Luka 8

Abakị̄kulu aba bēndaga na Jesụ

1Pānyụma pali sịsịsị alinkwenda ntwaja utukulūmba nutunāndi, alinkulūmbilila ilịsyu lya Kyala, kalōngo na babili bala balinkuja nagwe. 2Bope na bakị̄kulu bamo aba ababūmbulwịsye ububịne bwa mbepo īnyalị ni ndamwa isị̄ngị balinkwenda nagwe: Malịja ugwa mụ Magatala, uju mbepo ịhāno na ịbili syāsōkilemo mmyake, 3Johanị unkasị gwa Kyusa ummbōmbelị gwa Helotị, na Sụsana, nabāngi abị̄ngị ịtolo aba babaswilaga ukufụma mụndalama syabo.

Ikifwanịkisyo kya nsopambejụ

(Mat. 13:1-9; Mali. 4:1-9)

4Lelo bo abāndu ikilūndilo kikị̄ngị babūngēne, nabāndu aba bāfụmaga ntwaja bankulukị̄le, alinkujobela nkifwanịkisyo kyakubalilamo alinkuti: 5Unsopambejụ alinkusōka ukubūka kukusopa īmbejụ jake; lelo bo ịkusopa, jimo jilinkugwa mụnjila, abāndu balinkujikanya namalūndi, kangi īnjunị sịlinkusala. 6Ijīngi jilinkwakugwa pa lwalabwe; lelo bo jimelịle, jilinkwenda nukūma, papo jikabwagịle ububisi: 7Jimo jilinkugwa mmị̄fwa, imị̄fwa gilinkukula najo gilinkwenda nukujigoga. 8Jimo jilinkugwa mụmfụ unnụnụ, jilinkukula jilinkupa īseke mịa jumo. Bo alipakujoba sịsịsị alinkulāta alinkuti: Uju ali ni mbulukutu sya kupilikila jo alīpilikaga.

Isị sịkupela ukujobela mfịfwanịkisyo

(Mat. 13:10-17; Mali. 4:10-12)

9Lelo bo abafụ̄ndịgwa bāke bịkunndālūsya īsanụkisyo ja kifwanịkisyo iki, 10ātịle; Umwe mụpēgị̄gwe ukusịmanya isya kubutị̄tu sya kitāngālala kya Kyala; lolị abāngi bapēgịgwe ukubalilịgwa mfịfwanịkisyo, ukuti napa bịkukēta bangasịbonaga, napa linga bịkupilika bangasyaganịaga. 11Īsanụkisyo ja kifwanịkisyo iki jo iji: Īmbejụ lyo ịsyu lya Kyala. 12Iji jagwaga mụnjila bo bāndu aba bịkupilika ilịsyu, lelo setano ịkwịsa ịkunyaka ilịsyu mụndụmbụla syabo ukuti bangalikōngaga nukupokịgwa. 13Iji jagwaga palwalabwe, bo aba bo bapilị̄ke ilịsyu bịkusekela ukulyambilila; lolị bakaja ni mịsị bịkulikōnga nkabalilo akanāndi ịtolo, lelo bo sịsịle īngelo bịkugwa. 14Iji jagwaga mmị̄fwa bo aba bikupilika ilịsyu, lolị nkwịkōlanịa kwabo naisị sịkukatasya, nubukabị, nisya kwịsekesya mbūmị bwa pāsi apa kukubapīnga ukupa īseke isị sịkomịle. 15Īmbejụ iji jagwịle mụmfụ unnụnụ, bo aba bo bapilị̄ke ilịsyu bịkulikola bịkulyumīlila mbwanalolị nindụmbụla īndịke, bịkwenda nukupa īseke mbufị̄ndang'oma.

Ukukụpikila īnyāle ni bakụlị

(Mali. 4:21-25)

16Akajako najumo uju ịkukosya īnyāle po ajikụpikilege nikikụpikililo, pamo ajibīkege kwịfūngu, lolị ịkujibīka pamwanya pa kyakwịmapo īnyāle ukuti abāndu bo bịkwịngila bakētege ubwelụ. 17Namanga sịkajako nasịmo isị sịfịsị̄gwe isị sịtịsakusokolịgwaga pabwelụ, nasịmo nisyakubutị̄tu isị sịtịsakumanyịgwaga nukuboneka pabwelụ. 18Mụjege māso lelo kuli isị mụkupilika; namanga uju alinafyo fịmo jo ịsakōngelịgwangapo ifị̄ngị pamwanya, lolị kuli uju akaja nafyo, fyope ifị ịkwịnogona ukuti alinafyo fịkwegịgwaga.

Unna gwa Jesụ nabāmyabo

(Mat. 12:46-50; Mali. 3:31-35)

19Lelo unna nabāmyabo balinkwịsa kumyake, balinkupōndwa ukwaganịla nagwe kunōngwa ja kilūndilo kyabāndu. 20Po papo alinkubūlịgwa ukuti: Unyoko nabāmyinụ, bīmịle pānja bịkulōnda ukwaganịla nanụngwe. 21Lolị umwene ābabūlịle ātịle: Une jūba nabāmyitu bo aba bịkupilika ilịsyu lya Kyala nukulibōmba.

Jesụ ịkugukịbisya ummbelo

(Mat. 8:23-27; Mali. 4:35-41)

22Mwịsịku limo Jesụ ālipakịle mwịbōtị na bafụ̄ndịgwa bāke, alinkubabūla alinkuti: Oko tuloboke tubūke ịsīlya lila lya nyanja. Po papo balinkusụmụka, 23lelo bo bali mwịbōtị bịkubūka, umwene utulo tulinkunkola. Ummbelo gulinkukụla mụnyanja, amīsi galinkubapōlekela mwịbōtị lilinkupona ukwịbila, bōsa balinkuja mbutolwe ubukulūmba. 24Po papo balinkunsụka balinkuti: Malafyale, Malafyale twịnwịke ukufwa. Po papo alinkwenda nukulēmbuka alinkugukemela ummbelo na majiga amakāli, po papo inyanja nummbelo fịlịnkwenda nukubota kulinkuja jōnjolo. 25Alinkujoba nabo alinkuti: Luli kūgu ulwịtiko lwinụ? Abēne lulinkubāga ulutēnde balinkuswịga uju kunnịne balinkuti: Umụ̄ndu uju jwanị, jo ịkugulagila ummbelo na majiga fịkumpilika?

Jesụ ịkummbūmbulusya umụ̄ndu uju imịsētano gyalinkụlị̄le

(Mat. 8:28-34; Mali. 5:1-20)

26Lelo po papo balinkufịka nkị̄su kya mụ Gelasenị (Gatala, Gelịgesa) iki kịkukētana ni kya mụ Galịlaị ukuloboka sūmbi. 27Lelo bo ịkufyuka ịtolo pị̄sīlya alinkwaganịla numụ̄ndu uju āfụmịle nkāja, uju ali nimịsētano; ubusịku bwịngị ēndaga bufụ̄la, akāgonaga nnyụ̄mba lolị āgonaga mbujo bwa mapūmba. 28Bo ammbwene Jesụ ākụ̄tịle fị̄jo, āgwịle mmalūndi mmyake, alinkulāta ukujoba alinkuti: Jesụ, gwe Mwana gwa Kyala Unkīnde! Kulōnda ukūmbōmbela fịkị? Ngukusūma ungāfụ̄ndaga. 29Ājobaga sịsịsị papo Jesụ ājibūlịle īmbepo īnyalị ukusōkamo mmyake. Jalinkolị̄le ukwanda patalị, pope linga bampịnyịle, bamfyatịle nimịnyololo mmaboko na mmalūndi, ālatulaga imịnyololo, po ilịsētano lilalila lyendaga nukunkagila nndị̄su. 30Jesụ ālinndālūsīsye ātịle: Īngamụ jako gwanị? Ātịle: Ne Kilūndilo; namanga bālinkụlị̄le bāsētano bị̄ngị. 31Po papo abēne bāsētano balinkunsūma ukuti bangasōkamo mmụ̄ndu jula nukwakwịtāga mbwịna bwa ngolōngo mbwịna ubusolofụ ubwa ngị̄sị 32Lelo gwalipo pabupị̄pị untị̄mo unkulūmba gwa ngulube isị syālyaga ilị̄su mụmbali nkyamba. Po bāsētano balinkunsūma Jesụ ukuti ābị̄tikị̄sye ukwịngila mụngulube. Po papo alinkwenda nukubịtikisya. 33Lelo bāsētano balinkusōka mmụ̄ndu balinkwakwịngila mụngulube, po papo untị̄mo gwa ngulube gulinkugụlụtụkila palupānga ulutalị gulinkwakwịtāga mụnyanja gulinkumịlwa.

34Lelo bo abatị̄mị basịbwene sịsịsị balinkubopa balinkwakupānga nkāja na mmịgūnda gya nkị̄su kya mụmbali. 35Po papo lelo abāndu balinkubūka kukukēta isị syabonị̄ke, balinkwịsa kwa Jesụ balinkummwaga umụ̄ndu uju bāsētano bāsōkịlemo mmyake, atūgēle mmalūndi mwa Jesụ afwele imyenda, nnụnụ ịtolo; balinkwenda nukutetema. 36Aba bāsịbwene balinkubabūla mụno ābūmbulukisị̄gwe uju īmbepo īnyalị syalinkụlị̄le. 37Po papo lelo abāndu bōsa abankị̄su iki kyabasyungūtị̄le Abagalasenị balinkunsūma ukusōkamo mmyabo; papo lwabakolịle ulutēnde ulukulūmba fị̄jo; po papo Jesụ alinkwịpaka mwịbōtị alinkugomoka. 38Umụ̄ndu jula bāsētano basōkịlemo mmyake alinkunsūma Jesụ ukubūka nagwe; lolị Jesụ alinkunkaga alinkuti: 39Būka ugomokele kukāja kāko, ukafụmụsyege īngulūmba isị Kyala akubōmbị̄le. Po papo alinkusōkapo ukubūka, alinkufụmụsya ukaja kōsa īngulūmba isị Kyala ālimmbōmbị̄le.

Umwana unndīndwana gwa Jailị nunkị̄kulu gwa nyị̄buko

(Mat. 9:18-26; Mali. 5:21-43)

40Lelo bo Jesụ agomwịke, ikilūndilo kya bāndu kilinkummwambilila, namanga bōsa banngụ̄lilaga. 41Alinkwịsa umụ̄ndu jumo uju īngamụ jake āli jo Jailị, uju ālagilaga nnyụ̄mba jakwịpụ̄tilamo; alinkugwa mmalūndi mwa Jesụ alinkunsūma ukubūka ku nyụ̄mba jake, 42namanga umwanāke unndīndwana jumo jwene ntiga ugwa pafyinja kalōngo nafịbili alimmbine ulwa kufwa.

Lelo bo ịkubūka abāndu balinkunsyungūtila balinkupapatana ịtolo. 43Po Papo unkị̄kulu uju āli ninyị̄buko ja ịlopa mfyinja kalōngo nafịbili kisịta kubūmbulusịgwa numụ̄ndu najumo, 44alinkwịsa kūnyụma kumyake, alinkupalamāsya ikipeto kya mwenda gwake; po papo nakalīnga ububịne bwake bwa nyị̄buko bulinkujōnga. 45Po papo Jesụ alinkujoba alinkuti: Jwanị āmbalamāsị̄sye? Lelo bo bōsa bakānịle, Petelị ātịle: Malafyale, ifịlūndilo fikusyungūtị̄le fịpapatene fikukulufania nanụngwe bo fikugụtana. 46Loli Jesụ ālyamwịle atịle: Umụ̄ndu jumo āmbalamaāsị̄sye; kābuno Ngwịbona ukuti amaka gasokile ukufụma mmyangu. 47Lelo bo unkị̄kulu asyagēnịe ukuti amanyị̄gwe alinkusegelela kwa Jesụ butetema butupu alinkubụngụlụka mmalūndi mmyake alinkummbūla isị syalimpelị̄le ukumpalamāsya alinkusịjoba bo bikupilika bōsa abāndu, alinkummbūla nisya kubūmbuluka kwake nakalīnga. 48Jesụ ālimbūlịle ātịle: Mwanāngu, ulwịtiko lwako lḳubūmbulwịsye, būkaga nulutēngāno.

49Lelo bo akāli nukumala ukujoba, umụ̄ndu jumo alinkwịsa ukufụma kunyụ̄mba ja nndagilị gwa nnyụ̄mba ja kwịpụ̄tilamo alinkummbūla Jailị alinkuti: Umwanāko afwịle ungūmīlisyaga ukunkatasya ummanyịsị. 50Lolị bo apilị̄ke sịsịsị Jesụ ālimmbūlịle Jailị ātịle: Ungatetemaga; gwịtikege ịtolo, po ịkuponaga. 51Lelo bo afịkịle pānyụ̄mba ābakanị̄sye bōsa ukwịngila nagwe, lolị bēne ba Petelị na Johanị na Jakobụ nugwịse nunna gwa mwanịke. 52Bōsa balinkulila, balinkunndilila īfwa umwanịke; Jesụ ātịle: Mụngalilaga; buno umwanịke akafwa lolị agonịle ịtolo utulo. 53Po papo balinkunseka, papo bāmēnye ukuti afwịle. 54Lolị Jesụ alinkunkola ikiboko, alinkukōlela alinkuti: Nndīndwana, sụmụka! 55Po papo ubūmị bwake bulinkunngomokela, nakalīnga ịtolo alinkusụmụka; Jesụ alinkubalagila ukuti bampepo ifị̄ndu alyemo. 56Abapāpị bāke kilinkubāga ikīswigu; lolị Jesụ alinkubakānisya ukuti bangammbūlaga najumo umụ̄ndu isị syabonị̄ke sịsịsị.

Currently Selected:

Luka 8: NYB96

Highlight

Copy