Ubwandilo 34

Syekemụ ịkunkola Laịna nu kummōnānga

1Ilịsịku limo Laịna umwana unndīndwana uju Lēja ālimpāpịle Jakobụ, alinkusụmụka ukubūka kukwangala na balīndwana abenekị̄su. 2Po papo Syekemụ ugwakikolo kya Bahịfị, umwana gwa Hamolị umalafyale gwa kị̄su kila, alinkummbona Laịna, alinkwenda nukunkola kumaka, alinkummōnānga. 3Syekemụ ālinnganịle fịjo unndīndwana jula jula, po lelo alinkugela fị̄jo ukunsangalusya. 4Po papo Syekemụ alinkummbūla ugwịse Hamolị alinkuti: Ngusūma ukuti mụ̄nyēgele unndīndwana uju ajege nkasị gwangu. 5Umwene Jakobụ alinkupilika ukuti Syekemụ ammōnāngịle umwanāke Laịna. Pakabalilo kala kala abānāke abālumyāna bakālịpo, bābūkịle kukutị̄ma imịtị̄mo gyake nndukubo, buno buno Jakobụ alinkuja mye ịtolo mpaka bo abānāke bagomwịke. 6Po papo Hamolị ugwịse gwa Syekemụ alinkubūka kukujoba na Jakobụ. 7Abēne abāna ba Jakobụ bo bagomwịke ukufụma nndukubo, bo basịpilị̄ke īnōngwa sịsịsị, balinkukalala fị̄jo ilyojo lilinkubasịla, bo bāgịle ukuti Syekemụ abōmbịle īnyalị, isị sịkabagila ukubōmbịgwa nkikolo kya Ịsịlaelị. Ukunkola kumaka umwana gwa Jakobụ nu kummōnānga!

8Hamolị alinkubabūla, alinkuti: Umwanāngu Syekemụ ịkunndōnda fị̄jo ukummwega umwanīnụ; ngubasūma umwe ukuti mụmpepo ammwege ajege nkasị. 9Nātigi tweganịlege na nụmwe, twegege abānītu abalindwana. 10Mụjēngege nanụswe, kangi mụjēngege pōsa apa mwịganịle nkị̄su iki. Mụjēngege na nụswe nukubōmba mụno mụno isya kyusị, ukuti momụbwagilege ubukabị. 11Jope Syekemụ umwanāke alinkujoba kugwịse gwa nndīndwana Laịna na kubalūmbu alinkuti: Ngusūma ukuti nātigi mụnyị̄tikisye, ndyagege ilịpyana nkyenị mmyinụ. Nịkubapaga kōsa aka linga mụkulōnda kumyangu. 12Mụmbūle ifị mụkulōnda nalinga fịje fịngị bulebule ifya kukwa, nịsakubapaga bomụmo mụpimị̄le; linga mụnyịtikị̄sye ukummwega ukuti ajege nkasị gwangu.

13Po papo abāna ba Jakobụ balinkummwamụla mbusyobị Syekemụ nu gwịse Hamolị panōngwa ja kuti Syekemụ alinnyasịsye ulị̄lūmbu gwabo Laịna, balinkuti: 14Tukabagila ukummwịtikisya ulị̄lūmbu gwitu ukuti ēgane numụ̄ndu unsịta kubụ̄tịgwa, buno sịsịsị sịkujaga sya sonị kumyitu. 15Lolị tubagị̄le ukubị̄tikisya pēne pāpo linga mụkwịtika ukuja bo jujuswe, ukuti unnyāmbala gwesa nkati mmyinụ abụ̄tịgwege. 16Po tukubịtikisyaga ukuti mwegege abānītu abakị̄kulu; po tukujēngaga nanụmwe, tukwipelaga ukuja kikolo kimo kyene. 17Lolị linga mụtịkwịtika isị tukujoba isyakuti mụbụ̄tịgwe, po lelo tukummwegaga ulị̄lūmbu gwitu tukubūkaga nagwe.

18Amasyu gābo galinkubahobola ba Hamolị nu mwanāke Syekemụ. 19Unndumyana alinkusị̄ta nukuhābapo ukusịbōmba isị bājobịle, pāpo ālinnganịle nalolị umwana gwa Jakobụ. Kangi unndumyana jujuju ālyimikị̄gwe fị̄jo ukubakīnda bōsa abankikolo kyake. 20Buno buno Hamolị nu mwanāke Syekemụ balinkwịsa apa bābūngānaga abāndu nkāja kābo, na bāndu ba nkāja balinkuti: 21Abāndu aba bā lutēngāno kumyitu twatigi tubaleke bị̄tūgalege nkị̄su iki bēndesyege ikyusị mụno mụno, buno ikị̄su kyope kyelēfụ kibagị̄le ukubafwana. Tubagị̄le ukwēga abānābo abalīndwana ukuti bajege bakasị bītu kangi nanụswe ukubapa abānītu abalīndwana ukuti bēgege. 22Lolị kalịpo akāndu kamokēne ịtolo aka kabagị̄le ukubapelela ukujēnga nanụswe ukuti tujege kikolo kimokyene ko kuti: Unnyāmbala gwesa nkati mmyitu abụ̄tịgwege bo mụno bōpe bajīlị̄le. 23Bule kali ing'ōmbe, ni fyuma fyabo, kangi ni fị̄ngị ifịtị̄mịgwa fyābo fịtịsakujaga fyitu? Oko, twịtikane nabo po bịsakwịtika ukujēnga nanụswe. 24Buno buno bōsa abāndu bankāja kala balinkwịtika isị ājobịle Hamolị nu mwanāke Syekemụ, polelo abanyambala bōsa aba bābūngēne balinkubụ̄tịgwa.

25Pị̄sịku lya butatu, bo ifịlōnda fịkāli fịkubaba aba bābūtị̄gwe, abāna ba Jakobụ babili: Sịmyonị na Lēbị abalūmbu ba Laịna, balinkwega īnyūbo syabo balinkubanyomosya ịtolo abāndu ba nkāja kala, balinkwịngila nkāja kala, balinkubagoga abanyambala bōsa. 26Balinkunngoga Hamolị na ju mwanāke Syekemụ, balinkwenda nukunsōsya Laịna nnyụ̄mba ja Syekemụ, po papo balinkubūka. 27Po papo abāna ba Jakobụ abāngi balinkwịsa kubafwe, balinkupupa fyosa ifị fyalịmo nkāja kala, pāpo bālinnyasịsye ulị̄lūmbu gwabo. 28Po papo balinkupupa ni mịtị̄mo gyabo igya ng'ōsị ni gya ng'ōmbe kangi ni gya mbụ̄nda ni fị̄ngị fyosa ifị fyalịmo nkāja kala na mmịgūnda mōpe. 29Balinkupupa ifyuma fyabo fyosa, balinkubakola abakị̄kulu na bāna bōsa kangi nifị̄ngị fyosa ifị fyalịmo nnyụ̄mba syabo. 30Po papo Jakobụ alinkujoba na bānāke, Sịmyonị na Lēbị, alinkuti: Mụndwalịle ubutolwe, papo mụ̄mbelịle ukuti nnụ̄ngege kabị̄bị ku benekị̄su, abākikolo kya ba Kanānị na baPelesị; une ngaja na bāndu bị̄ngị ndi nabo banāndi fị̄jo. Lelo linga bōngēne pamopēne bịkulwa nanịne, bịsakumbyụtaga ịtolo, pamopēne na bannyụ̄mba jāngu. 31Lolị abēne abānāke balinkummwamụla balinkuti: Ngīmba syabagị̄le nalolị ulị̄lūmbu gwitu ukummbōmbela imbị̄bị ukufwana gwa malaja?

Currently Selected:

Ubwandilo 34: NYB96

Highlight

Copy