Luka 19

Jesụ na Sakaị

1Alinkwịngila mụ Jelịko, alinkukīsanịa, 2Ālịko jumo unsōngesyasōngo uju īngamụ jake āli jo Sakaị, uju āli nkabị. 3Alinkulōnda ukummanya Jesụ mụno ajīlị̄le, lolị alinkupōndwa ukummbona kunōngwa ja kilūndilo kya bāndu, namanga umwene āli mpīmba. 4Po papo alinkubopela nkyenị alinkwakukwela mụnkuju ukuti mo ankētelege namanga ali gwa kwenda īnjila jilajila. 5Lelo bo Jesụ afịkịle pa bujo bulabula, alinkukēta mmwanya alinkummbūla alinkuti: Sakaị sụlụka nakalīnga, kumbagị̄le une ukutūgasya pa nyụ̄mba jako umụsyugu. 6Po papo alinkusụlụka mbibimbibi alinkummwambilila nulusekelo. 7Lelo bo basịbwene sịsịsị bōsa balinkwenda nukwịbụnēsya balinkuti: Ị̄ngị̄le ukuja nhēsya gwa mụ̄ndu untulanōngwa. 8Sakaị alinkwima alinkujoba ku NTWA alinkuti: Gwe NTWA ikyuma kyangu ngujabanịa pakāti na pakāti kimo ngubanị̄nga abalōndo; uju linga nunsyobịle fịmo ngunngomolela ifyakufwana kana mụli ifị nālinsyobịle. 9Jesụ ālimmbūlịle ātịle: Umụsyugu ubupokị bwịsịle kunyụ̄mba iji, apa jope umụ̄ndu uju mwana unndumyana gwa Abụlahamụ. 10Namanga Nnyamụ̄ndu ālisịle kukubalōnda nukubapoka aba basobịle.

Ikifwanịkisyo kya ndalama sya sahabu

(Mat. 25:14-30)

11Bo abāndu balipakupilikisya sịsịsị, alinkūmīlisya ukubabūla ikifwanịkisyo. Namanga āsegelị̄le mụ Jelụsalemụ kangi abāndu bịnogonaga ukuti ikitāngālala kya Kyala kịkuja pakuboneka nakalīnga. 12Po lelo ātịle: Ālịko jumo umụ̄ndu ugwa ngamụ uju ābūkịle kukị̄su kya kubutalị kukwambilila amaka ga bunyafyāle, ātendekị̄sye ukugomokela kukāja bo āmbilị̄le ubunyafyale. 13Bo akāli ukusụmụka, ababilikị̄le ababōmbị bāke kalōngo, alinkubapa jumo jumo ulutalama lwa sahabu alinkubabūla alinkuti: īndalama isyo mụkyụlụkisyege mpaka pakabalilo aka nịsakwịsilaga. 14Lolị abāndu bāke bakālinnganịle, bālintumị̄le īndumị, jankōnga ukummbūla ukuti bakanndōndaga ukuja nndagilị gwabo. 15Lelo bo agomwịke āmbilị̄le amaka ga bunyafyāle, alinkubalagila ababōmbị balabala, aba ābapēle īndalama, ukubūka kumyake, ukuti afịmanye ifị bakābị̄lepo mbukyụlụsị. 16Untasị alinkusegelela kumyake alinkuti: Gwe NTWA ulutalama lwako lukabị̄lepo isị̄ngị kalōngo. 17Umwene ālimmbūlịle ātịle: Ubōmbịle kanụnụ, gwe mmbōmbị gwe nnụnụ! Namanga gwali mwịkilị na mfịnāndi; kujaga nndagilị gwa twaja utukulūmba kalōngo. 18Ummbōmbị gwabubili alinkwịsa alinkujoba alinkuti: Malafyale ngabị̄lepo īndalama sya sahabu ịhāno ukufụma nndutalama lumo ulu gwalimbēle. 19Uju ālimmwamwịle ātịle: Kulagilaga utwaja utukulūmba tuhāno. 20Alinkwịsa ummbōmbị ujūngi alinkuti: Malafyale, ulutalama lwako lwa sahabu ulu; nālufịsịle nkitambāla kya mmaboko. 21Nākutị̄laga papo uli nkali, kwega naifị ukābīkịle kangi kutōndola na mụno ukāsopịlemo. 22Ālimmwamwịle ạ̄tile: Ngukulōngela mụmmasyu gāko jujugwe aga ujobịle. Ūmēnye ukuti ndi nkali, ngwega naifị fịkaja fyangu kangi ngutōndola naifị ngābyele. 23Lelo po fịkị ukābīkaga īndalama syangu mụ bankị? Po angali nāmbilị̄le nisyakōngelapo pamwanya bo ngomwịke. 24Lelo po papo alinkujoba kuli aba bālyimịle palapala, alinkuti: Amwege kumyake ulutalama lwa sahabu, mụmpe ummbōmbị uju alinasyo īndalama kalōngo. 25Lolị bālimmwamwịle bātịle: Malafyale, syo isị alinasyo, kalōngo, lōsa ulu! 26Ālyamwịle ātịle: Nikubabūla umwe ukuti gwesa uju alinafyo fịmo, jo ịkōngelịgwāngapo nifị̄ngị; lolị umụ̄ndu uju akaja nafyo nafịmo, jo fịsakwegịgwaga nafịfịnāndi ifị ali nafyo. 27Lilino lelo isya balugu bāngu aba bakāndōndaga une ukuja Malafyale gwabo, mubatwale kuno, mụbagogege bo ngukēta!

Ukwịngila mụ Jelụsalemụ na kalụ̄lụ kābutolị

(Mat. 21:1-11; Mali. 11:1-11; Joh. 12:12-19)

28Lelo bo amalịle ukujoba, alinkutalapo nkyenị, bo ịkulabila ku Jelụsalemụ. 29Bo asegelị̄le mụ Betịfage na mụ Betanịja, pakyamba kya mịsyunguti; alinkubatuma abafụ̄ndịgwa babili; 30alinkuti: Amụbūke nkāja akanāndi kala mụnịngēne nako, bo mụkwịngila mụkwakujaga īmbụ̄nda īmwana, iji najumo akị̄togamo sịku, jikūngị̄gwe; mụkajabule mụkajitwale kuno. 31Linga jumo ịkubalālūsya ịkuti: Mụkujabula jakị? Mukātigi: UNTWA ịkujilōnda. 32Po papo lelo aba bātumị̄gwe balinkubūka balinkwakujaga bo mụmo ababūlị̄le. 33Lelo bo bịkujabula īmbụ̄nda abenenajo bābalālūsịsye bātịle: Nōngwa jafịkị mụkujabula īmbụ̄nda? 34Bātịle: UNTWA ịkujilōnda. 35Po papo balinkujitwala kwa Jesụ, bo bālị̄sye ifịlūndo fyabo pāmwana ja mbụ̄nda balinkwenda nukuntūgasyapo Jesụ. 36Bo ịtogịle ịkwenda abāndu balinkwalisya imyenda gyabo mụnjila: 37Bo basegelị̄le mụ Jelụsalemụ pabusụlụfụ bwa Kyamba kya Mịsyunguti, ikilūndilo ikikulūmba kya bafụ̄ndịgwa kilinkwanda ukunngwila ulupị Kyala nukulāta ukumpāla kuli syosa īngulūmba isị bāsịbwene balinkuti: 38Kyala ansajege umalafyale uju ịkwịsila mụngamụ ja NTWA! Ulutēngāno lujeko kumwanya, ulwimiko lujeko kwa Kyala kumwanya fị̄jo. 39Po papo Abafalịsaị bamo nkilūndilo kila balinkujoba na Jesụ balinkuti: Mmanyịsị bakemele abafụ̄ndịgwa bako babatame! 40Ālyamwịle ātịle: Nikubabūla ukuti linga abāndu aba bābatēme, po amabwe gịsakukōlelaga.

Jesụ ịkunndilila Jelụsalemụ

41Lelo bo asegelị̄le akabwene akāja akakulūmba alinkukalilila, 42alinkuti: Linga gwasịmēnye umụsyugu isị sịkutwala ulutēngāno! Lolị lelo papo utịkusịbona! 43Kịkwịsaga akabalilo apa abalugu bīnụ bịsakubajēngelaga ilịmato lya kubasyungūtila nukubafwambilila mụnkāti īmbafụ syosa, 44bịsakubapyụtaga lōsa pamopēne na bāndu aba bali nkāti mmyako; ilị̄bwe nalịmo litịsakulekịgwaga pabujo bwake, papo mụkakāmēnye akabalilo aka Kyala ālisịle kukubapoka umwe!

Jesụ ịkubūka kunyūmba ja kwịpụ̄tilamo

(Mat. 12:12-17; Mali. 11:15-19; Joh. 2:13-22)

45Po papo alinkwịngila nnyụ̄mba ja kwịpụ̄tilamo alinkubakagamo aba būlisyaga mụmo, 46alinkubabūla alinkuti: Lisị̄mbị̄gwe ilyakuti: Īnyụ̄mba jangu nyụ̄mba ja kwịpụ̄tilamo; lolị umwe mụjipelịle mbako ja mịnyāmbụta! 47Amasịku gōsa alinkumanyịsya nnyụ̄mba ja kwịpụ̄tilamo. Abapụ̄tị abakulūmba, abamanyandagilo nabalōngosị balinkulōnda ukunngoga; 48lolị balinkusịtakujaga injila najimo ija kubōmbela sịsịsị, papo abāndu bōsa bāsịsūbilaga isị ājobaga.

Currently Selected:

Luka 19: NYB96

Highlight

Copy