Ubwandilo 38

Jụta na Tamalị

1Pakabalilo kala kala, Jụta alinkusōkako kubāmyabo alinkwịkilila kwịtōngo alinkwakujēnga pabupị̄pị nu mụ̄ndu jumo ugwa kikolo kya Atụlamụ, uju āli jo Hịla īngamụ. 2Kula kula ko Jụta alinkummbona unndīndwana umwana gwa Syụja ugwa kikolo kya Bakanānị, jo alinkummwega alinkuja nkasị. 3Umwene unkị̄kulu jula alinkuja nikifụba, po papo alinkupāpa umwana unndumyana, alinkumpa īngamụ ja Elị. 4Unkị̄kulu jula alinkuja nikifụba kangi, alinkupāpa umwana unndumyana, alinkumpa īngamu ja Onanị. 5Alinkupāpa kangi umwana unndumyana bo bali pa bujo bwa Kesịbu alinkumpa īngamụ ja Syela. 6Po papo Jụta alinkummwegela unkị̄kulu umwanāke ugwakipānda Elị, unkịkulu jujuju īngamụ āli jo Tamalị. 7Lolị Elị alinkuja mmbị̄bị ku NTWA, po papo UNTWA alinkwenda nukunngoga. 8Jụta alinkummbūla umwanāke Onanị alinkuti: Mmwịngilepo unkasị gwa nkulugo ukukōngana nu lwịho lwitu, ulu lụkuti ugwamyabo jo ị̄ngilengepo, kokuti ulujụ̄ngụ lwa nkulugo lungafwaga. 9Lolị Onanị āsimēnye ukuti abāna batịsakuja bāke; buno buno bo ịkwaganịla nunkị̄kulu jula alinkōnela pāsi īmbejụ, kokuti lungajangako ulujụ̄ngụ lwa nkulu. 10Īsị āsịbōmbịle Onanị sịkalinkyelile UNTWA, po papo alinkunngoga jōpe. 11Po lelo Jụta alinkummbūla Tamalị unkamwana alinkuti: Ujege mfwịle buno buno, ubūke ukị̄tūgalege pa gūso mpaka papo umwanāngu Syela ịsịlekukula. Ājobaga buno buno papo ātị̄laga ukuti jōpe ịsakufwa bo bābakulu, po papo Tamalị alinkugomokela ku gwịse ko alinkwakwịtūgala.

12Lelo bo gakīndịlepo amasịku mị̄ngị. Po papo unkasị gwa Jụta umwana gwa Syụja alinkwenda nukufwa. Pānyụma bo amalịle ukulila īfwa ja nkasị Jụta nu mmanyānị gwake Hịla ugwa kikolo kya Atụlamụ, balinkufyuka ukubūka ku kāja aka bịkuti Timụna, kuno ababōmbị bāke bāsịsēnyaga ulusyoja īng'ōsị syake. 13Umwene Tamalị abūlị̄gwe ukuti unkamwanago ịkubūka ku Tịmụna, kukusịsēnya īng'ōsị syake ulusyoja. 14Po papo alinkufụ̄la īngwamba syake isya bufwile, alinkwịkị̄nga umwenda kumāso, alinkwịnịembetelela nago alinkwịtūgala pakipata kya kāja ka Enaịmụ, pa njila iji jịkulabila ku Tịmụna; namanga āsịmēnye ukuti Syela akulịle, lolị bakalimpēle ukuti ajege nkasị. 15Umwene Jụta bo ammbwene alinkwịnogona ukuti nkị̄kulu gwa malaja, papo ālị̄kị̄ngịle umwenda kumāso. 16Po papo alinkubūka apa Tamalị ālị̄tūgēle pa mbali pa njila, alinkujoba nagwe alinkuti: Ịsaga unyịtikisye nịngile kumyako. Namanga akālimmēnye ukuti jo nkamwana. Umwene unkị̄kulu alinkummwamụla alinkuti: Kūmbaga fịkị linga gwịngị̄le kumyangu? 17Umwene alinkummwamụla alinkuti: Ngwakukutumila īmbene. Po papo unkị̄kulu alinkuti: Po ngīmba umbepo kamo akākukola mpaka papo kwịsakundumilaga. 18Umwene alinkunndālūsya, alinkuti ngupege ifyakukola fịkị? Unkị̄kulu alinkwamụla, alinkuti: Umbepo ulusāmbo lwako ulwa mmaboko ulu luli nikimanyịlo kyako, na kagoje kāke, kangi ni ngịlị iji jili nkiboko kyako. Po papo Jụta alinkwenda nukumpa, bo ampēle po alinkwenda nu kwịngila kumyake, umwene alinkwambilila ikifụba. 19Po papo unkị̄kulu alinkusụmụka ukubūka, alinkusōsya umwenda ugu ālị̄kị̄ngịle kumāso, alinkufwala kangi īngwamba syake isya bufwile.

20Jụta alinkutuma īmbene īndụbwa nu mmanyānị gwake ugwa kikolo kya Atụlamụ ukuti akammwegele ifị unkị̄kulu jula ākolịle, lolị alinkusị̄ta nukummwaga unkị̄kulu jula. 21Alinkubalālūsya abāndu ba pala pala, alinkuti: Abūkịle kūgu unkị̄kulu ugwa malaja jula, uju ālị̄tūgēle nkāja ka Enaịmụ pambali pa njila? Abēne balinkummwamụla balinkuti: Akajamo najumo ugwamalaja mmyitu mụno. 22Buno buno umụ̄ndu jula alinkugomokela kwa Jụta, alinkwakummbūla, alinkuti: Ngammwagako unkị̄kulu jula, bōpe nabāndu ba pala pala bāmbūlịle batịle: Akajamo najumo unkị̄kulu ugwa malaja mmyitu mụno. 23Po papo Jụta alinkwamụla alinkuti: Nndeke aje nafyo, tungịsakukosịgwa ịtolo īsonị, nukusekịgwa nabāndu, kēta une nalintumị̄le īmbene iji lelo utolị̄gwe ukummwaga.

24Bo gikīndịle imyesị mịtatu, abāndu balinkummbūla Jụta balinkuti: Tamalị unkamwanago alogịlwe; lilino ali nikifụba. Jụta alinkuti nsōsye ukuti akosịgwe mmōto. 25Lelo bo bịkusoka nagwe pānja, umwene unkị̄kulu alinkutuma amasyu kunkamwana alinkuti: Ndi nikifụba kya mụ̄ndu uju jo mwenenafyo ifị. Ufịkēte kangi ummanye umwenenafyo, akasāmbo aka kali nikimanyilo, akagoje aka, kangi ni ngịlị iji. 26Jụta alinkufịmanya alinkujoba alinkuti: Angīndịle ubugolofụ une, jo une nāsobịle papo nākābị̄le ukumpa umwanāngu Syela ukuti jo ēgane nagwe. Po papo alinkusị̄ta nukummwandisya ukummwega kangi.

27Lelo bo kịsịle akabalilo kakupāpila umwana, balinkwaga ukuti mapasa. 28Bo ali pakupāpa, umwana jumo jo alinkutala ukusōsya ikiboko, po papo unnyago gwa kupāpisya alinkukola ikiboko kila alinkukipịnya nubūsị ubukesefụ, alinkujoba alinkuti: Uju jo Mbasa. 29Lolị bo Mbasa ịkugomola ikiboko kyake, balinkummbona Sịndika ịkusōka, kokuno alinkuti: Kēta gwendịle kumaka ugwe! Buno buno ujege gwa maka. Panōngwa jijiji balinkumpa īngamu ja Pelesị. 30Pānyụma lelo po alinkusōka ugwamyabo nubūsị ubukesefụ pakiboko kyake; jo balinkumpa īngamu ja Sela.

Currently Selected:

Ubwandilo 38: NYB96

Highlight

Copy