tindo to zùngbo mẹ do, mọ bọ yè ma bà núde pò sọn ehe yín etọn lẹpo de mẹ: ewọ ko sọ gọ́ oylan hlan mi na dagbe. 22Jiwheyẹwhe ni wà mọ hlan kẹntọ Davidi tọn lẹ, podọ húmọ ga, eyín yẹn pò sọn onú he yín etọn lẹpo de mẹ dai jẹ afọnnu sù sọ ovi omẹ dopo tọn. 23Whenuena Abigaili mọ Davidi, é yawu, bo jẹte sọn kẹtẹkẹtẹ etọn ji, bo họ́ ṣinyọn nukunmẹ etọn ji to Davidi nukọn, bo dẹ́ ede hlan aigba. 24E sọ ṣinyọnai to afọ etọn go, bo dọmọ, To oji e, klunọ ṣie, to oji e ylanwiwà lọ ni te: bo gbọ deviyọnnu towe, yẹn vẹ́ we, ni dọhó to otó towe lẹ mẹ, bo sọ sè ohó deviyọnnu towe tọn lẹ. 25A dike klunọ ṣie, yẹn vẹ́ we, hò dawe Beliali tọn he pọ́n blo, yèdọ Nabali: na le oyín etọn te, mọwẹ ewọ te; Nabali wẹ oyín etọn yín, gúgú tin po e po: ṣigba yẹn deviyọnnu towe ma mọ yọ̀pọ klunọ ṣie tọn lẹ gba, mẹhe hiẹ dohlan lẹ. 26Enẹwutu dinvie, klunọ ṣie, le OKLUNỌ to ogbẹ́, podọ le alindọn towe to ogbẹ́, mimọ OKLUNỌ ko gọ́ we do godo sọn hùnwhẹyìnylan mẹ, podọ sọn alọ towe titi do yíahọsuna dewe mẹ, enẹwutu dinvie, gbọ kẹ̀ntọ towe lẹ po yé he to oylan din hlan klunọ ṣie lẹ po, ni tin di Nabali. 27Podọ dinvie nunina he devi towe hẹn wá klunọ ṣie de, gbọ yè ni na ẹn hlan yọ̀pọ sunnu he to klunọ ṣie hodo lẹ. 28Jona, yẹn vẹ́ we, ylando deviyọnnu towe tọn: na OKLUNỌ na yí nugbo do basi owhé lili de na klunọ ṣie, na klunọ ṣie to awhàn OKLUNỌ tọn fùn wutu; yè ma sọ to na mọ oylan to hiẹ mẹ to azán towe lẹ mẹ gba 29Eyín yè tlẹ hẹn gbẹtọ fọ́n nado domọna we, podọ nado din alindọn towe, gãnṣo alindọn klunọ ṣie tọn yè na bla do odi ogbẹ̀ tọn mẹ to OKLUNỌ Jiwheyẹwhe towe de; alindọn kẹ̀ntọ towe lẹ tọn lẹ, yé wẹ é na do yìnakòtopé jẹgbonu, di sọn ohò akòtopó de tọn mẹ 30E na sọ wá jọ, whenuena OKLUNỌ na ko wà hlan klunọ ṣie kẹdẹdi dagbe he é ko dọ gbọn etọn dali lẹpo, bo na ko yí we do dè ahọvi do Islaeli ji; 31wẹ ehe ma na yín adi hlan we gba, kavi ọwhẹ́ ayiha tọn hlan klunọ ṣie gba, mọ hiẹ ma kòn ohùn dai matin whẹ̀hó, kavi dọ klunọ ṣie ko yíahọsuna ede: whenuena OKLUNỌ na ko zán dagbedagbe hẹ klunọ ṣie, whenẹnu flin deviyọnnu towe. 32Davidi, sọ dọ hlan Abigaili dọ, Donanọ OKLUNỌ yín, Jiwheyẹwhe Islaeli tọn, he do we hlan to egbé nado pé mi: 33Donanọ nuyọnẹn towe ni yín, donanọ hiẹ ni yín, he ko glọn mi to egbé sọn hùnwhèyínylan mẹ, podọ sọn alọ ṣie titi yí do yíahọsuna dẽ mẹ. 34Na to wàlọ lọsu mẹ, le OKLUNỌ, Jiwheyẹwhe Islaeli tọn, to ogbẹ́, he ko dọ̀n mi do godo sọn awugblena we mẹ, le hiẹ yawu bo wá nado pé mi, nugbonugbo yè ma to na pòdai hlan Nabali jẹ afọnnu sù sọ ovi omẹ dopo tọn gba. 35Mowẹ Davidi yí sọn alọ etọn mẹ enẹ he ewọ hẹn wá nẹ̀: é sọ dọ hlan ẹn dọ, Hẹji yì owhé towe gbè jijọho mẹ; pọ́n, yẹn ko tuntóai hlan ogbè towe, bo sọ kẹalọyí we. 36Abigaili sọ wá Nabali de; bo, dayi e go, é to hùnwhẹ de wà to owhé etọn gbè, di hùnwhẹ ahọlu de tọn; ayiha Nabali tọn sọ yín ayanọ to homẹ nẹ̃, na yè hẹn ahànmu in talala: enẹwutu ewọ ma dọ núde nẹ̃, whèhú kavi sùhú, kakajẹ afọnnu. 37E sọ wá jọ to afọnnu, whenuena yè hẹn ovẹ̀n yì sọn Nabali mẹ, wẹ asi etọn dọ onú helẹ nẹ̃, ayiha etọn sọ kú to homẹ nẹ̃, ewọ sọ lẹzùn taidi zannu de. 38E sọ wá jọ to azán ao nkọ godo, wẹ OKLUNỌ hò Nabali, bọ é kú. 39Whenuena Davidi sè dọ Nabali yín osiọ, é dọmọ, Donanọ OKLUNỌ yín, he ko yí whẹ́hó ovlẹ ṣie tọn dọ sọn alọ Nabali tọn mẹ, bo ko gò mẹmẹsi etọn do godo sọn oylan mẹ: ylan-wiwà Nabali tọn OKLUNỌ ko sọ lẹ́gọ̀ do ota ewọ lọsu tọn ji. Davidi sọ do omẹ hlan bo dọhó gbọn Abigaili tọn dali, nado yí i wá e de hlan asi. 40Whenuena yè hẹn mẹmẹsi Davidi tọn lẹ wá Abigaili de to Kalmẹli, yé dọhó hlan ẹn, dọmọ, Davidi do mí hlan we, nado yí we wá e de hlan asi. 41Ewọ sọ tite, bo dẹ́ ede po nukunmẹ etọn po hlan aigba, bo dọmọ, Dayi e go, devi de wẹ deviyọnnu towe nado klọ́ afọ devi klunọ ṣie tọn lẹ tọn. 42Abigaili sọ yawu, bo tite, bo hẹ́ kẹtẹkẹtẹ de ji, po awhlivu atọ́n po sọn etọn lẹ mẹ he to hihodo e; é sọ to yìyì to mẹdagun Davidi tọn lẹ godo, bo lẹzùn asi etọn. 43Davidi sọ yí Ahinoami Jẹzleẹli tọn ga; yé omẹ awelẹ sọ lẹzùn asi etọn. 44Dinvie Sauli ko yí Mikali viyọnnu etọn, asi Davidi tọn na Palti visunnu Laisi tọn, he tin sọn Galimi.

Currently Selected:

1 SAMUẸLI 25: BWL23

Highlight

Copy