Ubwandilo 37

Josefu na bāmyabo

1Jakobụ alinkwịtūgasya nkị̄su kya Kanānị mụmo ugwịse ị̄tūgalaga. 2Īsị syo nōngwa sya ba nkikolo kya Jakobụ. Josefụ bo afịkịle ifyinja kalōngo na fịhāno na fịbili (17), alinkwanda ukutị̄ma ing'ōsị palikimo na bāmyabo, abāna bā Bịlịha nā bā Sịlịpa, abakasị ba gwịse. Josefụ alinkumpāngila ugwịse imbị̄bị isị abāmyabo bābōmbaga. 3Umwene Ịsịlaelị jo ālinnganịle fị̄jo Josefụ ukukīnda bōsa abānāke abāngi; papo ālimpāpịle mbukāngale, Jakobụ alinkunsonela Josefụ unselekesye unkololanịe, unnụnụ fị̄jo ugwa maboko matalị 4Lelo bo abāmyabo basịkētịle ukuti ugwịsabo annganịle Josefụ ukukīnda abēne, balinkwenda nukummbēnga fị̄jo, balinkusịta nukujoba nagwe kanụnụ.

5Lumo Josefụ āgogịlwe injosị, po papo alinkubapāngila abāmyabo injosị syake po balinkukindilila ukummbēnga. 6Alinkubabūla alinkuti: Amụpilike injosị isị ngogịlwe. 7Kēta, twapịnyaga ingose sya ngano mụnngūnda, po papo ingose jāngu jilinkusụmụka jilinkwima ịtolo jilinkwịkịtịka. Lolị īngose syinụ syo sịlinkujisyungūtila īngose jāngu, sịlinkujigwila ulupị. 8Po papo abāmyabo balinkunndālūsya balinkuti: ngīmba nalolị kwịnogona ukuti uswe twịsakulāmbaga kumyako? Kwịnogona ukuti ugwe kwịsakujaga gwakutulagila uswe? Buno buno lelo balinkwenda nukukindilila ukummbēnga pa nōngwa ja njosị syake, kangi na masyu gāke. 9Pānyụma Josefụ alinkugogwa injosị isị̄ngi, syope alinkubabūla abāmyabo alinkuti: Kēta ngogịlwe injosị isị̄ngị: Ndinkukēta, ndinkulibona ilịsuba nu mwesị ni ndōndwa kalōngo na lumo (11) fịkūngundamila une. 10Po lelo alinkummbūla ugwịse na bāmyabo injosi sịsịsị, lelo ugwịse alinkunkemela, alinkuti: Ngīmba syo njosị nngị isị ugogịlwe? Ngīmba nalolị une nu nyoko na bamyinu twịsetukugụndamịlege ugwe? 11Po papo abāmyabo balinkuja nubūfị kumyake, lolị ugwịse jo alinkugabīka mụndụmbụla amasyu gagaga.

Josefụ bịkummūlisya abāmyabo nukuntwala Kwegịpịtị

12Nkabalilo kala abāmyabo balinkubūka kukutị̄ma ing'ōsị sya gwịsabo ku Syekemụ. 13Po papo Ịsịlaelị alinkummbūla Josefụ alinkuti: Abāmyinụ babūkịle kukutị̄ma ing'ōsị ku Syekemụ. Ịsaga ngutume ubūke ukabakēte. Umwene alinkwamụla alinkuti: Ena ngubūka. 14Po papo ugwịse alinkummbūla, alinkuti: Būka, mwanāngu ukabakēte abāmyinụ linga bagonịle bakafụ pamopēne nu ntị̄mo; ukagomoke gwịse ūmbāngile. Buno buno lelo alinkuntuma Josefụ ukufụma ndusōko lwa Hebulonị, po papo Josefụ alinkwakufịka ku Syekemụ. 15Umụ̄ndu jumo alinkummbona Josefụ bo ịkusyungūtila ndukubo, alinkunndālūsya, alinkuti: Kulōnda fịkị? 16Umwene Josefụ alinkummwamụla alinkuti: Ngubalōnda abāmyitu, nịkusūma ukuti ūmbūle linga ubabwene kuno bịkutị̄ma īng'ōsị. 17Umụ̄ndu jula alinkummwamụla, alinkuti: Basōkịlepo apa, mbilị̄ke bo bịkujoba bịkuti; tubūkege ku Ndotanị. Po papo lelo Josefụ alinkubakōnga abāmyabo alinkwakubāga pa Ndotanị. 18Abēne balinkummbona kubutalị, lelo bo akāli nukufịka apa bālịpo, balinkwịtikana ukummbōmbela īmbị̄bị, ukuti banngoge. 19Balinkujobana balinkuti: Kēta jula ịkwịsa unngogwanjosị. 20Tunngoge tuntāge mbwịna, tukwakujobaga ukuti ikinyamāna kịnndị̄le; po lelo twịsetukēte mụno sịsakujịlaga injosị syake. 21Lolị bo Lubenị umwana gwakipānda asịpilị̄ke sịsịsị, alinkulōnda ukumpoka alinkubabūla, alinkuti: Tunganngogaga. 22Alinkubabūla alinkuti: Komma ukōna ilịlopa; lolị mụntāge ịtolo mbwịna ubu buli ndukubo mụno, ukunngoga komma Namanga umwene ịnogonaga ukuti ịse ampoke kubāmyabo, ukuti anngomole kugwịse. 23Lelo bo Josefụ afịkịle pa bāmyabo, abēne balinkummwalukila balinkumfụ̄la unselekesye gwake unkololanịe untalị ugu āfwele 24Balinkunkola nukuntāga mbwịna ubu gakālịmo amīsi.

25Lelo bo bị̄tūgēle pāsi bịkulya ifị̄ndu; balinkwenda nukukibona ikilūndilo kya bany'Isịmailị, bafụmịle kukị̄su kya Gịlịatị, bali ni ngamịla syabo īnyị̄ngị isị syapīmbịle ifyakụfụ̄kisya nu nkota gwa kupaka kangi na lubanị, bābūkaga nafyo nkị̄su kya Egịpịtị. 26Po papo Jụta alinkujoba kubāmyabo alinkuti: Ngīmba tukukabaga fịkị linga tunngogịle ugwamyitu, nukufịsa ilịlopa lyake? 27Oko, tummūlisye ịtolo kubanya'Isịmailị aba, buno gwamyitu gwamwịlopa lyitu. Po papo abāmyabo bōsa balinkwenda nukwịtika. 28Abūlisị bamo abankikolo kya ba Mịndyanị balinkukīnda pāpo po papo balinkumfyula Josefụ mbwịna, balinkummūlisya kubany'Isịmailị īndalama amalōngo mabili (20) isya fesa: abēne balinkubūka nagwe Mwegịpịtị.

29Bo Lubenị agomokị̄leko ku bwịna kula alinkwaga Josefụ akajamo mbwịna, po papo alinkunyāfụlanịa imyenda gyake. 30Alinkugomokela kubāmyabo alinkuti: Umwanịke akajamo mbwịna, kali ndēndeke bule bule? 31Lolị abāmyabo ba Josefụ balinkwega īmbene balinkugoga, polelo balinkwega unselekesye gwa Josefụ balinkugujụbika mwịlopa. 32Balinkubūka nago kugwịsabo balinkujoba balinkuti: Tusalịle unselekesye ugu; twatigi ugumanye, kali go gwa mwanāko pamo mma. 33Umwene alinkugumanya unselekesye gula, alinkuti: Go gūgo go nselekesye gwa mwanāngu nalolị: Ītāta! Ikinyamāna kinndị̄le ikinyamāna kinnyāfụlenịe Josefụ! 34Po papo Jakobụ alinkunyāfụlanịa imyenda gyake, alinkufwala ikikụtụlo mụnsana, alinkunndilila umwanāke amasịku gāmị̄ngị. 35Abānāke bōsa abanyambala na bakị̄kulu balinkwịsa kukunsūbisya; lolị umwene alinkusị̄ta nu kusūbisịgwa, alinkuti: Ngunndililaga umwanāngu ngwakufịkaga papo nịsakusụlụkaga, ukubūka kubusyuka. Po papo Jakobụ alinkunndilila īfwa umwanāke Josefụ. 36Abēne aba Mịndyanị balinkummūlisya Mwegịpịtị, kwa Potịfali, unndōngosị gwa Falao, unkulūmba mbasịkali abalindililị.

Currently Selected:

Ubwandilo 37: NYB96

Highlight

Copy