Ubwandilo 33

Ukusajana kwa Jakobụ na Esabu

1Po papo Jakobụ alinkukēta alinkummbona Esabu ịkwịsa, āli na bāndu bāmịa bana (400). Alinkubatapulania abānāke bamo alinkumpa Lēja bamo alinkumpa Lahelị, bububo ịtolo na kubabōmbị bāke abakị̄kulu babili bala. 2Alinkubalōngosya nkyenị ababōmbị bāke abakị̄kulu pamopēne na banābo, alinkukongelapo Lēja na banāke, umwene Lahelị na Josefụ balinkuja kubumalīkisyo, kūnyụma. 3Po papo umwene alinkukīnda nkyenị mmyabo bōsa alinkwịnama pāsi kahāno na kabili mpaka ukwịsakufịka kifụkị nagwe unkulu.

4Po papo Esabu alinkubopa ịtolo ukubūka pakwaganịla nagwe, alinkungwilila mmakosị alinkumponịa, po papo bo babili balinkulila. 5Lelo bo Esabu ịkukelenganịa alinkubabona abakị̄kulu na bāna, alinkulālūsya alinkuti: Bo bānị aba ulinabo? Jakobụ alinkwamụla, alinkuti: Bo bāna aba mwịpyana lyake Kyala āmbēle une ne mmbōmbị gwako. 6Po papo abakị̄kulu ababōmbị bala balinkusegelela pamopēne na ba banābo balinkufụgama pāsi balinkunngụ̄ndamịla Esabu. 7Po papo alinkwịsa jōpe Lēja pamopēne na banāke balinkumfụgamịla; lelo kubumalikisyo po alinkwịsa Josefụ na Lahelị, balinkunngụ̄ndamịla. 8Esabu alinkunndālūsya unnụgụna alinkuti: Fịlūndilo fya fịkị ifị naganị̄le nafyo? Umwene alinkwamụla alinkuti: Nātigi pamo ndyagilemo ilịpyana nkyenị mmyako gwe malafyale gwangu. 9Lolị Esabu alinkuti: Gwe gwamyitu, une ndinafyo fị̄ngị; ifị ulinafyo, fịjege fyako nụngwe jujugwe. 10Jakobụ alinkwamụla alinkuti: Mma, nịkukusūma ukuti, linga ndyagịle ilịpyana kumyako, po gwambililege ifyabupe fyangu ifị fịkunāngisya ulugano lwangu. Bo nịkwịsa nkyenị mmyako, ngufwana nịsịle nkyenị mwa Kyala apa ugwe ūnyāmbilị̄le nubwịkyele. 11Nịkukusūma ukuti gwambilile ifyabupe fyangu ifị ngutwalị̄le, buno Kyala āngētị̄le nkisa kangi āmbēle ifya kūfwana une. Buno buno bo amfịmbilịsye fị̄jo Esabu, po papo Esabu alinkwambilila ifyabupe fịla.

12Esabu alinkummbūla Jakobụ alinkuti: Oko, tusụmụkege tubūkege; une ngulōngolela nkyenị. 13Lolị Jakobụ alinkwamụla alinkuti: Gwe malafyale gwangu umēnye ukuti une ndi na bāna abakeke kangi nịkugipakisya imịtị̄mo igi gili nutwana, namanga linga mfịkūjị̄sye fị̄jo mwịsịku limolyene, po imịtị̄mo gyosa gịsakufwa. 14Lolị ugwe gwe malafyale gwangu, utalēngepo, une ne mmbōmbị gwako, nikukōngaga mụ̄nyụma panāndi panāndi, ukukōnga mụmo gịkwendela imịtị̄mo, kangi na mụmo bịkwendelaga abāna, mpaka apa ngwakukwagilaga ugwe mu Seịlị.

15Buno buno lelo Esabu alinkummbūla Jakobụ alinkuti: Oko, ngulekelepo bamo abāndu aba ndi nabo. Lolị Jakobụ alinkwamụla alinkuti: Gwe malafyale gwangu, lolị ungatigi jilịpo jimo imbōmbo ingulūmba ijakuti jo basyalile kuno? Lịipyana lyako lyene lyo nịkusūma kumyako. 16Po papo lelo Esabu alinkusụmụka mwịsịku līlyo alinkugomokela ku Seịlị. 17Umwene Jakobụ jo alinkubūka kukāja ka Sụkotị, ko alinkwakujēnga īnyụ̄mba jāke na matēmbe ga ng'ōmbe syake; jo nōngwa iji ubujo bula īngamụ jāke jo Sụkotị.

18Jakobụ alinkwakufịka kanụnụ ịtolo nkāja ka mụ Syekemụ, nkị̄su kya Kanānị, bo afụmịle ku Pandani-alamụ. Alinkujenga amatēmbe gāke kifụkị na kāja kala kala. 19Ikị̄su kila ājēngịlepo amatēmbe gāke ālyulịle ku bāna ba Hamolị ugwịse gwa Syekemụ, ku ntēngo gwa ndalama īmịa jimo (100). 20Pa bujo bula bula alinkujengapo ikigemo kya kwịkemēkesyapo, kangi alinkubupa ubujo bula īngamụ ja El-elohe-Ịsịlaelị, kokuti Kyala gwa Ịsịlaelị.

Currently Selected:

Ubwandilo 33: NYB96

Highlight

Copy