Ubwandilo 39

Josefu nu nkasị gwa Potịfalị

1Bo babūkịle nagwe Josefụ nkị̄su kya Egịpịtị, po papo alinkummūla Potịfalị unndōngosị jumo nkati mbalōngosị ba Falao, jo uju āli nkulūmba gwa balindililị ba Falao. Alinkummūla Josefụ kubanya Isịmailị aba bālintwele. 2Umwene Kyala jo alinkunsaja Josefụ, kangi īmbōmbo syake syosa sịlinkwenda kanụnụ. Josefụ alinkwịtūgala nnyụ̄mba ja Malafyale gwake Potịfalị, Umwegịpịtị. 3Umalafyale gwake alinkusịbona ukuti Kyala ansajịle Josefụ nukuti Kyala asịsajịle syosa isị Josefụ ābōmbaga. 4Buno buno Josefụ alinkukaba ilịpyana kumyake, alinkummbōmbela. Alinkummwimika Josefụ ukuja mwenelelị gwa nyụmba jāke jōsa nifyuma ifị̄ngị ifị āli nafyo. 5Ukufụma pakabalilo kala kala Potịfalị ammwimikilaga Josefụ ukuja mwenelelị gwa nyụmba jāke ni fị̄ngị fyosa ifị āli nafyo, Kyala alinkujisaja īnyụ̄mba ja mụ̄ndu jula Umwegịpịtị, kunōngwa ja Josefụ. UNTWA alinkufịsaja ni fị̄ngị ifị āli nafyo, nnyụ̄mba na mmịgūnda. 6Fyosa ifị āli nafyo alinkufịbīka mmaboko ga Josefụ, alinkusị̄ta nukusịmanya nasịmo isya tūndu twake tōsa, lolị fyene fịfị̄ndu ifi ālyaga.

Umwene Josefụ āli mụ̄ndu nnụnụ ummbili kangi āli nnụnụ fị̄jo kumāso. 7Lelo bo gakīndịlepo amasịku manāndi, po papo unkasị gwa malafyale gwake alinkunkēta Josefụ alinkwenda nukunnyonywa; alinkummbūla alinkuti: Ịsaga kuno ugone na nịne. 8Lolị Josefụ alinkukāna, alinkummbūla unkasị gwa malafyale gwake alinkuti: Kēta, umalafyale gwangu ịkūsūbila une āmbēle fyosa, joune ngukētelela fyosa ifị ali nafyo. 9Akajako najumo unkulūmba ukukīnda une. Akasyasya nakamo ukukabīka mmaboko gangu, lolị jujugwe gwịmwene papo uli nkasị. Lelo po nāti mbōmbege bule bule isya bubị̄bị ubukulūmba bo bububu nukutula īnōngwa kwa Kyala? 10Umwene alinkumfịmbilisya Josefụ ukujoba nagwe amasịku gosa, lolị Josefụ alinkukāna, alinkusị̄ta ukugona nagwe.

11Ilịsịku limo bo Josefụ ịkwịngila nnyụ̄mba ukwakubōmba īmbōmbo jāke, akālịmo najumo ujūngi ummbōmbị gwa nnyụ̄mba. 12Po papo unkị̄kulu jula alinkukola umwenda gwake alinkummbūla alinkuti: Oko, gona nanịne. Lolị Josefụ alinkunndekela unkịkulu jula umwenda gwake ugu āfwele. Alinkubopa alinkusōka pānja. 13Lelo bo unkị̄kulu jula āgịle ukuti Josefụ anndekị̄le umwenda gwake, abopị̄le pānja, 14alinkubakōlela ababōmbị ba nnyụ̄mba jāke alinkubabūla, alinkuti: Amụkēte mwesa, unndume gwangu atutwalị̄le Unhịbụlị uju ukuti ịse atujwelụlege. Alị̄ngị̄le kumyangu ukuti agone na nịne. Po lelo nēndịle nukukụ̄ta fị̄jo. 15Bo āgịle ukuti ngukụ̄ta, po ēndịle nukubopela pānja, āndekịle numwenda gwake.

16Po papo unkị̄kulu jula alinkugubīka umwenda gwa Josefụ ukufịka pakabalilo kakugomokela unndume. 17Po alinkummbūla unndume inōngwa sịsịsị alinkuti: Ummbōmbị Unhịbụlị uju ututwalị̄le, ālị̄ngị̄le nnyụ̄mba ukuti ānyasye une. 18Lolị bo ngụ̄tịle fị̄jo po papo alinkwenda nukubopela pānja, alinkundekela umwenda gwake.

19Umalafyale gwa Josefu alinkukalala fị̄jo bo apilị̄ke amasyu aga unkasị ālimmbūlị̄le, isyakuti, ummbōmbị gwako āngolaga. 20Po papo Potịfalị alinkummwega Josefụ, alinkummbīka nnyụ̄mba ja bannyololo mụno bābīkịgwaga abapịnyịgwa ba malafyale gwa kị̄su. Josefụ alinkuja mụla mụla. 21Lolị Kyala alinkuja nagwe Josefụ alinkunnāngisya ikisa kyake ikikulūmba, buno buno Josefụ alinkukaba ubukundwe kundindililị gwa bapịnyịgwa. 22Po papo unndindililị gwa nyụmba ja bapịnyịgwa alinkubabīka bōsa abapịnyịgwa mmaboko ga Josefụ, alinkumpa amaka mụli syosa isị syabōmbịgwaga mụnyololo. 23Unndindililị gwa bapịnyịgwa alinkusị̄ta nukukētako amāso kuli fyosa ifị āfịkētelelaga Josefụ, UNTWA alinkusịsaja syosa isị ābōmbaga.

Currently Selected:

Ubwandilo 39: NYB96

Highlight

Copy