Luka 22

Ukutendekesya mbutị̄tu isya kunngoga Jesụ

(Mat. 26:1-5; Mali. 14:1-2; Joh. 11:45-53)

1Lelo ikyaka kya Kisyesye ikisịta Nkese iki bịkuti Pasa kyasegelị̄le. 2Abapụ̄tị abakulūmba nabamanyandagilo balinkulōnda injila ja kunngogela Jesụ; namanga bābatị̄laga abāndu.

Jụ̄ta ịkwịtika ukummbīka mmaboko ga balugu Jesụ

(Mat. 26:14-16; Mali. 14:10-11)

3Po papo setano alinkwịngila mwa Jụ̄ta uju bạ̄tigi Kalyotị, uju āli jo jumo mwa kalōngo na babili; 4jo alinkubūka ku bapụ̄tị abakulūmba nāba bālindililaga īnyụ̄mba īnyị̄kemo alinkwakujobana nabo isya kummbīka Jesụ mmaboko gābo. 5Abēne balinkuhoboka balinkufị̄nga nagwe ukunhōmba īndalama. 6Po lelo alinkwịtika, alinkulōnda akabalilo akanụnụ akākubanị̄ngila Jesụ kisịta kusịmanya abāndu.

Jesụ ịkutendekesya ukulya Pasa

(Mat. 26:17-25; Mali. 14:12-21; Joh. 13:21-30)

7Lelo po papo lilinkufịka ilị̄sịku lya Kisyesye Ikisịtankese ilya kwịkemēkesya akang'ōsị ka Pasa. 8Po lelo Jesụ alinkubatuma ba Petelị na Johanị alinkuti: Amụbūke mụkatendekesye akang'ōsị ka Pasa tukalyemo. 9Balind̄alūsị̄sye bātịle: Tukatendekekesye kūgu? 10Ābabūlịle ātịle: Mụkēte, linga mwịngị̄le nkāja akakulūmba mụkwakwaganịla numụ̄ndu uju ịtwikịle īndeko ja mīsi; jo mụkankōngege ukwakufịka nagwe kunyụ̄mba iji ịkwakwịngilāngamo, 11po mụkammbūlege umwenenyụ̄mba mụkātigi: Ummamyịsị ịkukulālūsya ịkuti: Kili kūgu ikyụmba kya bahēsya ikyakulīlamo pasa une pamopēne na bafụ̄ndịgwa bāngu? 12Po ịsakubanāngisyaga ikyụmba ikinywamụ ikya kwịjulu iki kili nifịkota, nimēsa nutūndu utūngi tōsa; mo mụkatendekekesyege akang'ōsị mụlamụla. 13Po papo balinkubūka, balinkwakufyaga bo mụmo ababūlị̄le; balinkwenda nukutendekekesya akang'ōsị ka Pasa.

Ifị̄ndu ifị̄kemo fya NTWA ifyamajolo

(Mat. 26:26-30; Mali. 14:22-26; 1Kol. 11:23-25)

14Lelo bo kafịkịle akabalilo, alinkutūgala pakulya pamopēne na bafụ̄ndịgwa bāke. 15Alinkubabūla alinkuti: Nnyonyịlwe ukulya nanụmwe pasa uju bo tāsị ngāli ukukubilwa; 16nịkubabūla nịkuti ndịsakwandisyamo sịku kangi ukulya ukwịsakufịka papo jisakubonekelaga Nkitāngālala kya Kyala. 17Po papo Jesụ alinkwega ifị̄nga, alinkugwa ulupị kwa Kyala, alinkuti: Ele ifị̄nga iji mụjabanege; 18nịkubabūla nịkuti: Ukufụma lilino ndịsakwandisya ukunwa ubwa seke sya māfị̄lu ukwịsakufịka papo ikitāngālala kya Kyala kịsakwịsilaga. 19Kangi alinkwega ikisyesye, lelo bo agwịle ulupị alinkukimenyanịa alinkubanị̄nga, alinkuti: Ugu go mmbili gwangu [ugu gupegị̄gwe kunōngwa jīnụ, mụbōmbēge sịsịsị ukuja sya kungūmbukilamo. 20Mụnjila bo jilajila alinkubapa jope nị̄fīnga bo balị̄le ifya majolo alinkuti: Īfị̄nga iji lo lwịtikano ulupya lwa Kyala ulu lukolekelị̄gwe niịlopa lyangu ili lịkuja pakubōnekela umwe.] 21Lolị, mụkēte! Uju ịkuja pakumbīka mmaboko ga balugu ali papapa ngulya nagwe pamēsa! 22Umwene Nnyamụ̄ndu jo gwakị jo ịkufwaga bo mụmo Kyala āsịtụmụlị̄le ngānị, lolị ahīlị uju ịkummbīka Jesụ mmaboko ga balugu! 23Po papo balinkwanda ukulālūsanịa ukuti kali jo aliku uju ājaga pakubōmba sịsịsị.

Ukukānịkana isya bụkulūmba

24Kangi lulinkutụpụka ulukānị nkāti mmyabo ukuti angali ịkuja jo aliku unkulūmba kubanịne bōsa nkilūndilo kyabo. 25Umwene alinkubabūla alinkuti: Abanyafyale ba bāpānja bịkubalāmbika abāndu bābo, lolị abalagilị bababa bịkujobịgwa ukuja Bamanyānị ba Bāndu. 26Loli umwe bo sịkaja kumyinụ; umwe lolị, unkulūmba ukukīnda mwesa nkilūndilo kyinụ jo fịkuti ajege jo nnāndi kuli bōsa, unndōngosị fịkuti afwanege bo ummbōmbị. 27Namanga kali nkulūmba aliku kunnịne, uju ali pamēsa pakulya pamo uju ịkuntwalila ifị̄ndu? Akaja nkulūmba uju atūgēle pakulya. Lolị une nkilūndilo kyinụ ndi bo ummbōmbị.

28Lolị umwe jo umwe mwali nanịne bwịla ịtolo bo ngugelịgwa; 29kangi bo apa Tāta ālīmbēle ubulagilị bo nanịne nịkubapaga ubulagilị, 30ukuti mụkalyege nukunwa nanịne nkitāngālala kyangu, mụkatūgalege pafịkota fya butwa pakufịlōnga ifịkolo fya Ịsịlaelị kalōngo nafịbili.

Jesụ ịkukụ̄ngụlụka ukukāna kwa Petelị

(Mat. 26:31-35; Mali. 14:27-31; Joh. 13:36-38)

31Po papo alinkujoba alinkuti: Sịmonị, Sịmonị kupilika! Setano abasūmịle umwe ukuti abapētege ukufwana nganụ, 32lolị ngwịpụ̄tị̄le ugwe, Sịmonị, ukuti ulwịtiko lwako lungamalikaga; lelo bo gwịsịle kugomokela kumyangu gwịs'ubakasyege abāmyinụ. 33Petelị ālyamwịle ātịle: Gwe NTWA, une nịlīnganịkị̄sye ngānịla, nalinga bịkukupịnya mụnnyololo, pamo bịkukugoga, ndipānyụma pamyako, mụnnyololo na mmbufwe. 34Umwene ātịle: Ngukubūla Petelị, ikilo kikīki īngongobe jitịsakubilikilaga bo tāsị ugwe ukāli ukukāna katatu ukuti ukāmanya une.

Akanyāmbi ka ndalama, nulūbo

35Lelo po papo Jesụ alinkubānịa abafụ̄ndịgwa bāke alinkuti: Bo mbatumịle īnjila akabalilo kala kisịta kanyāmbi, kisịta mfụko, pamo ifịlato bule fyālipo ifị mwapōndịlwe? Bālyamwịle bātịle: Nafịmo. 36Po umwene ābabūlịle ātịle: Lolị lilino uju ali nakanyāmbi kandalama akolelege, gōpe numfụko gwanjila bububo. Loli uju akaja nulūbo jo ūlisyege unselekesye gwake ukuti ūle ulūbo. 37Namanga nịkubabūla une ukuti isị sịsị̄mbị̄gwe mwakalata isị sịkuti: Agogelị̄gwe lumo nabị̄langomēlesyo une fịkuti sị̄sege nalolị, namanga isị syasị̄mbị̄gwe ukūmbala une sịkubonekaga nalolị. 38Abafụ̄ndịgwa bātịle: Gwe NTWA! Ukēte, tulinasyo īnyūbo ịbili papapa! Umwene ālyamwịle ātịle: Ē, sịfwene!

Jesụ ịkwịpụ̄ta pa Kyamba kya Mịsyunguti

(Mat. 26:36-46; Mali. 14:32-42)

39Po papo alinkusōka, bo mụno ulwịho lwake lwajīlị̄le alinkubūka ku Kyamba kya Misyunguti, abafụ̄ndịgwa bāke balinkunkōnga. 40Lelo bo afịkịle pabujo bula, alinkubabūla alinkuti: Amwịpụ̄tege ukuti ulupēfyo lungabāgaga. 41Po papo alinkubēpukila ukubūka pabutalịpo, pantāmbo gwa kufwana mmbutụ̄nyilo akabwe, alinkufụgama pakwịpụ̄ta alinkuti: 42Gwe Tāta, linga gwịganịle sokesyako une ifị̄nga ja lutamyo. Lolị komma kubwịgane bwangu, lolị isị gwịganịle ugwe syo sịbōmbị̄gwege. [ 43Po papo alinkuboneka ugwa ndumị ukufụma kumwanya ukwịsa kumyake alinkumpa amaka. 44Lelo bo ali nndukubilo ulukulūmba mụ̄nda mmyake, alinkwịpụ̄ta alinkūmīlisya fị̄jo; amafụkụ gāke galinkufwana matōndobya ga ịlopa bo gịkugwa pāsi.] 45Lelo bo asụmwịke ukufụma pala ịpụ̄taga alinkwịsa kubafụ̄ndịgwa alinkwịsakwaga bagonịle utulo kunōngwa ja busụlụmanịe, 46alinkubabūla alinkuti: Fịkị mụkugona utulo? Amụsụmụke mwịpụ̄tege ukuti ulupēfyo lungabị̄silaga.

Ukunkola Jesụ

(Mat. 26:47-56; Mali. 14:43-50; Joh. 18:3-11)

47Lelo bo akāli ịkujoba, kilinkwịsa ikilūndilo kyabāndu, umụ̄ndu jumo uju bạ̄tigi: Jụ̄ta īngamụ, uju ali jo jumo mwa kalōngo nababili bala, jo uju ākilōngolị̄le ikilūndilo. 48Lolị Jesụ ājobịle kumyake ātịle: Gwe Jụ̄ta! Kumbīka mmaboko ga balugu Nnyamụ̄ndu ukwendela mụnjila ja kumfịpa? 49Lelo bo abafundịgwa basịbwene isi syajaga pakuboneka, bālinndalūsị̄sye bātịle: Gwe NTWA, bule tubasēnge ninyūbo? 50Po papo umwịnābo jumo alinkwenda nukunsenga ummbōmbị gwa mpụ̄tị unkulūmba, alinkummwangula īmbulukutu ja kukiboko ikị̄līlo. 51Lolị Jesụ ātịle: Po papo leka! Alinkumpalamāsya īmbulukutu jake, po jilinkwenda nukumela kangi. 52Po papo lelo Jesụ alinkujoba nabapị̄tị abakulūmba nabalindilila nyụ̄mba īnyị̄kemo, na bakulūmba aba bālisịle kukunkola ātịle: Apa mwịsịle ninyūbo nindụ̄ha kukūngola une, mwịsịle kukunkola unndēbị? 53Apa nājaga nanụmwe bwịla nnyụ̄mba īnyị̄kemo mụkāngolaga. Lolị aka kabalilo kīnụ, kabalilo kabulagilị bwa ngị̄sị.

Petelị ịkunkāna Jesụ

(Mat. 26:57-58,69-75; Mali. 14:53-54,66-72; Joh. 18:12-18,25-27)

54Lelo po papo balinkwenda nukunkola Jesụ balinkubūka nagwe balinkwakummwịngisya nnyụ̄mba ja mpụ̄tị unkulūmba. Petelị alinkukōnga mụnyụma pabutalịpo; 55lelo bo bakosịsye umōto, pakāti pa lupaso batūgēle bịkōta umōto Petelị alinkōta nabo. 56Lelo bo unndīndwana jumo ugwambōmbo ammbwene mụnndangalila gwa mōto atūgēle, bo anndūlalị̄le ạ̄tile: Umụ̄ndu uju jope āli na Jesụ! 57Loli Petelị ākānịle ātile: Gwe nkị̄kulu, kōpe nukummanya ngammanya! 58Bo bangēlepo panāndi umụ̄ndu ujūngi alinkummbona Petelị alinkuti: Ugwe uli nnịne gwa bala. Lolị Petelị ālyamwịle ātịle: Kukuko ungāsakā! 59Kangi bo jikīndịle tutigi īsala, umụ̄ndu ujūngi kangi alinkwịlānga ukujoba alinkuti: Nalolị ịtolo umụ̄ndu uju jope āli na Jesụ; kābuno Nngalịlaị. 60Lolị Petelị ālyamwịle ātịle: Gwe mụ̄ndu ugwe, ngamanya kali kujoba syafịkị! Lelo nakalīnga ịtolo bo akāli nukumala ukujoba īngongobe jilinkwenda nukukōlela. 61Po papo UNTWA alinkusyụtụka alinkunkēta Petelị, Petelị alinkwenda nukukūmbuka isị UNTWA ālimmbūlịle isị ātịle: Kīkilo kikīki bo nīngongobe jikāli ukukōlela ugwe bo ukānịle katatu ukuti ukāmanya une. 62Po papo Petelị alinkusōka pānja, alinkulila amāsosị galinkummwịgalila na kummịlo.

Jesụ ịkōbeligwa nukukomịgwa

(Mat. 26:67-68; Mali. 14:65)

63Abāndu aba banndindililaga bo bankolịle, balinkunkịnila balinkunkoma. 64Balinkumpịnya ikitambāla kumāso po banndālūsyege bātigi: Lagusya! Jwanị uju akukomịle? 65Kangi balinkuntuka amahēlụ ga mị̄ngị.

Jesụ ịkutwalịgwa nkyenị nndukomāno lwa balōnganōngwa

(Mat. 26:59-66; Mali. 14:55-64; Joh. 18:19-24)

66Lelo bo ilị̄sịku lifịkịle, amafụmụ, abapụ̄tị abakulūmba na bamanyandagilo balinkukomāna ulukomāno, po papo Jesụ alinkutwalịgwa nkyenị Nndukomāno lwa Balonganōngwa. 67Balinkuti: Oko tubūle, bule ugwe gwe Mesịja? Ālyamwịle ātịle: Linga ngubabūla, mụtịsakunyị̄tika. 68Kangi linga ngubalālūsya sịmo, mụtịsakwamụla. 69Lolị ukufụma lilino Nnyamụ̄ndu ịkutūgalaga kulubafụ lwa kukiboko ikị̄līlo kya Kyala Umwenemaka gōsa. 70Bōsa bālālūsị̄sye bātịle: Bule lelo po uli Mwana gwa Kyala ugwe? Ābāmwịle ātịle: Bo mụkuja umwe mụkuti ndi Mwana gwa Kyala. 71Po papo balinkujoba balinkuti: Kali po tụkulōndaga bukētị bukị kangi? Tusịpilị̄ke jujuswe ukufụma nkanwa kāke!

Currently Selected:

Luka 22: NYB96

Highlight

Copy