Ubwandilo 43

Abāmyabo ba Josefụ bịkubūka kangi Mwegịpịtị bo bali na Benjamịnị

1Lolị injala jāgwịle fị̄jo nkị̄su. 2Bo abāna ba jakobụ bamalịle ifyakulya fyosa ifi bajịlekūla nkị̄su kya Egịpịtị, ugwịsabo alinkubabūla alinkuti: Mụbūke kangi mụkatūlile ifyakulya fịnāndi. 3Po papo Jụta alinkummwamụla alinkuti: Umụ̄ndu jula ātusokịle fị̄jo ātịle, mụtịsakūmbona ikyenị kyangu, linga mụtịkwakwịsa nu nnụgụna gwinụ. 4Linga ugwe gwịtị̄ke ukuti tubūkege nu nnụgụna gwitu, po tukwịkililaga tukwakukūlilaga ifyakulya. 5Lolị linga kukāna ukuntuma, po nanụswe tutịkubūkako, namanga umụndu jula ātulagị̄le ukuti: Mụtịsakumbonamo ikyenị kyangu na panāndi linga mụtịkwakwịsa nu nnụgụna gwinụ. 6Umwene Ịsịlaelị alinkujoba alinkuti: Nōngwa ja fịkị mwambōmbelaga une īmbị̄bị bo sịsịsị apa mwammbūlaga umụ̄ndu jula ukuti mụli nu nnụgụna gwinụ ujūngi? 7Abēne balinkummwamụla balinkuti papo twalyagịle ukuti ịkwandisanịa kabili kabili ukutulālūsya ukuti: Ngīmba ugwịsēmwe akāli alịko kubūmị? Bule mụli nagwe jumo unnụgụna gwinụ? Uswe twammwamụlaga isị ātulālūsyaga; tukāsịmēnye ukuti ịkutubūlaga isyakuti, mụkị̄sege nunnụgụna gwinụ. 8Po papo lelo Jụta alinkummbūla Ịsịlaelị alinkuti: Untume unndumyana mbūkege nagwe une po tukusụmụkaga, kokuti twesa tupone ukufwa injala, uswe na jujugwe kangi na banītu. 9Ungētege jujune, une ngujaga mwimililị gwake, jịsakuja nōngwa jāngu linga ndịkwakugomoka nagwe nukuntwala kumyako unnụnụ ịtolo, nịsakujaga ninōngwa isịtakumalika sịku. 10Linga tukātāgịle akabalilo, pamo lilino angali tugomosēnịeko kabili.

11Buno buno ugwịsabo Ịsịlaelị alinkubabūla alinkuti: Linga bo sịkujaga buno buno, po lelo mụbōmbe isị: Mụntwalileko ifyabupe umụ̄ndu jula mụnyāmbi syinụ, ukufụma mụli ifị fịlịmo nkị̄su kyitu, ifị fịkīndilị̄le ubunụnụ: Unkota ugu bịkupaka; ulūkị, unkota gwakufụ̄kisya, lubanị, amasyabala, kangi ni seke sya mpịkị ugu bịkuti alimondi. 12Kangi mwege īndalama mōngelepo kabili. Īndalama sịla bāsịgomwịle mụnyāmbi syinụ syope mwege mụbūkege nasyo; pamo bālị̄bịbwe ịtolo. 13Mụmmwege na jumwanịke mụbūkege nagwe mụbūkege kangi kumụ̄ndu jula. 14Umwene Kyala umwene maka gōsa jo ampelege umụ̄ndu jula ukuja gwa lupākisyo kumyinụ, kokuti akabābulilege umwe ugwamyinụ jula, na ju Benjamịnị. Namanga une linga mfwilịlwe nabānāngu bomfwilịlwe po papo, sịkajapo isya kubōmba. 15Buno buno balinkwega ifyabupe fịla, kangi syope ni ndalama balinkōngelelapo kabili; balinkummwega na ju Benjamịnị, balinkusụmụka ukwịkilila nkị̄su kya Egịpịtị, balinkwakwima nkyenị mwa Josefụ. 16Bo Josefụ ammbwene Benjamịnị palikimo na bāmyabo, alinkummbilikila ummbōmbị unkulūmba gwa nnyụ̄mba jāke, alinkuti: Batwale abāndu aba ku nyụmba jāngu, ukagoge kamo aka mụntị̄mo ubatendekekesye ilịseke buno nịkuja pakulya nabo ifyakulya fya pamụ̄si. 17Po papo ummbōmbị gwake jula alinkubōmba bo mụmo Josefụ ālinndagilị̄le, alinkubatwala abāndu bala kunyụ̄mba ja Josefụ. 18Abēne lolị balinkutetema fị̄jo bo bịkubị̄ngisya nnyụ̄mba ja Josefụ, balinkwịnogona ukuti: Pamo bịkuja pakutulōnga panōngwa ja ndalama isị twasyagịle mụnyāmbi syitu ulutasị lula, bịkulōnda ukuti bajāge īnōngwa mmyitu po bēnde nukutwalukila batukole ukuti tuje batumwa, kangi bēnde nukwega īmbụ̄nda syitu. 19Po papo balinkusegelela ku mmbōmbị unkulūmba ugwa nnyụ̄mba ja Josefụ, balinkujoba nagwe pakifịgo balinkuti: 20Kēta gwe malafyale mbwandilo twalịsịle kuno ukuti tūle ifyakulya. 21Lelo bo tujịlekufịka pabugonelo bwa bēndanjila botwịgwịle inyāmbi syitu; tulinkwaga ukuti īndalama sya mụ̄ndu gwesa sịli pamwanya pa fị̄ndu mụ nyāmbi jāke, tulinkusyaga syosa ịtolo mụmo syajīlị̄le. 22Syo isị tugomwịke nasyo tutwele, pamopēne ni ndalama isị̄ngị sya kūla ifyakulya. Lolị tukammanya na uju ābīkịlemo īndalama sịsịsị mụ nyāmbi syitu. 23Umwene lolị ummbōmbị unkulūmba jula, alinkubabūla alinkuti: Ulutēngāno lujege nanụmwe, mụngatetemaga. Kyala gwinụ, Kyala gwa gwịsēmwe jo uju ābīkịlemo ikyuma mụ nyāmbi syinụ; nalyambilị̄le indalama syinụ. Po papo alinkubābūlila Sịmyonị. 24Umwene alinkubị̄ngisya nnyụ̄mba ja Josefụ, alinkubapa amīsi gakusụgụsụla mmalūndi; kangi alinkusịswila ni mbụ̄nda syabo. 25Abēne balinkutendekesya kilingānị ifyabupe fya Josefụ, bo akāli ukugomoka kumbōmbo pamụ̄si: namanga bābūlị̄gwe ukuti bịkuja pakulya pala pala.

26Lelo bo Josefụ ịsịle kukāja, po papo balinkuntwalila ifyabupe ifị bāli nafyo, balinkunngụ̄ndamila mpaka pāsi. 27Po papo Josefụ alinkubaponịa alinkuti: Agonịle ugwịsēmwe unkāngale uju mwannjobaga? Bule akāli alịko kubūmị? 28Abēne balinkummwamụla balinkuti: Tāta, umụ̄ndu gwako, agonịle, ena, akāli alịko kubūmi. Po papo balinkufụgama, balinkwịnama nkyenị mmyake nulwịjị̄syo. 29Umwene bo ịkukēta alinkummbona unnụgụna Benjamịnị, uju bāli nna jumojwene, alinkubalālūsya alinkuti: Ngīmba uju jo nnụgụna gwinụ unnāndi uju mwalimbūlịlepo? Alinkuti: Kyala ajege niịpyana kumyako gwe mwanāngu! 30Mbibimbibi ịtolo Josefụ alinkusōkapo pāpo īndumbụla jālịswịle nubusukwe kunnụgụna, alinkulōnda nukulila amāsosị, alinkwakwịngila kusofụ nnyụ̄mba jāke ko alinkwakulilila. 31Alinkusụgụsụla kumāso alinkusōka kangi bo ịkasị̄sye. Po papo alinkuti amụtwalege ifị̄ndu. 32Po papo ababōmbị bāke balinkumpa Josefụ ifyakulya fyake pasịma, abēne lolị ab'Egịpịtị aba bwịla bālyaga nnyụ̄mba ja Josefụ, bo balinkubapa ifyabo pasịma, pāpo ab'Egịpịtị batịkulya pamopēne na Bahịbulị papo abēne mbelakinyanyasị, ukulya pamopēne na ba Hịbulị. 33Abēne abāmyabo ba Josefụ bobālị̄tūgēle nkyenị mmyake, ukufwana na mụmo bākōnganị̄le mbukulūmba bwabo, ukwanda kunkulūmba kuli bōsa nkupāpịgwa ukwakufịka kunnāndi kuli bōsa. Po papo balinkukētana kumāso balinkuswịganịka ịtolo. 34Ifyakulya ifị bālyaga, fịlinkujabịgwa ukufụma pa mēsa ja Josefụ. Umwene Benjamịnị jo balinkunjabila fị̄ngịpo, kahāno ukufikīnda ifya banịne. Bo buno buno balinkunwa nu kusekela pamopēne nagwe.

Currently Selected:

Ubwandilo 43: NYB96

Highlight

Copy