Ubwandilo 41
41
1Bo fịkīndịlepo ifyinja fịbili Falao alinkugogwa injosị, mụ njosị syake alinkugogwa īmịle pāmbali pa lwisi lwa Naịlị. 2Alinkusịbona ing'ōmbe indụpe indenenefụ ịhāno na ịbili sịkufyuka ukufụma ndwisi lwa Naịlị, sịkulya ilịsu. 3Alinkusịbona isị̄ngị ịhāno na ịbili isị syagāndịle sịlinkufyuka ukufụma ndwisi lwa Naịlị, sịlinkwịsa kwima mụ̄mbali ndwisi pabupị̄pị ni nịne. 4Lelo po papo ing'ōmbe ịhāno na ịbili ingāfụ sịsịsị sịlinkusịmịla ing'ōmbe ịhāno na ịbili indụpe sịla. Po papo Falao alinkulēmbuka ntulo. 5Alinkugona kangi utulo, alinkugogwa īnjosị ulwabubili, alinkufịbona ifịsāsa fya mpūnga fịhāno na fịbili ifị fyafụmile nkikolo kimokyene fyalyelịle fị̄jo, fyali fịnywamụ kangi fyali fịnụnụ. 6Pānyụma kangi fịlinkusōka kangi ifịsāsa fịhāno na fịbili, ifịsịta seke ifị fyapapịle kangi fyapululị̄gwe fyalyonāngị̄ke nu mmbelo umfụma kubusōkelo ilịsuba. 7Po lelo ifịsāsa fịhāno na fịbili ifịsịta seke fịla fịlinkufịmịla ifịsāsa fịhāno na fịbili ifinụnụ ifị fyali fịnywamụ kangi fịnụnụ. Lelo bo Falao alēmbwịke ntulo alinkwaga njosị ịtolo. 8Nulubūnju bobukị̄le Falao alinkusị̄ta nukutēngāna mụ ndụmbụla jāke. Alinkubabilikila abāndu bāke abamag'anyị abā mahala bōsa nkị̄su kya mụ Egịpịtị, alinkubapāngila īnjosị syake, lolị akālịpo najumo ugwa kunsanụkisya īnjosị syake.
9Po papo lelo unkulūmba gwa batāgilabwalwa alinkummbūla Falao, alinkuti: Umụsyugu po ngụmbwịke ubusobị bwangu. 10Akabalilo kamo bo utukalalị̄le twe babōmbị bāko, ulinkutwịngịsya nnyụ̄mba ja bannyololo, une nu nkulūmba gwa bapījafị̄ndu bāko. 11Ikilo kimo twesa twe babīli twagogịlwe īnjosị, uju isyake, uju isyake, kangi isị ni sanụkisyo jāke isị ni jāke. 12Unndumyana jula Unhịbụlị, ummbōmbị gwa nkulūmba gwa balindililị bapịnyịgwa twapịnyịgwe nagwe, lelo bo tumpāngị̄le īnjosị syitu alinkwenda nukutusanụkisya twesa uju isyake uju isyake ukukōngana na mụmo syajīlị̄le injosị syitu. 13Nalolị sịlinkwenda nukutugwila bo mụmo ātusanụkị̄sye īnjosị syitu, une ndinkugomokela pa mbōmbo jāngu umwināngu alinkunịongịgwa.
14Po papo Falao alinkubatuma abakwakummwega Josefụ, balinkunsōsya nakalinga itolo nnyụ̄mba ja bapịnyịgwa. Lelo bo amwịle inywịlị nukufwala imyenda igīngi alinkwakwịngila nnyụ̄mba, alinkwakwima nkyenị mwa Falao. 15Po papo Falao alinkummbūla Josefụ, alinkuti: Ngogịlwe īnjosị, lolị akajapo na jumo uju amēnye ukusanụsya īnjosị sịsịsị, mbilị̄ke ukuti ugwe umēnye ukusanụsya linga ubūlị̄gwe īnjosị sya mụ̄ndu. 16Po papo Josefụ alinkummwamụla Falao alinkuti: Ngaja jo une, Kyala mwene jo isakumpaga Falao ululīngānịo ulunụnụ lwa njosị syake. 17Po papo Falao alinkumpāngila Josefụ alinkuti: Mụ njosị syangu, ndinkwaga nīmịle pa mbali pa lwisi lwa Naịlị. 18Po lelo sịlinkwịsa ing'ōmbe indụpe inụnụ ịhāno na ịbili sịlinkulya ilịsu. 19Pānyụma kangi sịlinkufyuka ing'ōmbe isị̄ngị ịhāno na ịbili isị syagāndịle fị̄jo syali mbị̄bị, ngasịbonamo sịku isị̄ngị bo sịla nkị̄su kyosa ikya Mwegịpịtị. 20Buno buno ing'ōmbe ingāfụ sịla silinkusịmịla ing'ōmbe ịhāno na ịbili indụpe sịla. 21Lolị bo sịsịmịlịle pōpe sịlinkusịta nukuboneka ukuti sịsịmịlịle ị̄nịne. Sịlinkuboneka nubugāfụ bwabo bo mụmo syajīlị̄le ulutasị. Po lelo ndinkulēmbuka. 22Ndinkugogwa kangi, mụ njosị syangu ndinkufịbona ifịsāsa fya mpūnga fịhāno na fịbili fịmelịle nkikolo kimokyene, fyalyelịle fị̄jo kangi fịnụnụ. 23Kangi filinkusōka ifịsāsa ifị̄ngị fịhāno na fịbili ifịsịta seke, ifị fyalyonāngị̄ke nu mmbelo gwa kubusōkelo ilịsuba. 24Fịlinkufịmịla ifịsāsa fịhāno na fịbili fịla fyalyelịle fị̄jo. Mbapāngị̄le abamaganyị īnjosị syangu, lolị najumo uju amēnye ukusanusya īnjosi syangu sịsịsị.
25Po papo Josefụ alinkummbūla Falao, alinkuti: Īnjosi sya Falao syo ịbili sịfwene ịtolo; Kyala akunāngị̄sye Falao isị ịkuja pakusịbōmba. 26Ing'ōmbe indụpe ịhāno na ịbili, fyo fyinja fịhāno na fịbili; ifịsāsa fịhāno na fịbili fịla, ifị fyalyelịle fijo, fyo fyinja fịhāno na fịbili; īnjosị syo sị̄syo ndupu. 27Īng'ōmbe ịhāno na ịbili sịla syagāndịle fịjo, isị syalịsịle pānyụma, fyo fyinja fịhāno na fịbili, kangi ifịsāsa fịhāno na fịbili ifịsịta seke fịla ifị fyalyonāngị̄ke nu mmbelo gwakubusōkelo ilịsuba fyope fyo fyinja fịhāno na fịbili ifya njala. 28Sịli bo mụmo ngubūlị̄le ukuti Kyala ikunnāngisya Falao isị ịkuja pa kusịbōmba. 29Fịsakujako ifyinja fịhāno na fịbili ifya mboto nkị̄su kyosa, ikya Egịpịtị. 30Pānyụma lolị po fịsakujako ifyinja fịhāno na fịbili ifya njala, po lelo abāndu bịsakwịbwa ifyinja fịla ifya mboto nkị̄su kya Egịpịtị, ijēne jisakōnāngaga ikị̄su. 31Jōpe ni mboto jila bịsakujị̄bwaga nkị̄su kunōngwa ja njala iji jịsakwịsaga, namanga jịsakujaga ngulūmba fị̄jo. 32Īnōngwa iji ugogịlwe īnjosị kabili kokuti, jo Kyala atụmwịle ukuti sịkujangako nalolị kangi ukuti sịtịkukābilaga ukwịsa. 33Buno buno lelo Falao unndōndege jumo umụ̄ndu ummag'anyị ugwa mahala, jo ummwimikege ukuti ajege nkulūmba nkị̄su kyosa ikya Mwegịpịtị. 34Kangi usalege abāndu abā kwimilila īmbōmbo iji nkị̄su kyosa. Gwegengeko ifị̄ndu ikijabo kimo mfịjabo fịhāno nkyinja kyosa ikya mboto ukufụma mfyakulya fya mmịgūnda gya kị̄su kya Mwegịpịtị mfyinja fyo fịhāno na fịbili. 35Babunganịege ifyakulya fyosa ifị bịkufyaga mfyinja ifịnụnụ ifị fịkwịsaga ifya mboto. Babūngānịege ifyakulya nukufịbīka mōsa ntwaja utukulūmba kangi abāndu bafịlindililege. 36Ifyakulya fịfịfị bafịbīkege bunụnụ ukuti fịsefịbatūlege abāndu ba nkị̄su mfyinja fyo fịhāno na fịbili ifyanjala ifị fịkwisaga Mwegịpịtị mụno. Po ikị̄su kịsakuponaga ukōnāngika kūnjala.
Josefụ ịkubīkịgwa ukuja nndagilị gwa kị̄su kya Egịpịtị
37Po papo Falao palikimo na babōmbị bāke bōsa balinkwaga ukuti amasyu aga manụnụ. 38Falao alinkubalālūsya ababōmbị bāke alinkuti: Kali tubagị̄le ukummwaga jumo umụ̄ndu ugwa mahala bo gagaga uju ali na mbepo gwa Kyala? 39Lelo po papo Falao alinkummbūla Josefụ alinkuti: Bo mụmo Kyala ānāngikị̄sye mmyako syosa sịsịsị, akajapo najumo ujūngi ummag'anyị ugwa mahala bo mụmo ujīlị̄le ugwe. 40Ngwimị̄ke ugwe, lilino kujaga nkulūmba gwa nnyụ̄mba jāngu, bōpe abāndu bōsa bịkupilikaga kumyako isị kulagila. Kyene kikikota kya butwa kyo nikukukīndaga. 41Po papo Falao alinkummbūla Josefụ alinkuti: Ukēte, ngwimị̄ke ugwe ukuja nndindililakị̄su kya Egịpịtị kyosa. 42Falao alinkusōsya akakuba nndōbe lwake aka kāli ni kimanyịlo kyake alinkumfwika Josefụ nndōbe lwake, kangi alinkummfwika ni myenda imịnụnụ imịtakanyịfụ, alinkuti nu nnyololo gwa sahabu alinkumfwika mmakosị. 43Alinkumfyusya Josefụ mwịgeletị lyake ilya bubili, po papo abāndu balinkukōlela nkyenị mmyake balinkuti: Fụgamaga. Mụno mo mụno Falao ālimmwimikị̄le Josefụ ukuja jo nndagilị gwa kị̄su kyosa ikya Egịpịtị. 44Buno buno Falao alinkummbūla Josefụ alinkuti: Joune Falao, isị linga ukị̄tikisya ugwe, akajako najumo ujūngi uju ịsakusụmụka pakubōmba sịmo nkị̄su kyosa kya Egịpịtị. 45Falao alinkumpa Josefụ īngamụ ja Safenatipaneja; kangi alinkummwegela Josefu unkị̄kulu uju āli ja Esịnati īngamụ, umwana gwa Potifela, umpụ̄tị gwa nkāja ka Onị, ukuja nkasị. Umwene Josefụ alinkusyungūtila mōsa nkị̄su kya Egịpịtị.
46Josefụ āli nifyinja amalōngo matatu (30) pala āndege īmbōmbo kwa Falao, umalafyale gwa mụ Egịpịtị, Josefụ alinkusōkamo nkyenị mwa Falao, alinkusyungūtila nkị̄su ikya mụ Egịpịtị. 47Mfyinja ifya mboto fịhano na fịbili fịla, ikị̄su kilinkubotola ifyakulya fị̄ngi. 48Po papo Josefụ alinkufịbūngānịa nkị̄su kya Egịpịtị fyosa ifyakulya ifị bāfyagịle mfyinja fyosa ifya mboto fịla fyo fịhāno na fịbili, alinkufịbīka mfịtūba mụ̄ndāmba. Ifị fyali ntwaja utukulūmba. Ntwaja ntwaja alinkubīkamo ifyakulya ifị fyafụmaga mmịgūnda igi gyatusyungūtị̄le utwaja tula tula. 49Josefụ ābūngēnịe ifyakulya fīngi nalolị, fịlinkufwana bo gu nsānga gwa kwa sūmbi. Ifyakulya fịla fyali fị̄ngị nalolị alinkuleka nukupima papo fịkāli fyakuti umụ̄ndu apime.
50Bo fịkāli ukwịsa ifyinja fya njala, Josefụ āpāpịle abāna babili mụnkasị Esịnati umwana gwa Potịfela umpụ̄tị gwa nkāja ka Onị. 51Umwanāke ugwa kipānda Josefụ ālimpēle īngamu ja Manasị, namanga ịnogonaga ukuti: Kyala ambelị̄le ukwịbwa indamyo syangu syosa, kangi na ba nnyụ̄mba ja tāta. 52Umwanāke ugwabubili alinkumpa īngamụ ja Efulaịmụ, alinkwịnogona ukuti: Kyala āmbēle une abāna nkị̄su kya ngubilo syangu.
53Ifyinja fịla fịhāno na fịbili ifị imboto jālịmo nkị̄su kya Egịpịtị fịlinkumalika. 54Po papo fịlinkwanda ifyinja fịhāno na fịbili ifya njala, ukufwana na mụmo ājobị̄le Josefụ. Injala jilinkugwa mfị̄su fyosa, mwene mu nkị̄su kya Egịpịtị mo jikālịmo injala. 55Bo ikị̄su kyosa kya Egịpịtị kyandịle ukuja ni njala, abāndu balinkukụ̄ta kwa Falao ukuti abapepo ifyakulya. Po papo Falao alinkubabūla bōsa aba Mwegịpṭị alinkuti: Amụbūkege kwa Josefụ, syosa isị linga ịkubabūla syo mụkabōmbege ịtolo. 56Buno buno bo injala jigwịle nkị̄su kyosa, po papo Josefụ alinkwịgula ifịtūba fya fyakulya, alinkubūlikisya abāndu ba nkị̄su kya Egịpịtị, injala jilinkuja ngulūmba fị̄jo nkị̄su kya Egịpịtị. 57Kangi abāndu bāfụmaga mfị̄su fyosa bābukaga kwa Josefu kukula ifịndu mwe Egịpịtị, pāpo injala ingulūmba jāgwịle mfị̄su fyosa.
Currently Selected:
Ubwandilo 41: NYB96
Highlight
Share
Copy
Want to have your highlights saved across all your devices? Sign up or sign in
Nyakyusa Bible © Bible Society of Tanzania, 1996.
