Luka 21

Akābupe aka āsopịle unkị̄kulu umfwile

(Mali. 12:41-44)

1Po papo Jesụ alinkwịnula amāso alinkubakēta abakabị bo bịkusopa ifyabupe fyabo nkibokosị kya kubūngānịkisyamo īndalama sya nyụ̄mba īnyị̄kemo; 2alinkwaga unkị̄kulu umfwile unndōndo jope ịkusopamo utukobịlị tubili. 3Jesụ ātịle: Nalolị nikubabūla nịkuti; unkị̄kulu umfwile unndōndo uju abakīndịle bōsa ukusopa; 4namanga bōsa aba basopịle ifyabupe fyabo papo bali nafyo fị̄ngị fịkīndilị̄le, lolị umwene mbulōndo bwake asopịle fyosa ifị ali nafyo ifyakumpoka ku njala.

Jesụ ịkujoba isya kupāngulịgwa kwa nyụ̄mba īnyị̄kemo

(Mat. 24:1-2; Mali. 13:1-2)

5Lelo bo bamo bịkujoba isya nyụ̄mba īnyị̄kemo mụno janokesị̄gwe na mabwe amapala nifyabupe, umwene ātịle: 6Isyatūndu utu mụkukēta utu, gịkwịsaga amasịku apa nalịmo ilị̄bwe litịsakulekịgwaga pabujo bwake; gōsa gịsakubụlụtụlịgwaga.

Ubutolwe ni ngubilo

(Mat. 24:3-14; Mali. 13:3-13)

7Balinkunndālūsya balinkuti: Mmanyịsị, syo sịkwịsaga ndilị sịsịsị, kangi kyo kimanyịlo kiliku ikyakwịsakumanyịlamo ukuti sịkujapakuboneka? 8Umwene ātịle: Mụje māso ukuti najumo angịsakubasyobaga; namanga bị̄ngị bịsakwịsilaga mụngamụ jangu bātigi: Une ne Jesụ! Kangi bātigi: Akabalilo kali kifụkị! Bo mụngịsakubakōngaga. 9Kangi bo mụkupilika isya bwịte nubufwalanganịfụ mụngịsakunyomokaga; papo isị syo sịbagị̄le ukutala ukuboneka botāsị sịkāli ukwịsa isya kubumalikilo.

10Alinkwandisya kangi alinkuti: Ikikolo kimo kịsakulwaga nikikolo ikīngi, ubulagilị bumo bwịsakulwaga ubwịte nubulagilị ubūngị; 11twịsakubonekaga utusenyēnda utukulūmba, mfị̄su mfị̄su jịsakugwagajisakukị̄ngulịgwaga injala nimbūngo sya fịlalilali; ukufụma kumwanya fịsakubonekaga ifị̄ka ifịpelalutēnde nifị̄swigu ifịkulūmba. 12Lolị bōtāsị sịkāli ukwịsa syosa sịsịsị, bịsakubakolaga umwe nukubatamya. Bịsakubatwalaga na nnyụ̄mba sya kwịpụ̄tilamo nkulōngịgwa na nnyụ̄mba sya bannyololo. Mwịsakutwalịgwaga nkyenị mmbanyafyale na balindililakị̄su kunōngwa ja ngamụ jangu. 13Ulu lo lwịsakujaga lusako kumyinụ ukulisịsịmikisya ilịbāngilị. 14Buno buno lelo mụtụmụle mụndụmbụla syinụ ukuti mụtịkwịbīkilaga isya kwịlwila kwinụ bo akabalilo kakāki ukwịsa, 15papo une nịmwene nịsakubapaga amaka ga bujobị na mahala aga akajako najumo ugwakwịsakumanya ukugakānịka pamo ukugapị̄nga. 16Bope nababapāpị bīnụ, nabāmyinụ, nabakamụ bīnụ nabị̄nīnụ bịsakubabīkaga mmaboko ga balugu; bamo nkilūndilo kyinụ mwịsakugogịgwaga; 17mwịsakubēngịgwaga nabāndu bōsa panōngwa ja ngamụ jangu. 18Lolị nalumo nulunywịlị lwapantu gwinụ lutịsakufwaga. 19Kunōngwa ja bufịndang'oma bwinụ mwịsakubwagaga ubūmị bwinụ.

Jesụ ịkujoba isyakupāngulịgwa kwa Jelụsalemụ

(Mat. 24:15-21; Mali. 13:14-19)

20Lolị linga mwịsịle kwaga Jelụsalemụ asyungūtilị̄gwe nifịlūndilo fya bwịte, po mwịsemụmanyege ukuti ịkuja pakupalānganịgwa. 21Po aba bali mụ Jụtaị bịsebabopelege mfyamba, kangi aba bali nkāti nkāja bịsebasāmịlege mbūngi, aba bali mfị̄su fya mụmbali bangịsakwịngilangamo nkāja. 22Namanga amasịku galagala go masịku ga lubụkisyo ukuti mo sị̄silege syosa isị sịsị̄mbị̄gwe mwakalata. 23Mmasịku gala bahīlị abakị̄kulu aba bali nifịfụba naba bịkōngesya abāna! Ubukamandanịgwa ubukulūmba bwịsakwịsaga pakị̄su, īngalalisị sya Kyala sịsakubagwilaga abāndu; 24bamo bịsakugogịgwaga nulūbo, abāngi bịsakupịnyịgwaga mfịkolo fyosa. Jelụsalemụ ịsakukanyangịgwaga na bāpānja ukwịsakufịka papo akabalilo kābo kịsakumalikilaga.

Ukwịsa kwa Nnyamụ̄ndu

(Mat. 24:29-31; Mali. 13:24-27)

25Fịsakubonekaga ifị̄swigu mwịsuba, na mmwesị na mụndōndwa. Ifịkolo fyosa pāsi apa fịsakujaga ndutēnde bo kusobịle kulekịle, bo inyanja jisāmbwịke jịkōbela. 26Abāndu bịsakusịlikaga kunōngwa ja lutēnde bo bịkusịgụ̄lila isị sịsakukịsilaga ikị̄su, namanga amaka ga kumwanya gịsakujūnganịkaga. 27Po lelo Nnyamụ̄ndu ịsakubonekaga, bo ịkwịsa mwịbīngu namaka amakulūmba nubusịsya. 28Lelo linga mwịsịlekwaga sịkuboneka sịsịsị po mwịse mwimege mwịnulege imịtu gyinụ, namanga lulalula bo ukubāngịgwa kwinụ kuli kifụkị.

Ukumanyịkisya mụ nkuju

(Mat. 24:32-35; Mali. 13:28-31)

29Po papo alinkubabūla ikifwanịkisyo kya kubalilamo alinkuti: Amwịnogonege isya nkuju nimịpịkị igīngi gyosa. 30Linga mwagịle gyandịle ukusefụka po mụmanyege ukuti umpīngo guli kifụkị ukwịsa. 31Bo sịli syope na sịsịsị, linga mwịsịlekwaga syosa sịsịsị sịkuboneka po mwịsemụmanyege ukuti ikitāngālala kya Kyala kili kifụkị ukwịsa. 32Nalolị nikubabūla une nịkuti abāndu ba lilino aba batịsakujōngaga bōsa bo tāsị sịkaboneka syosa sịsịsị. 33Ikya kumwanya nikyapasi fịkujōngaga, lolị amasyu gangu gatịsakujōngamo sịku.

Ukulōndịgwa kwa kugụ̄lila

34Mụje māso, mwandege mụngị̄kolanịaga nukupafụka ifị̄ndu nukwịtekēlela ni mbāsyo sya pakị̄su, ukuti mụngịsakwagaga papo Ilị̄sịku libāmbūlēnịe bo mụli bubịbụbị 35Ukufwana lutāmbo. Namanga lịsakubị̄silaga abāndu bōsa nkị̄su kyosa. 36Amụjege māso utubalilo tōsa mwịpụ̄tege ukuti mwịsemụkabēge amaka ga kuponela kuli syosa isị sịsakubonekaga nagā kwịsakwimila nkyenị mwa Nnyamụ̄ndu.

37Mmasịku gōsa galagala Jesụ alinkumanyịsya nnyụ̄mba īnyị̄kemo, lolị pakilo alinkusōka alinkwakugona pa kyamba kya Mịsyunguti. 38Kukuti lubūnju abāndu bōsa balinkulābila ukwịsa kukumpilikisya nnyụ̄mba īnyị̄kemo.

Currently Selected:

Luka 21: NYB96

Highlight

Copy