Ukusōka 7

1Po papo UNTWA alinkummbūla Mose alinkuti: Ukēte, ngukupelaga ukuja gwe Kyala kwa Falao; Alonị ugwamyinụ ịkujaga jo nkụngụluka gwako. 2Gwịsakujoba syosa isị ngukulagila; lelo Alonị ugwamyinụ jo ịsakummbūlaga Falao, akubasōsya abany'Ịsịlaelị nkị̄su kyake. 3Lolị Falao ngumpelelaga indụmbụla ingafụ, na papo ngusōsyaga ifị̄ka fị̄ngị nifịswịgu nkị̄su kya Egịpịtị, 4Falao atịsakupilikisyaga isị mụkujoba; po lelo nịsakutwalaga ulufụ̄ndo ulukulūmba mw'Egịpịtị, po nịsakubasōsyaga nkị̄su abāndu ba mfịkolo fya bāndu bāngu. 5Po abāndu ba mw'Egịpịtị bịsakūmanyaga ukuti une joune ne NTWA, bo ngugolosya ikiboko kyangu pa Egịpịtị nukubasōsyamo abany'Ịsịlaelị ukufụma mmyabo. 6Po papo Mose na Alonị balinkubōmba sịsyo UNTWA ābalagị̄le. 7Lulalula Mose ali nifyinja amalōngo lwele, Alonị ali nifyinja amalōngo lwele na fịtatu, nkabalilo aka bājobaga na Falao.

Ingịlị ja Alonị ija kwendela

8Po pāpo UNTWA alinkubabūla ba Mose na Alonị alinkuti: 9Linga Falao ịkwakujoba kumyinụ ịkuti: Amụbōmbe ikiswịgu ukwināngisya ukuti nalōli Kyala abatumịle, po ugwe ukammbūlege Alonị ukatigi: Ega īngịlị jitāge pāsi nkyenị mwa Falao, ukuti jị̄pelege njoka. 10Po papo Mose na Alonị balinkubūka kwa Falao balinkwakubōmba bo mụno UNTWA ābalagị̄le; Alonị ātāgịle pāsi ingịlị jāke nkyenị mwa Falao na babōmbị bāke, jēnda nukwịpela njoka. 11Lelo Falao alinkubalagila abāndu ba mahala nabalosị, po lelo bope, abapela fị̄ka ba mw'Egịpịtị, balinkubōmba bo sịla sịla mbupala bwabo. 12Kukuti mundu alinkutāga pāsị ingịlị jāke, po sịlinkwịpela njoka. Lolị īngịlị ja Alonị jilinkusịmịla ingịlị syabo. 13Pōpe indụmbụla ja Falao jāli ngafụ, akalōndaga kukupilikisya isị bājobaga bo mụno UNTWA ājobị̄le.

Ubutolwe bukunkoma Egịpịtị. Ilịlopa

14Po papo lelo UNTWA alinkummbūla Mose alinkuti: Indụmbụla ja Falao ngafụ, ịkusị̄ta ukubasōsya abany'Ịsịlaelị. 15Ubūke kwa Falao nulubūnju, bo ịkubūka kumīsi; ukanngụ̄lege pambali palwisi, nkiboko kyako ukolele najīngịlị iji jāsanwīke ukuja njoka. 16Po ukajobege kumyake ukatigi: UNTWA, Kyala gwa Bahịbulị āndumịle kumyako ātịle Ubābule abāndu bāke ukuti bakammbōmbelege nndungalāngala; lolị mpaka lilino utịkupilika. 17Lelo lilino UNTWA ịkuti po ākuja pakummanya ukuja jwanị mụ mbōmbo isị ịkuja pakubōmba. Kukēta, āngukoma amīsi ga Naịlị ningịlị iji ngolị̄le nkiboko kyangu, gikusanụkaga ukuja ịlopa, 18iswi isị sịli mwa Naịlị sịkufwaga, ulwisi Naịlị lukufụlụmbanịkaga, po lelo abāndu ba mw'Egịpịtị bịsakutịlaga ukunwa amīsi ga Naịlị. 19Kangi UNTWA alimmbūlịle Mose at̄ịle: Ukammbūlege Alonị ukatigi: Ega īngịlị jāko, ugolosye ikiboko kyako pamwanya pa mīsi ga Egịpịtị, panyīsi syabo, mfịsōko fyabo fya mīsi, mfịsịba fyabo na mmatụbwị, ukuti gōsa gịpele ịlopa; kangi lịkwakujaga ịlopa ịtupu nkị̄su kya Egịpịtị kyosa, mosa mfịbōmbelo ifịsōngolịgwa ukufụma mmịpịkị nukufụma mmabwe.

20Mose na Alonị balinkubōmba bo mụno UNTWA abalagị̄le. Bo Falao nababōmbị bāke bịkukēta alinkwịnula īngịlị alinkugakoma amīsi ga mwa Naịlị, po pāpo gōsa galinkwanduka galinkuja ịlopa. 21Iswi sya mwa Naịlị sịlinkufwa; Naịlị lulinkufụlụmbanịka, ab'Egịpịtị balinkutolịgwa ukunwa amīsi ga mwa Naịlị. Kyosa ikị̄su kya Egịpịtị kilinkuja ịlop'ịtupu. 22Lolị abapela twịlị ba mw'Egịpịtị bōpe balinkubōmba bo sịsịsị mbupala bwabo; bo buno buno indụmbụla ja Falao jilinkusịta kutoka, nakamo ukuti abapilikisye isị bājobaga ba Mose ba Alonị; bo mụno UNTWA aj̄obị̄le. 23Falao alinkugomoka ukubūka kunyụ̄mba jāke kisịta kusịbikilako numōjo isị ākētịle. 24Po papo ab'Egịpịtị bōsa balinkukūmba ifị̄na mumbali mwa Naịlị fya mīsi ga kunwa, papo bātolị̄gwe ākunwa aga mwa Naịlị.

25Ukufụma pakabalilo aka UNTWA agakomị̄le amīsi, gakīndịle amasịku mahāno na mabili.

Currently Selected:

Ukusōka 7: NYB96

Highlight

Copy