Luka 9

Jesụ ịkubatuma kalōngo na babili

(Mat. 10:5-15; Mali. 6:7-13)

1Po papo Jesụ alinkubabūnganịa kalōngo na babili bala, alinkubapa amaka nubulāmbikị bwa kusịkagila mbepo inyāli nukugāngula īmbūngo, 2alinkubatuma nkulūmbilila ikitāngālala kya Kyala nukubūmbulusya ababịne. 3Alinkubabūla alinkuti: Mụngakolelaga nafịmo bo mụkubụ̄ka, jomma ningịlị, gomma gōpe numfụko, nafịmo nifị̄ndu, syomma nindalama; kangi mụngajaga nimịselekesye mị̄bili. 4Nnyụ̄mba jōsa iji mụkwakwịngilamo, mụkajege mụmo, mo mụkafụmege bo mụkusụmụka. 5Bōsa aba linga batịkubāmbilila bo mụkusōkamo nkāja kalakala mụkabakung'ụndilege ulufụ̄mbi kumalūndi ukuja ko kubasoka abēne. 6Po papo balinkusụmụka balinkwenda ntwaja utunāndi balinkulūmbilila ilịbāngilị nukubūmbulusya ababịne mōsa.

Ukwalangana kwa Helotị

(Mat. 14:1-12; Mali. 6:14-29)

7Lelo bo Helotị unndagilị gwa mụ Galịlaị apilị̄ke syosa isị syabōmbịgwaga syalimmwalangenịe fị̄jo, papo bamo bạ̄tigi jo Johanị Umōsị asyukịle. 8Abāngi bạ̄tigi jo Elịja asetwịke. 9Helotị ātịle: Johanị nalimmbutịle untu; lolị jwanị uju ngupilika īnōngwa syake sya bo bunobuno? Alinkulōnda ukummbona.

Jesụ ịkubaswila abāndu baelufụ bahāno

(Mat. 14:13-21; Mali. 6:30-44; Joh. 6:1-14)

10Lelo bo bagomwịke abafụ̄ndịgwa bala balinkumpāngila isị bābōmbịle. Umwene alinkubēga alinkujōnga, 11alinkwakwịjēkela nabo nkāja aka bịkuti Betịsaịta. Lelo bo ifịlūndilo fịsyagēnịe sịsịsị fịlinkunkōnga; alinkubāmbilila alinkubabūla isya kitāngālala kya Kyala, alinkubabūmbulusya aba bālōndaga ukubūmbulusịgwa. 12Lelo bo ubusịku bụkuja pakwịla, kalōngo nababili bala balinkujoba nagwe balinkuti: Kibūle ikilūndilo kisōkepo kibūke ntwaja utunāndi na nkị̄su kya mụmbali mo bakagonege nukulyamo ifyakulya; namanga tuli mmatēngele. 13Lolị ābabūlịle ātịle: Amụbapepo jujumwe ifyakulya. Bātị̄le: Tukaja nafyo nafimo ukukīnda pa fisyesye fihano nị̄swi ịbili, pēne apa linga twajaga kubūlila Ifị̄ndu fya bāndu bōsa aba; 14namanga bali bāndu aba bali mwa baelufụ bahāno. Po papo alinkubāmụla abafụ̄ndịgwa bāke alinkuti: Amụbabūle batūgale mfịbụgụtila, ikibụgụtila kimo kijege nabāndu amalōngo mahāno. 15Balinkubōmba bo sịsịsị, balinkubabūla abāndu bōsa ukutūgala pāsi. 16Lelo bo Jesụ ēgịle imịkāti mịhāno nasị̄swi ịbili sịla, alinkukēta kumwanya, alinkugwa ulupị, alinkufịmenyanịa, alinkubapa abafụ̄ndịgwa bāke ukuti bakitegelekesyege ikilūndilo. 17Po papo bōsa balinkulya balinkwịkuta, abafụ̄ndịgwa bāke balinkwịsusya ifị̄bo kalōngo na fịbili fya tumēnya utu bāsyesye.

Petelị ịkumfụmụsya Jesụ

(Mat. 16:13-19; Mali. 8:27-29)

18Po papo lumo bo Jesụ alimwene ịkwịpụ̄ta abafụ̄ndịgwa balinkusegelela kumyake; alinkubalālūsya alinkuti: Mụkūnjoba ukuja nịanị une? 19Bālyamwịle bātịle: Bamo bịkuti gwe Johanị Umōsị; bamo bịkuti: Gwe Elịja, kangi abāngi bịkuti: Jo jumo mbakụ̄ngụlụka baịjolo, asyukịle. 20Alinkujoba nabo alinkuti: Lolị umwe mụkuti nịanị une? Petelị ālyamwịle ātịle: Jo ugwe Kilisịtị gwa Kyala.

Jesụ ịkujoba isya ngubilo syake nukufwa

(Mat. 16:20; Mali. 8:30—9:1)

21Lolị umwene alinkusị̄nga alinkubalagila, 22alinkuti: Mụngammbūlaga najumo umụ̄ndu ukuti: Umwana gwa Kyala kummbagị̄le ukukubilwa sịnyịngị nukutāgịgwa na bakulūmba na bapụ̄tị abakulūmba nabamanya ndagilo, nukugogịgwa kangi nukusyuka pị̄sịku lya butatu.

23Kangi alinkubabūla bōsa alinkuti: Linga umụ̄ndu ịkulōnda ukūngōnga une, īkānege mwene apīmbēge ikikohekano kyake kukuti ịsịku napo āngōngege une, 24papo uju linga ịkuti mbuponesye ubūmị bwake jo abupēsị̄sye; kangi uju linga ịkubutāga ubūmị bwake panōngwa jangu, jo ịsakubuponesyaga. 25Umụ̄ndu ịkukabamo bunụnụ bukị linga ịkukikaba ikị̄su kyosa linga lelo mo abutāgị̄le ubūmị bwake jūjo? 26Buno uju linga ịkufwa īsonị kumyangu na kumasyu gangu, Nnyamụ̄ndu ịsakumfwilaga īsonị jope bo ịkwịngila nkitāngālala na mbukulūmba bwa Gwịse na bandumị abị̄kemo. 27Lolị nikubabūla une nalolị ukuti bamo aba bīmịle papapa bātisakukumanyaga ukufwa bo tāsị bakāli ukukibona ikitāngālala kya Kyala.

Ukwanduka ukuboneka

(Mat. 17:1-8; Mali. 9:2-8)

28Lelo pānyụma bo gakīndịle amasịku lwele bo amalịle ukujoba syosa sịsịsị alinkummwega Petelị na Johanị na Jakobụ balinkufyuka pa Kyamba pakwịpụ̄ta. 29Lelo bo alipakwịpụ̄ta ukuboneka kwa kyenị kyake kulinkwanduka, umwenda gwake gulinkubikuka ubwelụ. 30Po papo balinkunyomoka abāndu babili bịkujoba nagwe, balinkwaga bo ba Mose na Elịja, 31balinkubonekela mbusịsya bwa kumwanya balinkujoba na Jesụ isya bufwe bwake ubu bwajaga pakumalikisịgwa mụ Jelụsalemụ. 32Lelo Petelị na banịne aba bāli nagwe utulo twabakolịle, lolị bo balēmbwịke balinkuja māso lōsa, balinkububona ubusịsya bwake nabāndu babili aba bālyimịle nagwe. 33Lelo bo abāndu bịkusōkapo apa ali Jesụ, Petelị alinkujoba kumyake alinkuti: Malafyale kunụnụ fị̄jo apa tuli apa! Tụkujēngaga īhēma ịtatu, jimo jikujaga jako, jimo ja Mose, ijīngi jikujaga ja Elịja. (Akāsyagēnịe bunụnụ isị ājobaga). 34Bo alipakujoba sịsịsị, lyalị̄sịle ilịbīngu lyabakụpikị̄le; balinkutetema bo bịkwịngila mwịbīngu. 35Po papo ilịsyu lilinkusōka ukufụma mwịbīngu lilinkuti: Uju jo Mwanāngu, unsūngulịgwa gwangu; jo mụmpilikisyege! 36Lelo bo ilịsyu likịbịle balinkwaga Jesụ asyele mwene ịtolo: Abafụ̄ndịgwa balinkusịta ukujoba nasịmo kumụ̄ndu jumo isị bāsịbwene mmasịku galagala.

Jesụ ịkummbūmbulusya unndumyana gwa mbepo īnyalị

(Mat. 17:14-18; Mali. 9:14-27)

37Pị̄sịku ilya kilābo kyake, bo basụlwịke ukufụma pakyamba, ikilūndilo ikikulūmba kilinkwaganịla nagwe. 38Po papo balinkunyomoka umụ̄ndu jumo nkilūndilo kilakila ịkukụ̄ta ịkuti: Mmanyịsị, ngukusūma ukāngētele umwanāngu unndumyana uju ali jumojwene ntiga; 39ukēte, īmbepo īnyalị jịkunkola, po nakalīnga ịtolo ịkwenda nukukụ̄ta; jịkunnịongotolanịa ịkusōka nuntotōfụla kukanwa, jịkwendelela ukummōnānga, jitịkunndekela mbibi, bojịkusōka jịkunndeka atokịle. 40Nābasūmịle abafụ̄ndịgwa bāko ukujisōsya lolị bātolị̄gwe. 41Jesụ ālyamwịle ātịle: Mwe bāndu mwe basịtalwịtiko mwe banịongafụ umwe, mbele pōkị ukuja nanụmwe? Ngutigi lya lyambepa kumyinụ mpaka ndilị? Ntwale kuno umwanāko. 42Lelo bo unndumyana ịkusegelela īmbepo īnyalị jilinkummbiga pāsi jilinkuntwalila ilị̄nyịkị. Lolị Jesụ alinkujikemela īmbepo īnyalị, alinkummbūmbulusya umwanịke alinkunnị̄nga ugwịse. 43Bōsa balinkubuswịga ubukulūmba bwa Kyala.

Jesụ ịkusịjoba kangi isya bufwe bwake

(Mat. 17:22-23; Mali. 9:30-32)

Lelo bo abāndu bakāli bịkusị̄swiga syosa isị ābōmbịle, alinkubabūla abafụ̄ndịgwa bāke alinkuti: 44Mụgakolege amasyu aga ngujapakubabūla; Nnyamụ̄ndu ịkujapakupēgịgwa mmaboko ga bāndu. 45Lolị bakāsyagēnịe isị ājobaga sịsịsị, syalịfịsịle kumyabo ukuti bangasyaganịaga; kangi bātị̄laga nukunndālūsya isyanōngwa sịsịsị.

Jwanị unkulūmba ukukīnda abanịne bōsa?

(Mat. 18:1-5; Mali. 9:33-37)

46Ulukānị lulinkutụpụka nkāti mmyabo ukuti āli jo aliku unkulūmba ukukīnda bōsa. 47Lolị bo Jesụ asyagēnịe isị bịnogonaga mụ̄nda mmyabo, ālimmwegịle umwanịke ālinsegelị̄sye kumyake, 48alinkubabūla alinkuti: Gwesa umụ̄ndu uju umwanịke uju ịkummwambilila mụngamụ jangu bo ānyāmbilị̄le une, kangi gwesa uju ịkunyāmbilila une bo ammwambilị̄le uju ālindumịle une, buno unnāndi ukukīnda mwesa nkāti mmyinụ jo nkulūmba kuli mwesa.

Uju akakīndana nanụmwe jo ali ulubafu lwinụ

(Mali. 9:38-40)

49Johanị ālyamwịle atịle: Malafyale twalimmbwene jumo umụ̄ndu uju mbepo īnyalị āsịsokesyaga mụ ngamụ jako, lelo twalinkānị̄sye, papo akaja gwa nkilūndilo kyitu. 50Lolị Jesụ ālimmbūlịle ātịle: Komma ukunkānịsya, namanga uju akakīndana nanụmwe jo ali ulubafu lwinụ.

Akāja akanāndi ka mụ Samalịja kịkukāna ukummwambilila Jesụ

51Lelo bo akabalilo kasegelị̄le akākwegelịgwa Jesụ ukubūka kumwanya alinkutụmụla ukubūka mụ Jelụsalemụ. 52Abatwalandumi, alinkubalōngosya nkyenị, bo akāli umwene, balinkwakwịngila nkāja kamo akanāndi kā Basamalịja, ukwakuntendekekesya ubujo; 53lolị abāndu bakāliganịle ukummwambilila papo ālabilaga mụ Jelụsalemụ. 54Lelo bo abafụ̄ndịgwa bāke ba Jakobụ na Johanị basịbwene sịsịsị, bātịle: Malafyale, bule kulōnda ukuti tubakōlelele umōto ukufụma kumwanya gubōkye gubamale? 55Loli umwene alinkusyụtụka, alinkūmana nabo alinkuti: Mụkamanya ukuti mụli ba Mbepo gwa luko lukị. 56Lelo po papo Jesụ nabafụ̄ndịgwa bāke balinkubūka nkāja akanāndi akāngi.

Aba bịkulōnda ukuja bakunkōnga Jesụ

(Mat. 8:19-22)

57Lelo bo bịkwenda mụnsebo, umụ̄ndu jumo alinkujoba kumyake alinkuti: Ngukukōngaga kōsa kuno kubūka. 58Jesụ ālimmbūlịle ātịle: Utūmbwe tuli nimị̄na, kangi īnjunị sịli nifịfụ̄mbwa; lolị Nnyamụ̄ndu akaja na pabulambalịko untu gwake. 59Kujūngi ajobịle ātịle: Ngongaga! Loli umwene ātịle: Malafyale, leka tāsị ngansyile Tāta. 60Lolị ālimmbūlịle ātịle: Baleke abafwe babasyilege abafwe bābo. 61Ujūngi ātịle: Gwe NTWA, ngulōnda ukukukōnga; lolị tāsị ngabalage abāmyitu kukāja. 62Jesụ ālimmbūlịle atịle: Umụ̄ndu gwesa uju ịkubīka ikiboko kyake pị̄kūmbulu po kangi akētege kūnyụma, jo akabagila nkitāngālala kya Kyala.

Currently Selected:

Luka 9: NYB96

Highlight

Copy