1 SAMUẸLI 26

1ZIFINU lẹ sọ wá Sauli de to Gibea, dọmọ, Bé Davidi ma whlá ede do okọta Hakila tọn mẹ, ehe tin to zùnkàn nukọn? 2Whenẹnu wẹ Sauli tite, bo jẹte yì zúngbo Zifi tọn mẹ, tintindo omẹ ṣinṣinyan fọtọ́n atón sọn Islaeli mẹ po e po, nado din Davidi to zùngbo Zifi tọn mẹ. 3Sauli sọ whèsla do okọta Hakila tọn ji, ehe tin to zùnkàn nukọn to aliho ji Ṣigba Davidi tin to zùngbo mẹ, ewọ sọ mọ dọ Sauli domọna ẹn wá biọ zùngbo mẹ. 4Enẹwutu Davidi do amé lẹ hlan gbonu, bo sọ tùnwun dọ yè hẹn Sauli wá sọn nugbo de mẹ. 5Davidi sọ tite bo wá ofi he Sauli whèsla do, Davidi sọ dayi ofi he Sauli mlọn go; po Abneli visunnu Neli tọn po, awhàngán awhànpa etọn tọn; Sauli sọ mlọnai to ṣẹnṣẹn otẹn agbànkẹkẹ lẹ tọn mẹ, gbẹtọ lẹ sọ whèsla lédo e pé. 6Whenẹnu wẹ Davidi gblọnna bo dọ hlan Ahimelẹki Hitinu, podọ hlan Abisai visunnu Zeluia tọn, nọvisunnu hlan Joabi, dọmọ, Mẹnu wẹ na jẹte yi Sauli de to osla mẹ hẹ mi? Abisai sọ dọmọ, Yẹn na jẹte yì hẹ we. 7Mowẹ Davidi po Abiṣai po wá gbẹtọ lẹ de to ozánmẹ: bo dayi e go, Sauli mlọnai to amlọndọ to ṣẹnṣẹn agbànkẹkẹ lẹ tọn, po owhán etọn po whète to aigba to ota ligbé etọn: Abneli po gbẹtọ lẹ po sọ mlọnai lẹ́do e pé. 8Whenẹnu wẹ Abisai dọ hlan Davidi dọ, Jiwheyẹwhe ko jó kẹ̀ntọ towe do alọ towe mẹ to egbé; enẹwutu dinvie yẹn vẹ́ we, gbọ yẹn ni yí owhán do hò e liai sisó dopo, yẹn ma to na sọ́ ẹ whla awetọ gba. 9Davidi sọ dọ hlan Abisai dọ, A và ẹ blo: na mẹnu wẹ sọgan dè alọ etọn jẹgbonu do mẹyíamisisádodè OKLUNỌ tọn ji, bo yín matinwhẹ́yinylan? 10Davidi sọ dọmọ, Le OKLUNỌ to ogbẹ́, OKLUNỌ na hò e; kavi azán etọn na wá nado kú; kavi é na jẹte yì biọ awhànfuntẹn, bo dọ̀n. 11OKLUNỌ dike blo dọ yẹn na do dé alọ ṣie jẹgbonu do mẹyíamisisádodè OKLUNỌ tọn ji: ṣigba dinvie, yẹn vẹ́ we, yi owhán he tin to ota ligbé etọn, po ogò osìn tọn po, bo gbọ mí ni yì. 12Mọwẹ Davidi yí owhán po ogò osìn tọn po sọn ota Sauli tọn; yé sọ tón yì, omẹ de ma sọ mọ ẹn, kavi yón ẹn, mọ mẹde ma sọ fọ́n: na yé omẹ popo tin to amlọn mẹ; na yè hẹn amlọn sisosiso de sọn OKLUNỌ de flẹ́ jẹ yé ji wutu. 13Whenẹnu wẹ Davidi gbọn aga yì adà awetọ ji, bo ṣite to adàdà osé tọn ji to aganu; otẹn daho de tin to yé ṣẹnṣẹn: 14Davidi sọ jlẹgbè hlan gbẹtọ lẹ, podọ hlan Abneli visunnu Neli tọn, dọmọ, Abneli, hiẹ ma gblọnhó? Whenẹnu Abneli gblọnhó bo dọmọ, Mẹnu wẹ hiẹ he to gbẹ̀jlẹ hlan ahọlu? 15Davidi sọ dọ hlan Abneli dọmọ, Bé omẹ tudotọ de ma we hiẹ yín? mẹnu wẹ tin jijlẹ do ogo we to Islaeli mẹ? whenẹnu etẹwutu hiẹ ma hózán to ahọlu klunọ towe ji? na omẹ de sọn gbẹtọ lẹ mẹ wá whégbe nado và ahọlu klunọ towe. 16Onú hiẹ wà he ma yín dagbe gba. Le OKLUNỌ to ogbè, mìwlẹ tin jẹ nado kú, na mì ma hózán to klunọ mìtọn ji wutu, mẹyíamisisádodè OKLUNỌ tọn. Podọ dinvie, pọ́n, fie owhán ahọlu tọn te, po ogò osìn tọn po he tin to ota ligbé etọn. 17Sauli sọ yọ́n ogbè Davidi tọn, bo dọmọ, Visunnu ṣie Davidi, ogbè towe wẹ ehe? Davidi sọ dọmọ, Klunọ ṣie, ahọlu, ogbè ṣie wẹ. 18Ewọ dọmọ, Etẹwutu wẹ klunọ ṣie to mọyanna mẹmẹsi etọn? etẹwẹ yẹn ko wà? kavi oylan tẹwẹ tin to alọ ṣie mẹ? 19Enẹwutu dinvie, yẹn vẹ́ we, gbọ kluno ṣie ahọlu ni sè ohó mẹmẹsi etọn tọn. Eyín é yín OKLUNỌ wẹ ko fọ́nadan we do oji e, gbọ é ni kẹalọyi avọ́ nunina de: ṣigba eyín é yín ovi gbẹtọ lẹ tọn lẹ we, dẹ̀hodonọ yé yín to OKLUNỌ nukọn; na yé ko yàn mi jegbonu to egbé bọ yẹn ma na do sẹbọdo ogú OKLUNỌ tọn go, dọmọ, Yì, sèn yẹwhe devo lẹ. 20Enẹwutu dinvie, a dike ohùn ṣie kùn do aigba yì sọn nukun OKLUNỌ ṣie ton mẹ blo: na yè hẹn ahọlu Islaeli tọn jẹgbonu wá nado din jẹhli de, di whenuena omẹ de to gbéyanna asọkle de to osé lẹ ji. 21Whenẹnu wẹ Sauli dọmọ, Yẹn ko wàylando: gọ, visunnu ṣie Davidi: na yẹn ma to na gbleawuna we ba gba, na ogbẹ̀ ṣie yín nuhọakuẹ to nukun towe lẹ mẹ to egbé wutu: dayi e go, yẹn ko zán gúgú, bo ko sọ buali talala. 22Davidi sọ gblọn, bo dọmọ, Ahọlu, pọ́n owhán lọ! enẹwutu gbọ dopo sọn yọ̀pọ sunnu lẹ mẹ ni wá aga bo wá yí i. 23OKLUNỌ na na hlan omẹ dopodopo dódó etọn po nugbo etọn po: sọle OKLUNỌ JO we do alọ ṣie mẹ tò egbé, bọ yẹn ma jlo na dè alọ ṣie jẹgbonu do mẹyíamisisádodè OKLUNỌ tọn ji. 24Bo dayi e go, le yè zé ogbẹ̀ towe do sùsọ to nukun ṣie lẹ mẹ to egbé do, mọwẹ a ni gbọ yè ni zé ogbẹ́ ṣie do sùsọ to nukun OKLUNỌ tọn lẹ mẹ, bo gbọ é ni whlẹn mi sọn nukunbibia lẹpo mẹ. 25Whenẹnu wẹ Sauli dọ hlan Davidi dọ, Visunnu ṣie, Davidi, donanọ hiẹ yín: hiẹ na yí hlọnhlọn do wà, bo na gbawhàn nugbonugbo. Mowẹ Davidi yí ali etọn, Sauli sọ gọ̀ do otẹn etọn mẹ.

Currently Selected:

1 SAMUẸLI 26: BWL23

Highlight

Copy