Luka 20

Ukulālūsya isya maka ga Jesụ

(Mat. 21:23-27; Mali. 11:27-33)

1Ilị̄sịku limo bo Jesụ alipakubamanyịsya abāndu nnyụ̄mba ja kwịpụ̄tilamo, bo alipakulūmbilila īndumị īnụnụ, abapụ̄tị abakulūmba nabamanyakalata pamopēne na mafụmụ balinkwịsa. 2Balinkujoba nagwe balinkuti: Tubūle kubōmbela mmaka makị syosa sịsịsị, pamo jwanị jo akupēle amaka aga? 3Ālyamwịle ātịle: Nanịne ngubalālūsya; oko mbūla, 4ulōsyo lwa Johanị lwafụmịle kumwanya pamo kubāndu? 5Po papo balinkujobesanịa bābo batupu balinkuti: Linga tụkuti lwafụmịle kumwanya, ịsakutigi: Po fịkị mụkammwịtikaga? 6Lolị linga tukuti: Lwafụmịle kubāndu, abāndu bōsa bịsakututịkaga na mabwe; namanga sịbakolịle ukuti Johanị āli nkụ̄ngụlụka. 7Po lelo bālyamwịle ukuti bakāmēnye kuno lwafụmịle. 8Po Jesụ ābabūlịle ātịle: Nanịne ndịkubabūla amaka aga ngubōmbela sịsịsị.

Ikifwanịkisyo kya bāndu aba balyasị̄me unngūnda gwa māfị̄lu gwakuhōmbela

(Mat. 21:33-46; Mali. 12:1-12)

9Po papo Jesụ alinkwanda ukubabūla abāndu ikifwanịkisyo kya kubalilamo alinkuti: Umụ̄ndu jumo ālimịle unngūnda gwa māfị̄lu, alinkubāsịma ababyala māfị̄lu bakwịsakunhōmba, umwene alinkubūka kukị̄su kya kubutalị ko alinkwakugona akabalilo katalị. 10Bo akabalilo kafịkịle ālintumịle ummbōmbị kuli bala ābāsị̄me unngūnda, ukuti bampege sịmo īseke isị sịfụmịle mụnngūnda gwa māfị̄lu; lolị aba bālyasịmị̄gwe unngūnda gwa kuhōmbela balabala balinkwenda nukunkoma, balinkunngomola kisịta kumpa nafịmo. 11Po papo alinkuntuma ummbōmbị ujūngi; jope balinkunkoma nukummbōmbela īngosyasonị, balinkunkaga kisịta kunnīnga nafịmo. 12Kangi alinkwandisya alinkuntuma ummbōmbị ugwabutatu; uju jo balinkumfụlasya balinkuntāga pānja. 13Po lelo umwene nngūnda gwa māfị̄lu ātịle: Kali po mbōmbe fịkị? Nguntuma umwanāngu unnganịgwa; pamo jo bịkwakumpaga ulwimiko. 14Lolị bo aba bālyasịmị̄gwe unngūnda bammbwene, balinkubūlana balinkuti: Uju jo gwakwịngilapo ikilīngo, oko tunngoge, ukuti ikilīngo kijege kyitu. 15Po papo balinkunsōsya mụnngūnda gwa māfị̄lu balinkwenda nukunngoga. Po lelo umwenenngūnda gwa māfị̄lu ịsakubabōmbelaga syafịkị? 16Ịsakwịsaga abagogege abāndu bala, ēnde nukubapa abāngi ịtolo unngūnda gwa māfị̄lu. Lelo bo bapilị̄ke sịsịsị, bātịle: Syo fịkuti Kyala asịtandamịkege! 17Lolị alinkubakēta alinkujoba alinkuti: Kali lelo kokuti fịkị isị sịsị̄mbị̄gwe isị sịkuti: Ilị̄bwe ili bālisyokị̄le abajēnganyụ̄mba lị̄pelịle ukuja lyo ịbwe ilịkulūmba ilya pāngụto. 18Gwesa uju linga ịkugwa pị̄bwe lilīli ịsakumị̄sukanaga; lolị linga lịkunngwila jumo lịsakuntakanịaga.

Īnongwa ja kusōnga īsōngo

(Mat. 22:15-22; Mali. 12:13-17)

19Abamanyandagilo nabapị̄tị abakulūmba balinkulōnda unkunkola Jesụ palapala, papo bāmēnye ukuti bo ịkukijoba ikifwanịkisyo kyakubalilamo kila ābabalaga abēne; lolị bābatị̄lịle abāndu. 20Po papo balinkuntegelela, balinkuntumila abākuntendēla aba bafwanaga bakaja nasyo nasịmo ngīmba bākuntegeka naisị banndālūsyaga ukuti bankolele mbujobị bwake napo bammbīkege nkiboko kya nndindililakị̄su. 21Balinkunndālūsya balinkuti: Mmanyịsị tumēnye ukuti kutalusya ukujoba nukumanyịsya, umụ̄ndu utịkunsalila ukukōnga mmbūndu bwake, lolị kumanyịsya isya nalolị isị Kyala ịkusịlōnda kumụ̄ndu. 22Tubūle, bule mwịko uswe ukusōnga īsōngo kwa Kesale, pamo mụkaja mwịko? 23Lolị ābwagēnịe ubukomụ bwabo, ābabūlịle ātịle: 24Nangisya ulutalama. Lulị nikifwanị kyanị nubusị̄mbe bwanị? Bātịle: Bwa Kesale. 25Ābabūlịle ātịle: E, po ngīmba mpege Kesale ifya bukesale bwake, jope na Kyala mụmpege ifya pa bwakyala bwake. 26Po papo balinkutolịgwa nkyenị mmbāndu ukunkolela muli isị abōmbịle; lolị balinkubatama balinkubuswịga ubwamụlị bwake.

Īnōngwa ja kusyuka

(Mat. 22:23-33; Mali. 12:18-27)

27Po papo balinkwịsa kumyake Abasatukajị bamo, aba bịkuti ukusyuka kukajako, 28balinkunndālūsya balinkuti: Mmanyịsị, Mose ātusị̄mbị̄le ukuti linga ugwamyabo gwa mụ̄ndu jumo ịkufwa bo akalekamo mwana, umụ̄ndu jula kummbagị̄le ukuti ammwịngilēngepo unkasị, ampāpilengemo abāna ugwamyabo. 29Lelo bāliko abanyamụ̄ndu bahāno nababili; ugwa kwanda ālyegịle unkị̄kulu, ēnda nukufwa bo akapapamo abāna; 30ugwa kibili, 31nugwa kitatu bālimmwegịlemo unkị̄kulu jula, kangi bōsa bo bahāno nababili bāfwịle abasịtakulekamo mwana. 32Kūnyụma kuli bōsa unkị̄kulu jope alinkwenda nukufwa. 33Po lelo mmbusyuka unkị̄kulu jula ịsakujaga nkasị gwa aliku?

34Jesụ ābāmwịle ātị̄le: Abanyāmbala na bakị̄kulu ba nkị̄su iki bịkwega kangi bịkwegịgwa, 35lolị aba bubabagile ubujo bwa kumwanya naba basyukịle mmbafwe batịkwegana, 36papo abēne batịkwandisya kangi ukufwa namanga bafwene na bāndumị kangi bāna ba Kyala, namanga basyukisị̄gwe mbūmị ubupya ukufụma mmbafwe. 37Isyene isya kusyuka abafwe syo na Mose āsịnāngị̄sye pabwelụ mbusị̄mbe bwa nōngwa sya kisyanju iki kyalapilaga umōto apa ịkunnjoba UNTWA ukuja jo Kyala gwa Abụlahamụ, jo Kyala gwa Ịsịhaka kangi ukuja jo Kyala gwa Jakobụ. 38Umwene akaja jo Kyala gwa bafwe, lolị jo Kyala gwa būmị; namanga kumāso kumyake bōsa būmị. 39Po papo abamanyakalata bamo balinkwamụla balinkuti: Mmanyịsị, gwamwile kanụnụ. 40Namanga bātị̄laga ukunndālūsya isị̄ngị.

Ukulālūsya isya Mesịja

(Mat. 22:41-46; Mali. 12:35-37)

41Lolị Jesụ ābalālūsịsye ātīle: Po babagịle bulebule ukujoba ukuti Kilisịtị nnya Ndabitị? 42Namanga Ndabitị jūjo ịkujoba mwa kalata gwa Sabulị ịkuti: UNTWA ājobịle ku Ntwa gwangu ātịle tūgala kukiboko kyangu ikị̄līlo, 43mpaka papo abalugu bako ngubapelaga kakota kāko ka kubīkapo amalūndi gāko. 44Ndabitị bo ịkunnjoba bunobuno ịkuti: Ntwa; lelo po mwanāke bulebule?

Jesụ ịkubasoka abamanyandagilo

(Mat. 23:1-36; Mali. 12:18-40)

45Lelo bo abāndu bōsa bali pakumpilikisya, alinkubabūla abafụ̄ndịgwa bāke alinkuti: 46Mụje māso nabamanyakalata, aba bịkusyungūtila nkāja bo bafwele ifịlūndo, bịkulōnda ukuti abāndu babaponịege nulwimiko mụmbīngilo, bịkwịsalila ifịkota ifịnụnụ fyakutūgalapo nnyụ̄mba sya kwịpụ̄tilamo na mmbujo bwa pamwanya pakulya ifị̄ndu fya palusekelo, 47bịkupātila mbukomụ īnyụ̄mba sya bakị̄kulu abafwile, bịkwịpụ̄ta inyịpụ̄to īndalị isyakulabāsya ịtolo. Bababa bo bịsakukīndililaga ukufụ̄ndịgwa pị̄sịku lya bulōngị.

Currently Selected:

Luka 20: NYB96

Highlight

Copy