Ubwandilo 32

Jakobụ ịkwịtendekesya ukwaganịla na Esabu

1Umwene Jakobụ alinkusụmụka kangi injila jāke lelo po papo abāndumị ba Kyala balinkwaganịla nagwe. 2Umwene Jakobụ bo ababwene alinkujoba alinkuti: Īki kyo kilūndilo kya bwịte bwa NTWA! Alinkubupa ubujo bula ingamụ ja Mahanaịmụ.

3Umwene Jakobụ alinkubatuma nkyenị abāndu bāke ukubūka kwa Esabu unkulu, nkāja ka Seịlị; nkị̄su kya Etomụ. 4Alinkubabūla, alinkuti: Mụkammbūle Esabu umalafyale gwangu ukuti: Ne mmbōmbị gwake Jakobụ nịkummbūla ukuti, nāgonaga kwa Labanị; ko kuno nālịko ifyinja fyosa ifị. 5Ngabịle ing'ōmbe, ni mbụ̄nda, ni ng'ōsị na bā mbōmbo bā bị̄ngị abanyambala na bakị̄kulu; ngutuma amasyu kumyako, ngusūma ukuti ujege niịpyana kumyangu.

6Bo bagomwịke aba ābatumịle, balinkummbūla balinkuti: Tujịlekufịka ku nkulugo Esabu, tummbūlịle isị gwatutumị̄le, lilino ali mụnjila ịkwịsa kukwaganịla nanụngwe, ali na bāndu bāmịa bana (400). 7Umwene Jakobụ bo apilị̄ke sịsịsị alinkutetema fị̄jo nukunyololoka mụ̄nda, alinkubajabanịa pabili abāndu aba bālị nagwe, syope īng'ōsị ni ng'ōmbe ni ngamịla alinkusịbīka mmịtị̄mo mịbili. 8Alinkwịnogona alinkuti: Linga Esabu ịkwịsa atwele ubwịte pakilūndilo kya kwanda, ikilūndilo kya bubili kịsakuponaga.

9Po papo Jakobụ alinkwịpụ̄ta alinkuti: Gwe Kyala gwa bātāta, gwe Kyala gwa Abụlahamụ na Ịsịhaka. Gwe NTWA gwangu, gwe gwalimbūlịle gwatịle: Gomokela ku kị̄su kyako na kubāndu ba kikolo kyako, po nịsakukubōmbelaga īnụnụ. 10Ngāli joune negwa kūmba ilịpyana lyako nukūnāngisya ubusubilịgwa bwako buno buno. Bongubūka lula ndinkuloboka ulwisi Jolịtanị bo ngolị̄le īngịlị jāngu jēne. Lilino nịkugomoka nifịlūndilo fịbili ifị. 11Nịkukusūma ukuti: Umboke ku nkulu gwangu Esabu, nndi nulutēnde, ukuti bo ịkwịsa ịsakutwala ubwịte, po ēnde nukutugoga twesa na bakị̄kulu pamopēne na bāna. 12Ungị̄bwaga ugwe gwajobịle gwatịle: Nịsakukubōmbelaga inụnụ kangi nịsakulubāsyaga ulujụ̄ngụ lwako, bịsakujaga bị̄ngị bo gu nsānga gwa kwa sūmbi ugu najumo akamanya ukugubala.

13Buno buno Jakobụ alinkugona pala pala ikilo kila. Po papo alinkusāgulapo ukufụma mụli ifị āli nafyo ukuti fyo ampege unkulu Esabu. 14Īmbene imbīkị bāmịa babili (200), īmbōngo amalōngo mabili (20) (2), ing'ōsi imbīkị bāmịa babili (200), īng'ōsị īmbōngo amalōngo mabili (20). 15Ingamịla isị syali ni bāna amalōngo matatu (30) ing'ōmbe amalōngo manạ (40), ni ngāmbaku kalōngo (10), imbụ̄nda inyāmbala kalōngo. 16Alinkusịbīka mmaboko ga babōmbị bāke, untị̄mo ugu nu mmbōmbị jumo, untị̄mo ugūngi nū mmbōmbị ujūngi pasịma, po papo alinkubabūla ababōmbị bāke, alinkuti: Mụtalengepo nkyenị. Pakati pa ntịmo ugu nu gūngi mụlekengepo untāmbo. 17Alinkunndīngānịa ummbōmbị gwake untasị, alinkuti, linga unkulu gwangu Esabu ịkwaganịla nanụngwe ịkulālūsya ịkuti: Ulimmbōmbị gwanị? Kubūka kūgu? Ifyuma ifị fịlōngwịle nkyenị mmyako fyanị? 18Po ugwe ukammbūlege ukatigi: Fya Jakobụ umụ̄ndu gwako; fyo fyabupe ifị akutumị̄le ugwe gwe malafyale gwitu, jōpe ịkutukōnga ịkwịsa alịko kūnyụma. 19Amasyu bo gagaga alinkunndīngānịa nugwa bubili nu gwa butatu kangi na bāngi aba bakōnganaga ni mịtị̄mo alinkuti: Syo mụkajobege sịsịsị kwa Esabu linga mụkwaganịla nagwe. 20Kangi jōpe na ju mụ̄ndu gwako Jakobụ ịkwịsa lululu mụkatigi: Ali kūnyụma uko. Namanga Jakobụ inogonaga ukuti, pamo po ahoboke mbukalale bwake, kunōngwa ja fyabupe ifị fyatalịlepo nkyenị lelo linga nịkwaganịla nagwe pamo ịsakūhobokelaga. 21Ifyabupe fịla fịlinkutalapo; umwene alinkugona mmatēmbe ikilo kīkyo.

Jakobu ịkulwa ulusịndano pa Penịelị

22Jakobu alinkusụmụka pakilo, alinkubēga abakasị bo babīli, nabakị̄kulu ababōmbị babili bala, pamopēne na banāke kalōngo na jumo (11), balinkuloboka pa kiloboko kya lwisi Jabokị. 23Bo abalobwịsye pa lwisi pamopēne nifị̄ngị fyosa ifị āli nafyo, 24alinkusyala mwene ịtolo pala pala. Po papo umụ̄ndu alinkusị̄ndana nagwe ulusị̄ndano ikilo kyosa ukwịsakufịka kubukye. 25Lelo umụ̄ndu jula bo āgịle ukuti atịkuntola Jakobụ, alinkumpalamāsya mụnsana, mụno kị̄kūngịle ikilūndi, po papo ikilūndi kilinkwenda nukufịguka nkikolo bo bịkusị̄ndana. 26Umwene umụ̄ndu jula alinkummbūla Jakobụ alinkuti: Ndekesya mbūkege, kēta bujenjelwịke. Umwene Jakobụ alinkukāna, alinkuti: Ndịsakukulekesya, lolị ūsaje tāsị. 27Po papo umūndu jula alinkunndālūsya Jakobụ alinkuti: Gwanị īngamụ jāko? Alinkummwamụla alinkuti: Ne Jakobụ. 28Po papo umụ̄ndu jula alinkummbūla Jakobu alinkuti: Lilino ujilekịle īngamụ ija Jakobụ, lolị kujaga gwe Ịsịlaelị papo ulwịle na Kyala, kangi na bāndu, gwendịle nukutola. 29Po papo Jakobu alinkunndālūsya umụ̄ndu jula alinkuti: Ngusūma ukuti ūmbūle īngamụ jāko. Umwene alinkwamụla alinkuti: Fịkị kulālūsya īngamụ jāngu? Po papo alinkwenda nukunsaja. 30Umwene Jakobụ alinkujoba alinkuti: Ngētēne na Kyala pamāso lolị ngāli ndi mūmị! Po papo alinkubupa ubujo bula īngamụ ja Penịelị. 31Ilịsuba lilinkunsokela pala pala pa Penịelị, alinkumyonyoka ịtolo ukwenda, panōngwa ja kufyogoka ikilūndi. 32Buno buno ukufịka na ku lilino kuno abany'Ịsịlaelị batịkulya inyama ja nkikolo nkilūndi, papo mo mụno ugwandumị gwa Kyala ālimpalamāsị̄sye Jakobụ.

Currently Selected:

Ubwandilo 32: NYB96

Highlight

Copy