Ukusōka 8

Ifyula

1Lelo po pāpo UNTWA ALINKUMMBŪLA Mose alinkuti: Ubūke kwa Falao ukammbūle ukati: UNTWA ịkuti: Ubabūle abāndu bāngu ukuti bambōmbelege imbōmbo. 2Lelo linga kukāna ukubasōsya, ikị̄su kyako kyosa āngūkufụ̄ndaga ni fyula; 3ulwisi Naịlị lụkwịsulaga ifyula fịsakwịsaga nnyụ̄mba jāko na kusofụ kuno kugona na pakitala kyako, na nnyụ̄mba syababōmbị bāko ni sya bāndu bāko, na mfịpembelo fyako na mụ bakụlị syāko isyakufụgilamo ubufụ. 4Kunyụma fịsakukwelaga mụmmbili, na mbāndu bāko na mbabōmbị bāko abakulūmba bosa. 5Po papo UNTWA alinkummbūla Mose alinkuti: Ukammbūle Alonị ukati: Golosya ikiboko kyako ningịlị jāko pamwanya pa nyīsi, pa fịsōko na pa matụbwị, kangi ifyula ufịpelelege ukwịsa nkāja nkị̄su kya mw'Egịpịtị, 6po papo Alonị alinkugolosya ikiboko kyake pa mīsi ga mw'Egịpịtị; po lelo ifyula fịlịnkufyuka fịlinkwịsula nkị̄su kyosa kya mw'Egịpịtị. 7Lolị abapela twịlị twa mụngịsị bōpe balinkubōmba bo sịla sịla mmānga gābo, balinkufịtwala ifyula pakị̄su kya Egịpịtị.

8Po papo Falao alinkunkōlela Mose na Alonị, alinkubabūla alinkuti: Nsūme UNTWA afisōsyepo ifyula pa myangu na mbāndu bāngu; āngubasōsya abāndu ukuti babūke ku kwịkemesya ku NTWA. 9Po papo Mose alinkummwamụla Falao alinkuti: Nịsakusekela ukukwịpụ̄tila. Ugwe umbepo akabalilo akā kuti ngwịpụ̄tilege, ugwe nababōmbị bāko, nabāndu bako. Po lelo ifyula fyosa fịsakujōngaga fyosa kitịsakusyalaga nakimo, lolị fịsakusyalaga mụ mwa Naịlị. 10Po ātịle: Kilābo. Mose ātịle: Bo sịkujaga bomụno ujobị̄le, ko kuti usyaganịe ukuti akajako najumo uju afwene nu NTWA Kyala gwinụ. 11Ifyula fịkusōkangapo pa myako na nnyụ̄mba syako na kubabōmbị bako na kubāndu bāko; fịkusyalaga fịfya mwa Naịlị. 12Po papo Mose na Alonị balinkusōka ukufụma kwa Falao; Mose alinkusūma ku NTWA kunōngwa ja kufịsōsyamo ifyula, ukukōnga mụno alị̄tikanị̄le na Falao. 13Po Papo UNTWA alinkusịbōmba bo mụmo Mose asūmị̄le, ifyula fịlinkufwa fịlinkumalika mụ nyụ̄mba na mụmbīngilo na mmịgūnda. 14Balinkufịbūngānia mfịlundiko mfịlundiko, ikị̄su kilinkunụ̄nga. 15Lelo bo Falao āgịle ukuti ubutolwe ubu bwalịpo bumalịke alinkwandisya kangi ukuja ni ndụmbụla ingafụ, alinkusịta ukubapilika; sịlinkwịsa isị UNTWA ājobịle.

Ingolo

16Lelo po papo kangi UNTWA alinkujoba kwa Mose alinkuti: Ummbūle Alonị agolosye ingịlị jāke akome umfụ̄mbi gwa pāsị, ukuti gwịpelege tusụnịa nkị̄su kya mw'Egịpịtị mosa. 17Po papo balinkubōmba sịsịsị; Alonị alinkugolosya ikiboko kyake ni ngịlị, alinkukoma umfūmbị gwa pāsi, po papo ingolo sị̄linkubamota abāndu nifịnyamāna. Umfụ̄mbi gōsa sịlinkuja ngolo nkị̄su kya Egịpịtị kyosa. 18Abapelatwịlị twa mụngị̄sị bāgelịle mmānga gābo ukuti bapele ingolo lolị bātolị̄gwe. Po papo sịlinkubabūmba abāndu nifịnyamāna. 19Po lelo abapelatwịlị balinkummbūla Falao balinkuti: aga gomaka ga Kyala. Lolị Falao alinkukāna kangi ukwịtika, alinkusịta ukulōnda nukubapilikisya isị bājobaga; sịlinkuja bo mụmo UNTWA ājobị̄le.

Imbwele syapamusi

20Po papo UNTWA alinkummbūla Mose alinkuti: Ulābile nulubūnju ukanngụ̄lilege Falao, bo ịkubūka ku mīsi, ukammbūle ukati: UNTWA ịkuti, ubasōsye abāndu bāke ukuti bakammbōmbelege. 21Lolị ngukusoka linga utịkubasōsya nisakukutumilaga imbwele ugwe nababōmbị bāko ba bāndu bako, na nnyụ̄mba syako; inyụ̄mba sya Begịpịtị sịsakwịsulaga imbwele, pōsa pāsi apa bịkwima sịsakujaga mbwele ndupu. 22Lolị ilịsịku lila lila nịsakukibīkaga pasịma ikị̄su kya Gosyenị, mụno abāndu bāngu balịmo, ko kuti imbwele sịngabịsilaga; ko kuti usịmanyege ukuti joune ne NTWA pakati pakị̄su. 23Bo buno buno nịsakubatapulanịaga abāndu bāngu na bāndu bāko ikị̄ka kikiki kịkubonekaga kilābo. 24Po papo UNTWA alinkubōmba bo sịsyo ājobịle; sịlinkwịsa imbwele inyịngị fị̄jo nnyụ̄mba ja Falao na nnyụ̄mba sya babōmbị bāke, na nkị̄su kya Egịpịtị kyosa, ikị̄su kyosa kyalyonangịke kunōngwa ja mbwele.

25Po lelo Falao alinkubabilikila ba Mose na Alonị alinkuti: Amụbūke mụkịkemēsye kwa Kyala gwinụ, nkị̄su mụno mụno. 26Po papo Mose alinkwamụla alinkuti: Sịtịsakuja nụnụ ukubōmba bo sịsịsị; namanga twịsakwịkemēsyaga ku NTWA Kyala gwitu amakemo aga ab'Egịpịtị bakagagana. Bule ab'Egịpịtị batịsakututịka na mabwe linga tụkwịkemēsya nkyenị mmyabo amakemo aga bagabēngịle? 27Kubagị̄le ukuti twendege amasịku matatu ukubūka nndungalāngala ko tukịkemēsyege ku NTWA Kyala gwitu bo mụno ịkwakutulagililaga jūjo. 28Po Papo Falao alinkwamụla alinkuti: Nịtịke mụbūkege mụkị̄kemēsyege ku NTWA Kyala gwinụ nndungalāngala; lolị mụngabūkaga kubutalị fị̄jo. Mụkāndambilege ku NTWA. 29Mose alimmwamwịle ātịle: Bo ngusụmụka ịtolo, ngusūmaga ku NTWA ukuti kilābo imbwele sisōkēngemo mmyako, mbabōmbị bako na mmbāndu bako; lolị ungāsyobaga kangi, ukuti ubakanịsyege abāndu ukubūka kukwịkemēsya ku NTWA. 30Po papo Mose alinkusōka ukufụma kwa Falao, alinkwakusūma ku NTWA. 31Po papo UNTWA alinkusịbōmba sịsyo Mose ālinsūmịle, alinkusisōsyamo īmbwele mwa Falao na mbabōmbị bāke na mmbāndu bāke; jikāsyelemo imbwele najimo. 32Lolị pōpe Falao alinkuja ni ndụmbụla ingafụ ākānịle ukubịtikisya abany'Ịsịlaelị ukusōka.

Currently Selected:

Ukusōka 8: NYB96

Highlight

Copy