Ubwandilo 40

Josefu ịkusanụsya īnjosị sya bapịnyịgwa babili

1Pānyụma pali sịsịsị po untāgilabwalwa gwa malafyale gwa Mwegịpịtị nu mpījafị̄ndu batulịle īnōngwa kumalafyale gwabo gwa kị̄su kya Mwegịpịtị. 2Po papo Falao alinkubakalalila ababōmbị bāke babili bala, untāgilabwalwa nu mpījafị̄ndu. 3Po papo alinkubabīka nnyụ̄mba ja bannyololo, pāsi pa nkulūmba gwa balindililabapịnyịgwa, uju āli mụno Josefụ ābīkị̄gwe. 4Unkulūmba gwa balindililabapịnyịgwa, alinkubabīka abāndu bala mmaboko ga Josefụ ukuti jo abakētelelege; balinkugonapo utubalilo mụnnyololo. 5Ikilo kimo abāndu bala bōsa babili balinkugogwa īnjosị uju isyake uju isyake, isị syali nisanụkisyo isị ni jāke isị ni jāke, untāgilabwalwa nu mpījafịndu, abāndu ba malafyale gwa Mwegịpịtị aba bāpịnyị̄gwe. 6Nulubūnju bo Josefụ ị̄ngịle mụno bālịmo alinkubakēta, alinkwaga basụlụmēnịe. 7Po papo alinkubalālūsya ababōmbị ba Falao bala āli nabo nnyụ̄mba ja bapịnyịgwa ija malafyale gwake, alinkuti: Mụsụlụmēnịe fịkị umụsyugu? 8Abēne balinkummbūla balinkuti: Tugogịlwe īnjosị, lelo akajapo najumo ugwakutusanụkisya mụno sịjīlị̄le. Umwene Josefụ alinkubabūla alinkuti: Ukusanụsya jikaja mbōmbo ja Kyala? Josefụ alinkubabūla alinkuti: Amụ̄mbūle injosi syinụ.

9Buno buno unkulūmba gwa batāgilabwalwa alinkumpāngila Josefu īnjosi syake, alinkuti. Mụnjosị syangu ndinkugubona umpịkị gwa māfị̄lu ugu gwali nkyenị mmyangu. 10Gwali ni sāmba ịtatu, lelo bo gutulwịle amānị ndinkwaga ubulēnge bukuboneka, ndinkufịbona ifịkose fya seke sya māfịlu isị sịbifị̄fwe. 11Une nākolị̄le nkiboko kyangu ikikōmbe kya Falao. Po papo ndinkwega īseke sya māfị̄lu ndinkukamila nkikōmbe kila, ndinkwenda nukunnị̄nga Falao ikikōmbe kila kila. 12Po papo Josefụ alinkummbūla alinkuti: Ukusanụsya kwa njosị syako ko uku: Isāmba ịtatu go masịku matatu. 13Bo gakīndịle amasịku matatu, Falao ịsakukusōsyamo nnyụ̄mba jabannyololo, ịsakukugomokesya kangi pa mbōmbo jāko. Kwisakuntwalilaga kangi Falao ubwalwa bwa māfị̄lu bo mụmo gwammbōmbelaga ulutasị. 14Lelo nịkukusūma ukuti gwịse ukangumbukege bo ukabịle inụnụ, ukāmbōmbelege ubōlōlo ukānjobege ingamụ jāngu kwa Falao ukuti āsōsyemo mụnnyololo, 15namanga nālịbị̄gwe ịtolo kubutị̄tu ukufụma nkị̄su kya Bahịbulị; kuno kōpe ngatulamo inōngwa najimo ija kunyịngikisya nnyụ̄mba ja bannyololo ija ngị̄sị iji.

16Unkulūmba gwa bapījafị̄ndu bo āgịle ukuti ukusanụsya kwa njosị kunụnụ ịtolo, alinkummbūla Josefụ alinkuti: Nịne ngogịlwe īnjosị; mụ njosị syangu ndinkwaga nịtwikịle ifịbo fịtatu pantu, mụno fyalịmo ifịsyesye ifyelụ. 17Nkị̄bo ikya pamwanya fị̄jo fyalịmo ifyakulya ifya luko nu luko ifị bampijị̄le Falao, lelo ndinkwaga injunị sịkulya ifị fyali nkị̄bo iki nālịtwikịle. 18Lelo po papo Josefụ alinkwamụla alinkujoba alinkuti: Ukusanụsya kwake ko uku: Ifị̄bo fịtatu go masịku matatu. 19Bo gakīndịle amasịku matatu, Falao ịsakukwabula mụnnyololo, kangi ịsakukubụta untu, ịsakukutulikaga mụmpịkị; po lelo īnjunị sịsakulyaga ummbili gwako.

20Falao alinkubapījila ifị̄ndu ababōmbị bāke bōsa abakulūmba pị̄sịku lya butatu ili lyali lyo ịsịku lya kukumbukila ukupāpịgwa kwake Falao; po papo alinkubasōsya unkulūmba gwa batāgilabwalwa nunkulūmba gwa bapījafị̄ndu, alinkwịsa nabo nkyenị nkilūndilo kya babōmbị bāke. 21Po alinkunngomolela pambōmbo jāke unkulūmba gwa batāgilabwalwa, jo alinkunnị̄nga ikikōmbe Falao mmaboko gāke. 22Lolị alinkunnịonga unkulūmba gwa bapījafị̄ndu; sịlinkwendela ịtolo mụmo Josefụ āsanụkị̄sye. 23Lolị unkulūmba gwa batāgilabwalwa alinkusị̄ta nukunkumbuka Josefụ, alinkummwịbwa lōsa.

Currently Selected:

Ubwandilo 40: NYB96

Highlight

Copy