Ubwandilo 42

Abāmyabo Josefụ bịkubūka mụ-Egịpịtị nkūla ifịndu

1Bo Jakobụ apilị̄ke ukuti fịlịmo ifị̄ndu nkị̄su kya Egịpịtị, po papo alinkubalālūsya abānāke alinkuti: Ngimba nōngwa ja fịkị mukukētana ịtolo? 2Une mbilị̄ke ukuti ifị̄ndu fịlịmo nkị̄su kya Egịpịtị amụsụlụkege, mụbūke mụkatūlileko ifyakulya ko kuti tupone, tūngafwa injala. 3Buno buno abāmyabo ba Josefụ kalōngo bala balinkubūka kukūla ifyakulya nkị̄su kya Egịpịtị. 4Lolị Jakobụ akālintumịle Benjamịnị unnụgụna gwa Josefụ pamopēne na bāmyabo papo apāsyaga ukuti pamo jōpe imbị̄bị sịmo sịsakummwaga. 5Buno buno abāna ba Ịsịlaelị pamopēne na bāndu abāngi balinkubūka kukūla ifyakulya, papo i njala jāgwịle nkị̄su kya Kanānị.

6Pakabalilo kala kala Josefụ āli ndindililakị̄su mụla mụla nkị̄su kya Egịpịtị, kangi jo uju ābūlikisyaga ifyakulya abāndu bōsa nkị̄su kila. Abāmyabo ba Josefụ balinkwịsa, balinkunngụndamịla nukwịnama ifịkosị fyabo pāsi. 7Josefụ alinkubabona abāmyabo alinkubamanya, lolị alinkufwana akabamanya na panāndi. Alinkujoba nabo amasyu amakali; alinkubalālūsya alinkuti: Mụfụmịle kūgu umwe? Abēne balinkummwamụla balinkuti: Tufụmịle nkị̄su kya Kanānị, twịsịle kukūla ifyakulya. 8Buno buno Josefụ alinkubamanya abāmyabo, lolị abēne balinkusịta nukummanya umwene. 9Josefụ alinkukumbuka injosị sịla āgogịlwe isị syabajobaga abāmyabo. Alinkubabūla alinkuti: Umwe mụlibatēndēsị, mwịsịle pakukikēta ikị̄su kyitu mụno kijīlị̄le amaka gāke. 10Abēne balinkummwamụla balinkuti: Mma malafyale tukaja batēndēsi, twe bāndu bāko twịsịle kukūla ifyakūla fyene. 11Twesa tuli bāna ba mụ̄ndu jumojwene, tulibāndu abasūbilịgwa twe bāndu bāko tukaja batēndēsị. 12Umwene Josefụ alinkuti: Mma, lolị mụbingilịle ukutēndēla ubonywa bwa kị̄su kyitu mụmo kijị̄le. 13Abēne balinkujoba balinkuti: Twe bāndu bāko tuli kalōngo na babili (12) pātāta, tuli bāna ba mụ̄ndu jumojwene nkị̄su kya Kanānị unnụgụna gwitu unnāndi kuli twesa jo asyele na tata, lolị ugwamyitu ujūngi jo akajako ku būmị. 14Josefụ alinkubāmụla alinkuti: Momụno njobị̄le ukuti umwe mụli batēndēsị. 15Ukuti une mmanye nalolị lilino nịkuja pakubagela ukuti mụkujoba isya nalolị, jo njila iji: Nịkujīgila mụngamụ ja Falao nịkuti mụtịsakusōkamo mụno linga akị̄sa jōpe kuno unnụgụna gwinụ unnāndi kulimwesa. 16Mụntume jumo umwịnīnụ, abūke akammwege, akị̄se nagwe kuno unnụgụna gwinụ jujuju, lolị mwe bāngi mwesa mụkupịnyịgwa tāsị nnyụ̄mba ja bannyololo, ko kuti ngēte linga amasyu aga mụjobịle ga bwanalolị, pamo mma, linga gakaja nu bwanalolị, nịkujīgila mụngamụ ja Falao ukuti nalolị umwe mụli batēndēsị. 17Po papo alinkubịgalila bōsa nnyụ̄mba ja bannyololo amasịku matatu.

18Pị̄ sịku lya butatu, Josefụ alinkujoba nabo mụnnyololo, alinkuti; Linga mụkulōnda ukuponesya ubūmị bwinụ mụbōmbe isị une nikubabūlaga, une nguntị̄la Kyala. 19Linga mụli basūbilịgwa nalolị, po mụnndeke jumo umwịnīnụ asyale nnyụ̄mba ja ba nnyololo, mwe bāngi mụbūkege mụbatwalile abannyụ̄mba syinụ ifị̄ndu ifị mūlịle. 20Mụkịsege nagwe unnụgụna gwinụ unnāndi kuli mwesa, ko kuti nịsemmanye linga amasyu gīnụ ga bwanalolị, po lelo mụtịsakufwa; abēne balinkwịtika. 21Po papo balinkujobesanịa balinkuti: Mbwanalolị bōsa īnōngwa iji jitugwilịle jifụmịle mụli isị twalimmbōmbị̄le ugwamyitu Josefụ, twabubwene ubutolwe bwake bo ịkupyelesya kumyitu ukuti tungammbōmbelaga īmbị̄bị, lolị tulinkusịta nukupilika. Jo nongwa iji nanụswe twịngị̄le mbutolwe bububu. 22Umwene Lubenị alinkubabūla alinkuti: Bule une ngābabūlịle umwe ukuti mụleke ukummbōmbela īmbị̄bi umwanịke? Lolị mụlinkusịta nukupilika, kēta lilino ilịlopa lyake. Tukulōngịgwa panōngwa ja bufwe bwake. 23Abēne bakāsịmēnye ukuti Josefụ ịkubapilika; namanga ālịpo uju āsanụsyaga amasyu gābo kwa Josefụ. 24Po papo Josefụ alinkusōkapo apa bālịpo alinkwakulila amāsosị, alinkugomoka kangi kukujoba nabo. Alinkummwega Sịmyonị, alinkumpịnya pala pala bo bịkukēta na māso gābo.

Abāmyabo ba Josefụ bịkugomoka ukubūka ku Kanānị

25Po papo Josefụ alinkulagila kubabōmbị ukuti ifị̄ndu bị̄susye mụnyāmbi syabo kangi nukubagomolela indalama syabo. Uju isyake uju isyake isị bātwele, syope basịbīke mụnyāmbi syabo kangi babape nifị̄ndu fya mụnjila, abēne balinkusịbōmba syosa sịsịsị. 26Po papo abāmyabo ba Josefụ balinkukwesya inyāmbi sya fyakulya pa mbụ̄nda syabo, balinkubūka. 27Bo bafịkịle pabugono, po papo umwịnābo jumo alinkwabula inyāmbi jāke ukuti ajēgelemo imbụ̄nda jāke ifyakulya, alinkusyaga indalama pamwanya pa fị̄ndu mụ nyāmbi jāke. 28Alinkubabūla abanịne alinkuti: Bagomwịsye īndalama syangu, ukēte isị nsyagịle mụ nyāmbi jāngu: Po papo īndụmbụla syabo sịlinkunyololoka, balinkutetema kangi balinkulālūsanịa balinkuti: Fịkị ifị Kyala atubōmbị̄le?

29Bo bafịkịle kugwịsabo kwa Jakobụ, nkị̄su kya Kanānị, balinkumpāngila syosa isị syababonekị̄le, balinkuti: 30Unndindililakị̄su kila ājobaga nanụswe amasyu amakali alinkuti tuli batēndēsị ba kị̄su. 31Po papo tulinkummbūla tulinkuti: Tuli bāndu basūbilịgwa ịtolo tukaja batēndēsị. 32Tuli kalōngo na babili pa tāta, tuli bāna ba mụ̄ndu jumojwene umwịnītu jumo jo akajako, lolị unnāndi kuli twesa jo asyele na tāta nkị̄su kya Kanānị. 33Lelo bo tunndīngēnịe po papo umwene alinkuti mo mụno ngubamanyịlaga ukuti mụli basūbilịgwa, oko, mụnndeke kumyangu kuno jumo umwịnīnụ, umwe mubatwalile ifyakulya aba bali ni njala, aba mụnyụ̄mba syinụ, mụbūkege. 34Mụkị̄sege nagwe unnụgụna gwinụ unnāndi, po nịsakumanyaga ukuti mụkaja batēndēsị, lolị mụli bāndu abasūbilịgwa; po nịsakubagomolelaga unnụgụna gwinụ kangi, ifị linga mụkūla umwe mwịsakūlaga fyosa ifị mụkulōnda ukukabilamo nkị̄su iki.

35Lelo bo bikusōsyamo ifyakulya mụnyāmbi syabo, umụ̄ndu gwesa alinkwaga kalimo mu nyāmbi jāke akanyāmbi ka ndalama. Ugwịsabo pamopēne na banāke bobatubwene utunyāmbi twa ndalama ulutēnde lulinkubakoma. 36Umwene Jakobụ ugwịsabo alinkubabūla alinkuti: Mwịsakūndeka ne nsịta mwana; Josefụ akajako kubūmị, jōpe na Sịmyonị atịkuboneka, kangi lilino mụkulōnda ukubūka na Benjamịnị. Nōngwa ja fịkị sikūngwila une syosa sịsịsị? 37Po papo Lubenị alinkummbūla ugwịse alinkuti: Gwịse ubagogege abānāngu bobabīli linga ndịkwakwịsa nagwe. Ummbīke mmaboko gangu, une ngwwakugomoka nagwe ukwịsa kumyako. 38Umwene alinkuti: Ukabagila ukubūka nu mwanāngu, namanga unkulu afwịle, asyele mwene jujuju, linga ịkwaganịla nunkōsị mụnjila iji mụkwendaga po mwisakūsụlụsyaga nīfwe syangu nubusụlụmanịe mwịpūmba.

Currently Selected:

Ubwandilo 42: NYB96

Highlight

Copy