Ubwandilo 35

Kyala ịkunsaja Jakobụ mụ Betelị

1Po papo kyala alinkummbūla Jakobụ alinkuti: Sụmụkaga ubūkege ku Betelị ko ukajēngege kula kula. Ko ukānjēngele ni kigemo kya kwịkemēkesyapo pa bujo ubu Kyala ākusetukị̄le ugwe bo kummbopa unkulugo Esabu. 2Buno buno Jakobụ alinkubabūla aba nnyụ̄mba jāke na bāngi aba āli nabo alinkuti: Amụgitāge gya bakyala imịhēsya igi mụli nagyo, mwịjēlusye kangi mụfwale imyenda imịnụnụ. 3Tukujapakusāma, tusụmwịke ku Betelị kuno ngwakunnjēngelaga Kyala ikigemo kya kwịkemēkesyapo, Kyala uju ālīndūlịle mbutolwe, uju āli nanịne mōsa mụno nēndaga. 4Buno buno balinkumpa Jakobụ gya bakyala gyosa imị̄ngị igi bālị nagyo, nutukuba utu bafwele mụmbulukutu; umwene Jakobụ alinkufịfịsa mụ mpịkị gwa mpāndapānda pa bupị̄pị na kāja ka Syekemụ.

5Lelo bo basụmwịke bịkwenda, po papo ulutēnde ulu ātumịle Kyala lulinkubagwila abenekị̄su aba ntwaja utu twalinsyungūtị̄le Jakobụ ukujēnga, balinkusịta nukubakōnga abāna ba Jakobụ. 6Jakobụ pamopēne na bāndu bōsa aba āli nabo balinkwakufịka nkāja ka Lụsu kokuti Betelị, nkị̄su kya Kanānị. 7Kula kula ko alinkujenga ikigemo kyakwịkemēkesyapo, alinkubupa ubujo bula īngamụ ja Eli-Betelị. Papo ko kuno Kyala ālinsetukị̄le lula ammbopege unkulu. 8Po papo Ndebola untūli gwa Lebeka alinkufwa, balinkunsyila nkikolo mụmpāndapānda kulubafụ lwa kwịtōngo ku Betelị; buno buno ubujo bula bula balinkubupa ingamụ ja Alonị-bakuti:

9Umwene Kyala alinkunsetukila kangi Jokobụ bo afụmịle nkị̄su kya Pandani-alamụ, po papo alinkunsaja Kyala alinkummbūla alinkuti: 10Ingamụ jāko gwe Jakobụ, loli lilino ujilekịle ija Jakobụ kujaga gwe Ịsịlaelị. Buno buno alinkubilikilịgwa ija Ịsịlaelị. 11Po papo Kyala alinkummbūla Jakobụ alinkuti: Jo une Kyala umwene maka gosa; ubālege fị̄jo, gōngelelege ukuja kikolo kinywamụ, ifịkolo fịngị fịkufụmaga mmyako jujugwe. Kangi bōpe na banyafyale bịkufụmaga mmyako jujugwe. 12Ikị̄su iki nālimpēle Abụlahamụ na Ịsịhaka, kyo nịkukupa ugwe, kangi na ba nndujụ̄ngụ lwako aba bịkwịsaga pānyụma pamyako. 13Po papo Kyala alinkufyuka kumwanya ukufụma pa bujo bula ājobaga nagwe. 14Po papo Jakobụ ālyimị̄ke īmbanda ja mabwe pabujo bula bula ājobelangapo na Kyala kangi alinkōnelapo ilịkemo lya fyakunwa na mafụta. 15Jakobụ alinkubupa ubujo bula ingamu ja Betelị.

Ubufwe bwa Lahelị

16Po papo balinkusōkapo pa Betelị: lelo bo basyele panāndi itolo ukufịka nkāja ka Fụlatị, akabalilo ka kupāpa Lahelị kalinkufịka, ulwanda lulinkummbaba fị̄jo. 17Bo āli mmbufụ̄mbwe ubukulūmba unnyago gwa kupāpisya uju āntūlaga alinkummbūla alinkuti: Komma ukutetema; buno lilino kujaga numwana ujūngi unndumyana. 18Lelo bo ịkusịlilika namanga āfwịle, po papo alinkumpa umwana jula īngamụ ja Benonị; lolị ugwịse alinkumpa īngamụ ja Benjamịnị. 19Buno buno Lahelị alinkufwa, balinkunsyila pa njila iji jịkubūka kukāja ka Fụlatị ko kuti Betịlehemụ. 20Umwene Jakobụ alinkulūndika amabwe pị̄pūmba, kyo kimanyịlo kya ịpūmba lya Lahelị iki kilịpo ukwịsakufịka kulilino kuno. 21Ịsịlaelị alinkwendelela ni njila jāke alinkukoma ilịtēmbe lyake nkyenị kulubafụ ulūngi lwa kisōnge kya Endelị.

Abāna ba Jakobụ abanyambala

22Bo Ịsịlaelị ịkwịtūgala nkị̄su kila, Lubenị umwanāke alinkwenda nukulogwa na Bịlịha unkasị gwa gwịse mbutị̄tu; Ịsịlaelị alinkusịpilika sịsịsị nubukalale ubwịngị. 23Abāna ba Jakobụ bālị kalōngo na babili: Abēne aba bāpāpị̄gwe mwa Lēja bo aba: Lubenị, jo gwakipānda mwa Jakobu, Sịmyonị, Lēbị, Jụta, Isakalị na Sabulonị. 24Aba bāpāpị̄gwe mwa Lahelị bo aba: Josefụ na Benjamịnị. 25Aba bāpāpị̄gwe mwa Bịlịha ummbōmbị gwa Lahelị unkị̄kulu bo aba: Ndanị na Nafụtalị. 26Aba bāpāpị̄gwe mwa Sịlịpa, ummbōmbị gwa Lēja unkị̄kulu bo aba: Gandi na Aselị. Bababa bo bāna aba Jakobụ ābapāpịle bo ali nkị̄su kya mụ Pandani-alamụ.

Ubufwe bwa Ịsịhaka

27Po papo Jakobu alinkufịka kuno ugwịse Ịsịhaka ālịko mụ Mamule pabupị̄pị na kāja ka Kilyatialaba kukāja ka Hebulonị kuno Abụlahamụ na Ịsịhaka bājēngịle pakwanda. 28Ịsịhaka āli ni fyinja īmịa jimo na malōngo lwele (180). 29Po papo alinkwenda nukufwa, alinkubakōnga abakamụ bo akāngele fị̄jo; abānāke babili bala Esabu na Jakobụ balinkunsyila.

Currently Selected:

Ubwandilo 35: NYB96

Highlight

Copy