Luka 7

Jesụ ịkummbūmbulusya ummbōmbị gwa nkulūmba gwa basịkali

(Mat. 8:5-13)

1Lelo bo amalịle ukujoba syosa isị abāndu bāpilikaga alinkwịngila mụ Kapelịnaumụ. 2Lelo unkulūmba gwa basịkali āli nummbōmbị uju ālinnganịle fị̄jo, uju ali mmbịne fị̄jo āli pị̄pị nukufwa. 3Bo apilị̄ke isya Jesụ alinkubatuma kumyake abakulūmba ba Bajụ̄ta kukunsūma ukwịsa kukummbūmbulusya ummbōmbị gwake. 4Lelo bo bafịkịle kwa Jesụ balinkupyelesya fị̄jo kumyake balinkuti: Abagị̄le ukummbōmbela sịsịsị ugwe, 5namanga akiganịle ikikolo kyitu, kangi atujēngị̄le īnyụ̄mba ja kwịpūtilamo. 6Po papo Jesụ alinkubūka nabo, lelo bo pasyele panāndi ukufịka pa nyụ̄mba ja nsịkali unkulūmba, unsịkali unkulūmba alinkubatuma abakamụ ukwakummbūla kukūnjila ukuti: Ungịkatasyaga gwe NTWA, buno ngabagila ukuti ugwe gwịngilege nkitēmbe kyangu; 7Syo isị sịmbelị̄le ukuti nāngị̄sa jujune kumyako. Joba liịsyu lyene, ummbōmbị gwangu ịkubūmbulukaga. 8Buno ndimụ̄ndu ịtolo mbīkị̄gwe mmalūndi mbakulūmba, na nịne ndi nabasịkali pāsi pamyangu: Linga ngunndagila jumo nguti: Būka kubulibe, ịkubūka; kangi linga ngujoba kujūngi nguti: Ịsaga kuno, ịkwịsa; linga ngujoba kummbōmbị gwangu nguti: Bōmba isị, ịkubōmba. 9Lelo bo Jesụ apilị̄ke sịsịsị alinkunswịga, alinkubasyụtukila abāndu ikilūndilo aba bankōngaga alinkuti: Nịkubabūla nịkuti na mụ mwa Ịsịlaelị ngalwagamo sịku ulwịtiko bo lulūlu. 10Lelo bo bagomwịke kukāja aba bātumị̄gwe balinkwakwaga ummbōmbị abūmbulwịke.

Jesụ ịkunsyusya umwana unndumyana gwa nkị̄kulu umfwile

11Kilābo kyake alinkubūka nkāja aka bịkuti Nainị, abafụ̄ndịgwa bāke nikilūndilo kya bāndu ikikulūmba balinkubūka nagwe. 12Lelo bo basegelị̄le pakipata kya nkāja, balinkwaga abāndu bapīmbịle umfị̄mba gwa mwana unndumyana gwa nkị̄kulu umfwile, uju ālimo mwene mụnna umfwile jula, bịkubūka kukunsyila abāndu ikilūndilo ki kị̄ngị, balōngosēnịe nagwe umfwile. 13Lelo bo UNTWA ammbwene umfwile alinkummbōnela nkisa alinkummbūla alinkuti: Ungalilaga. 14Po papo alinkusegelela alinkulupalamāsya ulutato, aba bālimpīmbịle balinkwenda nukwima. Umwene ātịle: Nndumyana, nịkukubūla nịkuti sụmụka. 15Po papo umfwe jula alinkwenda nukutūgala, alinkwanda ukujoba. Po papo umwene alinkunnị̄nga unna. 16Ulutēnde lulinkwenda nukubāga bōsa; balinkuntụ̄fya Kyala balinkuti: Unkụ̄ngụlụka unkulūmba atụpwịke nkāti mmyitu! Kyala ịsịle nkubapoka abāndu bāke. 17Po papo īnōngwa syake sịsịsị sịlinkubalanịla mụ Jụtaị mōsa nkị̄su kyosa na mfị̄su fya mụmbali fyosa.

Abatumịgwa aba bāfụmịle kwa Johanị Umōsị

(Mat. 11:2-19)

18Abafụ̄ndịgwa ba Johanị bālimmbūlịle Johanị syosa sịsịsị. 19Po Johanị abakōlị̄le abafụ̄ndịgwa bāke babili, alinkubatuma ku NTWA, alinkuti: Mụkanndālūsye ukuti kali jo uju bạ̄tigi ịkwịsaga, pamo tunngụ̄lilege alịko umwene? 20Lelo bo abāndu bala bị̄sịle kumyake bātịle: Johanị Umōsị atutumịle kumyako kukulālūsya ukuti: Kali jo ugwe Johanị ạ̄tigi ịkwịsaga, pamo tunngụ̄lilege alịko umwene? 21Mụ̄sala jilajila ābabūmbulwịsye abāndu īmbūngo sịnyịngị, īmbūngo sya kilalīlali nisya mbepo īnyalị, abafwamāso bị̄ngị alinkubapelela ukukēta. 22Lelo alinkubāmụla alinkuti: Amụbūkege mụkammbūle Johanị isị mụsịbwene naisị mụpilị̄ke: Abafwamāso bịkukēta, aba bịkumyonyoka bịkwend'ịtolo, abā bukoma baponịle, abā mapuli bịkupilika, abafwe basyusị̄gwe, abalōndo balūmbililị̄gwe īnōngwa īnụnụ. 23Nsangalufụ uju atịkwịkịnyamo nasịmo mmyangu.

24Lelo bo aba ābatumịle Johanị babukịle, Jesụ alinkwanda ukufịbūla ifịlūndilo isya Johanị alinkuti: Mwabūkaga nkukēta fịkị mmatēngele? Ulutete ulu lụkupetanịka ku mmbelo? 25Kali mwabūkaga kukukēta fịkị? Umụ̄ndu uju afwele imyenda imịtakanyịfụ? Kābuno abāndu aba bịkufwala imyenda imịlabanịe aba bali mmbūmị ubwa kusịtakufụ̄mbwa nafịmo bo bali mfịtāngālala. 26Po lelo mwabūkịle kukukēta fịkị? Unkụ̄ngụlụka? Une nalolị nịkubabūla nịkuti umwene akīndịle napabukụ̄ngụlụka. 27Uju jo uju āsị̄mbị̄gwe mwakalata apa ịkuti: Keta, ngukutumilaga ugwandumị gwangu ugwa kukutalila nkyenị, kukukutendekekesya īnjila. 28Nịkubabūla nịkuti mbāndu bōsa aba bapāpị̄gwe na bakị̄kulu akajako najumo unkulūmba ukunkīnda Johanị; lolị unnāndi kuli bōsa nkitāngālala kya Kyala jo ankīndịle Johanị ubukulūmba. 29Bo bapilị̄ke sịsịsị abāndu bōsa nabasōngesyasōngo balinkusịtika isya bugolofụ sya Kyala balinkōsịgwa ulōsyo lwa Johanị; 30lolị Abafalịsaị na bamanyandagilo ndagilo balinkusịta isị Kyala ābalōndelaga balinkukāna ukōsịgwa na Johanị. 31Umwene alinkūmilisya ukujoba alinkuti: Abāndu ba lilino aba mbafwanịkisyege nīfịkị? Kali bali bo ifịkị? 32Bafwene bo abakeke aba batūgēle mụ̄sokonị bikukōlelana bịkuti: Tubakubị̄le īfịlịmbị lolị mụkakịnapo, tupālile īfwa lolị mụkalilapo. 33Johanị umōsị ālisịle, alinkufịpīka ifị̄ndu alinkusịtakunwa nubwalwa bwa māfị̄lu, umwe mụlinkuti: Ali nimbepo īnyalị. 34Nnyamụ̄ndu ịsịle ịkulya ịkunwa, umwe mụkuti: Kēta, umpafụ uju kangi unngālabwalwa, ummanyānị gwa basōngesyasōngo nabatulanōngwa. 35Amahala ga Kyala gabonị̄ke ukuja gānalōlị kuli bōsa aba bịkugāmbilila.

Jesụ pa nyụ̄mba ja Sịmonị Umfalịsaị

36Po papo Umfalịsaị jumo alinkummbilikila Jesụ kukulya ifị̄ndu kunyụ̄mba jake, alinkubūka nnyụ̄mba ja Mfalịsaị jula, alinkutūgala pakulya pa Mesa. 37Lelo ālimo unkị̄kulu jumo nkāja kala uju āli ntulanōngwa, lelo bo apilị̄ke ukuti atūgēsye ali pakulya nnyụ̄mba ja Mfalịsaị alinkutwala ikipake kya nyēmba sya lūma ulunụnụ, 38alinkwima kūnyụma kumyake mmalūndi mmyake, lelo bo ịkulila alinkuntonyekesya mmalūndi amāsosị gāke; alinkumpyasīla amāsosị mmalūndi ninywịlị syake, alinkumfịpa amalūndi alinkugapaka ninyēmba. 39Lelo bo asịbwene sịsịsị Umfalịsaị uju alimmbilikị̄le kufị̄ndu, alinkujobela akāmụ̄nda alinkuti: Linga umụ̄ndu uju āli nkụ̄ngụlụka nalolị ngali amēnye ukuti unkị̄kulu uju ịkumpalamāsya gwa luko lukị, ukuti ntulanōngwa. 40Po papo Jesụ alinkummwamụla alinkuti: Sịmonị, ndinasyo sịmo isya kujoba nanụngwe. Ālyamwịle ātịle: Syafịkị, Mmanyịsị. 41Ātịle: Unkopesyandalama jumo āli nāba bākopịle kumyake (aba ābamelelaga) babili. Jumo ākopịle īndalama bāmịa bahāno, ujūngi ākopịle amalōngo mahāno. 42Lelo bo batolịgwe ukunhōmba, alinkwenda nukubaswa bo babili. Lelo mụli bo babili bababa jo aliku uju ịsakunnganaga fị̄jo? 43Sịmonị ālyamwịle ātịle: Ngwịnogona ukuti uju ālindekị̄le īndalama īnyị̄ngị. Ālimmwamwịle ātịle: Utalwịsye. 44Po papo alinkusyụtụka alinkunkēta unkị̄kulu, alinkunndālūsya Sịmonị alinkuti: Ummbwene unkị̄kulu uju? Nị̄ngị̄le nnyụ̄mba jako, ukāmba na mīsi nagamo gakusụgụsụla mmalūndi, lolị umwene āndịmịsye mmalūndi na māsosị gāke ēndịle nukumbyasīla ninywịlị syake. 45Ugwe ukāfịpapo, lolị umwene ukufụma lulo nịngilīlaga mụno akalekapo ukufịpa mmalūndi une. 46Ukāmbakapo ninyēmba kuntu, lolị umwene āmbakịle ni nyēmba mmalūndi. 47Fyobēne lelo nịkukubūla ukuti īmbị̄bị syake īnyị̄ngị sịswegị̄gwe, papo anāngị̄sye ulugano ulukulūmba, lolị uju ịkuswegịgwa panāndi jo uju ulugano lwake lunāndi. 48Po papo Jesụ alinkummbūla unkị̄kulu jula alinkuti: Uswegị̄gwe īmbị̄bị syako. 49Lelo aba bạ̄lyaga nagwe pamēsa balinkwenda nukwịnogona mụ ndụmbụla syabo balinkuti: Jwanị jujuju jo ịkuswa ni mbị̄bị? 50Lolị umwene Jesụ alinkummbūla unkị̄kulu jula alinkuti: Ulwịtiko lwako lukupokịle; būkaga nulutēngāno.

Currently Selected:

Luka 7: NYB96

Highlight

Copy