Ubwandilo 31

Jakobu ịkummbopa Labanị, ịkugomokela ku kāja kuno āfụmịle

1Jakobụ alinkupilika ukuti, abāna ba Labanị bịkwịbụnēsya bịkuti: Jakobụ ēgịle ikyuma kyitu kyosa iki kyali kya tāta; mo mụmo abwagịle ubukabị bōsa ubu. 2Kangi Jakobụ alinkwaga ukuti, jōpe Labanị atịkwangala nagwe bunụnụ bo ulutasị. 3Po papo UNTWA alinkummbūla Jakobụ alinkuti: Sụmụkaga ugomokelege kukị̄su kya bā gūso na kubakamụgo une nịsakujaga nanụngwe. 4Po papo Jakobụ alinkubabilikila abakasị; Lahelị na ju Lēja, ukwịsa kulukubo kuno gyaliko imịtị̄mo gyake, alinkubabūla abakasị alinkuti: 5Ngētịle ukuti ntubalilo utu, ugwịsēmwe atịkungēta bunụnụ bo mụno āngētelaga ulutasị. Lolị Kyala gwa bā tāta jo ali na nịne. 6Musịmēnye nanụmwe ukuti nummbōmbị̄le ugwịsēmwe na maka gangu gōsa. 7Lolị umwene āsyobịle une, atịle nukwandula umfwalo gwangu kākịngi, utubalilo kalōngo; lolị Kyala jo akālimmwịtikị̄sye ukuti ambōmbelege une īmbị̄bị. 8Bo Labanị ajobị̄le ukuti imbene ingekanịe syo sịkujaga mfwalo gwako, po papo syosa ịtolo mụntị̄mo sịlinkubīka utwana utukekanịe; kangi bo ajobile ukuti, imbene isulula syo sịkujaga mfwalo gwako, syosa ịtolo mụntīmo sịlinkubīka utwana utusulula. 9Mo mụmo Kyala ēgị̄le ikyuma kya gwịsēmwe, ēndịle nukūmba une. 10Pa kabalilo aka mmịtị̄mo sịmo sị̄pīngulaga, ndinkugogwa injosị, ndinkwaga ukuti īmbongo isị syendesyaga syali sulula ni ndonōnde kangi ni ngekanịe. 11Po papo mụ njosị syangu ugwandumị gwa Kyala alinkumbilikila une, alinkuti: Gwe Jakobụ, popạpo ndinkwamụla ndinkuti: Une apa! 12Umwene alinkuti, ukēte! Īmbōngo syosa isị sịkwendesya īmbene sulula, ni ndonōnde kangi ni ngekanịe. Nsịpelịle ukuti sịje buno buno papo nsịbwene syosa isị Labanị akubōmbị̄le ugwe. 13Jo une Kyala uju akusetukị̄le ugwe nkāja ka Betelị, pala gwalipakịle amafụta ilịbwe lya kukumbukilamo, pala ufị̄ngege ulufị̄ngo kumyangu. Sụmụkaga lelo usōkemo nkị̄su iki, ugomokelege kukị̄su iki gwa pāpilịgweko. 14Po papo Lahelị na Lēja balinkummwamụla Jakobụ balinkuti: Fịkị fịlịmo nnyụ̄mba ja tāta ifya kufị̄ngilapo uswe? 15Kana umwene atubikịle ukuja bāndu bahēsya nkyenị mmyake! Namanga atūlị̄sye, kangi alị̄le kyosa ikyuma iki ālyambilị̄le pamyitu. 16Īkyuma kyosa iki Kyala ēgịle kwa tāta, kyitu uswe na banītu, mma ubōmbege ịtolo syosa isị Kyala akubūlịle.

17Buno buno Jakobụ alinkwịtendekesya ukusụmụka, alinkubakwesya abānāke na bakasị pa ngamịla, 18alinkusilōngosya nkyenị ing'ōmbe syake syosa ni mịtị̄mo gyosa igi ākabịle nkị̄su kya Pandani-alamụ, alinkōmoka ukubūka kugwịse Ịsịhaka nkị̄su kya Kanānị. 19Umwene Labanị jo āsōkịlepo ābūkịle pakusịsēnya ulusyoja īng'ōsị syake, po papo Lahelị alinkwịba ifịfwạnị fya gyabakyala ifị fyali nnyụ̄mba ja gwịse. 20Bo Jakobụ ịkusụmụka, akālinndagịle Labanị ugwa kikolo kya Alamụ, Alinkujōnga. 21Alinkwega fyosa ifị ākabịle. Alinkuloboka ulwisi Fụlatị, alinkulabila kukị̄su kya mfyamba fya Gịlịatị.

Labanị ịkunkōnga Jakobụ

22Bo gakīndịlepo amasịku matatu, Labanị bo abūlị̄gwe ukuti Jakobụ ajōngịle, 23alinkubēga abakamụ bāke aba āli nabo, balinkunkōnga Jakobụ amasịku mahāno na mabili, balinkwakummwaga nkị̄su kya mfyamba fya Gịlịatị. 24Lolị pakilo Kyala alinkummwịsila mụ njosị Labanị, ugwa kikolo kya Alamụ, alinkummbūla alinkuti: Uje māso, komma ukummbōmbela nasịmo Jakobụ, isya kunsaja pamo isya kunngụna. 25Po papo Labanị alinkummwaga Jakobụ kuno ājēngị̄le ilịtēmbe mfyamba. Jope Labanị na bakamụ bāke balinkujēnga amatēmbe gābo mụla mụla mfyamba fya Gịlịatị. 26Umwene Labanị alinkunndōnga Jakobụ, alinkuti: Syo sya fịkị isị umbōmbị̄le gwe mwanāngu, apa ūsyobịle une, ujōngịle ịtolo na banāngu ukufwana bapupịgwa aba ubakolịle mbwịte? 27Nōngwa ja fịkị ujōngịle ịtolo kubutị̄tu, gwe nsịta kūmbūla une, ukuti ndagane nanụmwe mbasịndikile nubwịkyele, pamopēne na kōgo kanyīmbo, na malōnge na mapāngo? 28Kangi gwalekịle fịkị ukuti nndi mụkagone abānāngu pamopēne na bịsukulu bāngu? Īsị umbōmbị̄le ugwe sya bukonyofụ. 29Nābagị̄le ukukōnānga ugwe lolị Kyala gwa bāgūso jo āmbūlịle mụnjosị nkilo ukuti nangakubōmbelaga nasịmo. 30Mmēnye ukuti gwasụmụkaga pāpo gwali nubusyukwe bwa kugomokela ku nyụmba ja gūso, lolị nōngwa jā fịkị gwịbịle bakyala bāngu? 31Umwene Jakobụ alinkummwamụla alinkuti: Nātị̄laga ukuti kwịsakupoka abānāko abalindwana aba. 32Lolị uju linga ummwagịle na bakyala bāko jo agogịgwege ịtolo. Lilino utumanyepo, utūndu tōsa unāngisye akāndu aka kāko ugwe, bo na bakamụ bītu aba bịkukēta. Umwene Jakobụ jo akāsimēnye na panāndi ukuti jo Lahelị uju ālībile bakyala bala.

33Po papo Labanị alinkwịngila mụ hēma ja Jakobụ ni ja Lēja, kangi na mụ hēma sya bakasị bāke abatumwa bala babili, alinkusita ukufyagamo nafịmo, alinkusōka alinkwakwịngila mụ hēma ja Lahelị. 34Lahelị jo uju ālị̄bịle bakyala nnyụ̄mba, alinkubafịsa nkati mu nyāmbi iji bịktwitūgasyapo bo bịkwịtoga pa ngamịla, alinkwịtūgalapo. Po papo Labanị alinkulōnda mụ hēma jōsa, lolị alinkutolịgwa ukubāga. 35Umwene Lahelị alinkummbūla ugwịse alinkuti: Gwe tāta, ungakalalaga apa une ngasụmụka mma, namanga nndi mbubị̄bị bwa twebakị̄kulu. Labanị alinkulōnda fị̄jo, lolị alinkusị̄ta nukugyagamo gya bakyala gyake.

36Po papo Jakobụ alinkukalala alinkujoba kwa Labanị alinkuti: Kali ngōnāngịle sya fịkị? Lilino ububị̄bị bwangu bobuliku pakungōnga une nubukalale bōsa bo bububu? 37Napapo ulōndịle upetụsenịe fị̄jo mōsa mfị̄ndu fyangu, kali ukāgịlemo kamo akāndu kāko? Unāngisye pabwelụ ukuti bōsa aba bālịpo apa bakabone, abakamụgo na bakamụ bāngu, ko kuti batulōnganịe uswe. 38Ifyinja fyosa amalōngo mabili (20) ifi nị̄tūgēle nanụngwe, īng'ōsị syako ni mbene syako sịkasopolamo, kangi ngalyamo sịku ni ng'ōsị jimo ja ntị̄mo gwako. 39Iji linga ikinyamāna kikolịle ndinkusịta nu kwịsako najo kumyako, lolị nāpyanịkisyangapo. Linga abāndu bị̄bịle pamụ̄si pamo pakilo jilinkuja nōngwa jāngu jujune. 40Utubalilo tūtwịngị ndinkukubilwa nulumụ pamụsi kangi ni mbepo pakilo. Ndinkusịta nukugona nutulo. 41Nị̄tūgēle nanụngwe ifyinja amalōngo mabili (20); ifyinja kalōngo nafịna (14) nakubōmbelaga panōngwa ja banāko abalīndwana babili aba nēgịle, kangi ifyinja ntandatu ndinkukubōmbela panōngwa ja mịtị̄mo igi gwalimbēle. Lolị ugwe gwalyandwịle umfwalo gwangu kalōngo kosa. 42Linga Kyala gwa tāta akāli nanịne, Kyala gwa Abụlahamụ, Kyala uju Ịsịhaka antị̄laga angali ungagịle kisịta kūmba nafịmo. Lolị Kyala āsịbwene ingubilo syangu kangi ni mbōmbo ingafụ iji nābombịle; fyobēne akulōngịle nkilo.

Ulwịtikano lwa Jakobụ na Labanị

43Po papo Labanị alinkummwamụla Jakobụ, alinkuti: Abāna abakị̄kulu aba bāngu, na babānābo bōpe bāngu, kangi gyope ni mịtị̄mo igyo gyangu une. Pamopēne nifị̄ngị ifị kufịkēta. Lolị kali mbōmbe sya fịkị umụsyugu ku banāngu abakị̄kulu aba pamo ku bāna aba bapāpịle? 44Oko tufị̄nge ulufị̄ngo lilino ukuti lo lujege bukētị bwitu une na nụngwe. 45Po papo Jakobụ alinkwega ilịbwe ukuja ka kukumbukilamo. 46Alinkubabūla abāndu aba āli nabo ukuti balūndikepo amabwe pala pala, abēne balinkulūndika amabwe ga mị̄ngị. Po papo balinkulīlanịla ifị̄ndu kifụkị na mabwe aga bālūndị̄ke. 47Ikilūndiko kya mabwe gala, Labanị alinkukipa īngamụ ja Jegali Sahanduta. Lolị Jakobụ alinkukipa īngamụ ja Galendị. 48Po papo Labanị alinkuti: Amabwe aga tulūndị̄ke apa umụsyugu go gịsakujaga bukētị bwitu une na nụngwe. Jo nōngwa iji ubujo bula balinkubupa ingamụ ja Galendị. 49Kangi ni ngamụ ja Mịsịpa papo Labanị ātigi, UNTWA jo atukētege uswe twesa babili napa linga tulekanịle. 50Linga kubanyasya abānāngu aba, pamo kwegelapo abakị̄kulu abāngi, napa linga ngajapo une ndịkusịbona, ukumbukege ukuti Kyala jo nketị gwitu une na nụngwe.

51Po papo Labanị alinkwendelela ukujoba alinkummbūla Jakobụ alinkuti: Ukēte ikilūndiko kya mabwe iki niịbwe lya kukumbukilamo ili nndikūmbị̄le bo ugwe nanịne tukukēta. 52Fyosa fịbili fịfịfị, ikilūndiko kya mabwe iki kangi niịbwe lya kukumbukilamo ili, lo lujīgo lwakuti, najumo mmyitu uswe atịsakukīndaga apa, bo atwele ubwịte kunnịne. 53Kyala gwa Abụlahamụ, Kyala gwa Naholị, Kyala gwa gwịsabo, jo ịse ajege nndōngị pakati pamyitu. Po papo Jakobụ alinkulapila mwa Kyala uju Ịsịhaka ugwịse antị̄laga. 54Jakobụ alinkuntwalila Kyala ilịkemo pa kyamba kila kila, alinkubabilikila na bakamụ bāke kukulya ikisyesye. Bo balị̄le balinkugona pakyamba pala pala.

55Ilya kilābo nulubūnju fị̄jo Labanị alinkulagana na bị̄sukulu bāke na banāke abalindwana bala nukubasaja: po papo alinkugomoka ukubūka kumyake.

Currently Selected:

Ubwandilo 31: NYB96

Highlight

Copy