Ubwandilo 44

Ikikōmbe iki kyasobịle

1Po papo Josefụ alinkummbūla ummbōmbị gwake unkulūmba ugwa nnyụ̄mba jāke alinkuti: Gwịsusye mụnyāmbi sya bāndu aba ifyakulya fịfị̄ngị ịtolo, ubafwanịege pabutwalilo bwabo, īndalama sya mụ̄ndu gwesa usịbīke uju mụ̄nyāmbi jāke uju mụ̄nyāmbi jāke. 2Lolị ikikōmbe kyangu ikya fesa kyo ukisōnde mu nyāmbi ija nnāndi jula, pamopēne ni ndalama isị ātwele isya kūla ifyakulya fyake. Umwene ummbōmbị gwake jula alinkusịbōmba bo mụmo Josefụ ālimmbūlị̄le. 3Lelo bo bukị̄le nulubūnju fị̄jo, balinkubasụmụsya ni mbụ̄nda syabo. 4Abēne bo bēndịlepo, akatāmbo kanāndi ukufụma nkāja, Josefụ alinkummbūla ummbōmbị gwake alinkuti: Sụmụka, ubakōnge abāndu bala lelo linga ujịlekubāga ukabalalūsye ukati: Nōngwa ja fịkị mutubōmbị̄le imbị̄bị pa nụnụ? 5Nōngwa ja fịkị mwịbịle ikikōmbe kya fesa? Ngīmba ikikōmbe iki kikaja kyo iki ịkunwelamo umalafyale gwangu? Kangi mo mụno ịkubōmbela nu bulagusị. Mubōmbịle imbị̄bị fị̄jo.

6Umwene alinkubakōnga, alinkwakubāga; alinkubabūla amasyu gagaga. 7Abēne balinkubụsya balinkuti: Ịkujoba bo bule bule umalafyale gwitu amasyu bo aga? Isị syo sịjege kubutalị na bāndu bāko ukusịbōmba bo isị. 8Kēta indalama sịla twasyagịle mụ̄nyāmbi syitu twagomwịke nasyo, ukufụma kukị̄su kya Kanānị. Po twati twịbege bule bule kangi nnyụ̄mba ja malafyale gwako ikyuma kya fesa pamo ikya sahabu? 9Linga ukyagịle ikikōmbe kyako mụ̄ nyāmbi ja jumo nkati mmyitu uswe twe bāndu bāko, kunụnụ ukuti agogịgwege ịtolo uju ịbịle kangi na jujuswe tukujaga batumwa ba malafyale gwitu. 10Umwene ummbōmbị jula, ugwa nnyụ̄mba ja Josefụ alinkubabūla alinkuti: Ena, bo sịjege buno buno bo mụmo mụjobị̄le, lolị uju linga nummwagịle nakyo jo ịkujaga ntumwa gwangu, mwebāngi mwemwịsakujaga bābuke ịtolo. 11Nakalinga ịtolo umụ̄ndu gwesa alinkutūla pāsi inyāmbi jāke, nukwabula. 12Po umụ̄ndu jula alinkulōnda ikikōmbe kila mụ̄ nyāmbi syabo bōsa, alinkutala inyāmbi jankulūmba, alinkwakumalikisya kūnyāmbi ija nnāndi, lelo ikikōmbe kila kilinkwagịgwa mụ̄nyāmbi ja Benjamịnị. 13Po papo balinkunyāfụlanịa imyenda gyabo, umụ̄ndu gwesa alinkukwesya inyāmbi jāke pa mbụ̄nda, balinkugomokela mụnkāja kangi.

14Josefụ ākāli ālịmo nnyụ̄mba bo Jụta ịkufịka pamopēne na bāmyabo; po papo abēne balinkunngwila ulupị Josefụ. 15Umwene Josefụ alinkubalālūsya alinkuti fịndu fịkị ifị mụ̄mbōmbị̄le: Ngīmba syo mụkasịmanya ukuti umụ̄ndu uju ali bo une abagị̄le ukubōmba ubulagusị? 16Umwene Jụta alinkwamụla alinkuti: Kali po tujobege sịliku kumyako gwe malafyale gwangu? Kali po tukwịnokesyaga bule bule? Kyala abubwene ubutulanōngwa bwa twe bāndu bāko; kēta, lelo twesa tukujaga batumwa bāko gwe malafyale gwangu, jomma mwene uju ikikōmbe kyagị̄gwe mmaboko gāke. 17Alinkubabūla alinkuti: Isyo syo mma. Ngabagila ukusịbōmba napanāndi. Umwene uju nummwagịle nikikōmbe kyangu jo ịkujaga ntumwa gwangu, lolị mwesa mwebāngi mụbūkege ku gwịsēmwe nulutēngāno.

Jụta ịkupyelesya kwa Josefụ ukuti Benjamịnị agomokege na bakulu ukubūka ku gwịsabo

18Po papo Jụta alinkusegelela alinkujoba nagwe alinkuti: Gwe malafyale gwangu nịkukusūma, unyịtikisye ne mụ̄ndu gwako ukuti njobepo ilịsyu limolyene ịtolo bo kupilika ungangalalilaga ne mmbōmbị gwako namanga ugwe ufwene ịtolo na Falao. 19Ugwe gwe malafyale gwangu gwatulālūsịsye twe bāndu bāko gwatịle: Ngīmba mụli nagwe ugwịsēmwe, pamo unnụgụna gwinụ? 20Po uswe tulinkukwamụla ukuti: Ena, gwe malafyale gwitu, tuli nagwe tāta uju akāngēle, kangi nu nnụgụna gwitu unnāndi, umwanāke ugwambukāngale bwake. Unkulu jo āfwịle; lilino jo jujuju mwene ịtolo uju asyele mụnna; kangi ugwịse annganịle fị̄jo. 21Po lelo gwatubūlịle twe bāndu bāko ukuti: Mụkị̄sege nagwe kuno, ko kuti nịse nunkēte na māso gangu.

22Tulinkukubūla gwe malafyale gwangu tulinkuti. Unndumyana jujuju atịkulekanịlamo nu gwịse, linga alekēne nagwe po ugwịse ịsakufwa. 23Po lelo ugwe ulinkutubūla twe bāndu bāko ulinkuti: Linga mụtịkwakwịsa nu nnụgụna gwinụ, mụtịsakukētana na nịne napanāndi. 24Lelo bo tufịkịle kwa tāta umụ̄ndu gwako twalimpāngị̄le amasyu gāko malafyale gwangu. 25Lelo bo tāta atubulịle, atịle: Amụbūkege kangi mụkatūlile ifyakulya fịnāndi. 26Uswe twakānịle twatịle: Tukabagila ukubūka twịbēne, pēne papo linga gwịtị̄ke ukuti tubūkege nu nnụgụna gwitu po tukusụmụkaga ukubūka, tukabagila ukwakukētana nu mụ̄ndu jula linga tunndekịle umwanịke. 27Po papo tāta umụ̄ndu gwako, alinkuti: Nanụmwe mụsịmēnye ukuti, unkasị gwangu alimbāpị̄le abāna babili, jumo jo ajōngịle. 28Nndeke pamo ākolị̄gwe nikinyamāna, kēta ngammbona ukwịsakufịka na kulilino kuno. 29Lelo linga jōpe na jujuju mụkunsōsyapo, linga sịmo sịkwakunngwila kula kula, po mwịsakumbelelaga ubusụlụmanịe bwakūngoga, ne nkāngale buno buno. 30Linga njịlekufịka kwa tāta umụ̄ndu gwako lelo linga āgịle ukuti tukaja nagwe umwanịke, namanga, gwe malafyale gwangu, ubūmị bwake bōsa buli mụnndumyana jujuju. 31Bo buno buno, linga ịsakwaga ukuti umwanịke uju akajapo, po ịsakufwa, ko kuno abāndu bāko bịsakugusụlụsyaga mwịpūmba nubusụlụmanịe umfị̄mba gwa tāta umụ̄ndu gwako. 32Ne mụ̄ndu gwako nāfị̄ngịle na tāta ukuti syosa sịli mmyangu, nāfị̄ngịle nagwe ukuti linga ndịsakugomoka numwanịke uju, nịsakujaga ni nōngwa kwa tāta mbūmị bwangu bōsa. 33Panōngwa jijiji, ne mụ̄ndu gwako nịkupyelesya kumyako nịkuti: Gwe Malafyale gwangu ngusūma ukuti une ne njege ntumwa gwako mbujo bwa nndumyana uju; unndeke unndumyana abūkege na bakulu. 34Ngwakufịka bulēbule kwa tāta bo ngaja nagwe unndumyana uju. Ndi nulutēnde ukuti ngasịkētege imbị̄bị isị sikwakunngwilaga tāta.

Currently Selected:

Ubwandilo 44: NYB96

Highlight

Copy